កំណើនសេដ្ឋកិច្ចកម្ពុជានឹងកើនដល់ ៧ភាគរយឡើងវិញ នៅឆ្នាំ ២០២៤

រាជរដ្ឋាភិបាល បានពង្រឹងឡើងវិញលើគ្រប់វិស័យ ដើម្បីស្តារ និងជំរុញសេដ្ឋកិច្ចជាតិ ឲ្យត្រឡប់ទៅស្ថានភាពដូចដើមវិញ។

លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានលើកឡើងថា តាមការព្យាករណ៍កំណើនសេដ្ឋកិច្ចកម្ពុជា នឹងកើនដល់ ៧ភាគរយឡើងវិញ នៅឆ្នាំ ២០២៤ខាងមុខ ប្រសិនបើស្ថានភាពសេដ្ឋកិច្ចនៅមានដំណើរការល្អប្រសើរ។

បើតាមលោក ផាន់ ផល្លា កន្លងមករាជរដ្ឋាភិបាល បានព្យាករណ៍ថា នៅឆ្នាំ ២០២១នេះ វិស័យសេដ្ឋកិច្ចស្ថិតក្នុងរង្វង់ ២.៤ភាគរយ ប៉ុន្តែអ្វីដែលឃើញជាក់ស្តែង កើនលើសការព្យាករណ៍ ដោយសាររដ្ឋាភិបាល បានចាក់វ៉ាក់សាំងដល់ពលរដ្ឋគ្រប់គ្នាបានលឿន សម្រេចបានភាពស៊ាំសហគមន៍ និងគ្រប់គ្រងការឆ្លងរីករាលដាលជំងឺកូវីដ-១៩ស្ទើរ ១០០ភាគរយ។

ហេតុផលដែលរាជរដ្ឋាភិបាល ហ៊ានកំណត់តួលេខកើនឡើងខ្ពស់រហូតដល់៧ភាគរយ នៃសេដ្ឋកិច្ចជាតិ នៅឆ្នាំបន្តបន្ទាប់ ដោយមើលឃើញថា វិស័យសំខាន់ៗមួយចំនួន មានកំណើនខ្ពស់ក្នុងការនាំចេញ ដែលចំណូលទាំងនោះអាចជួយទ្រទ្រង់វិស័យសេដ្ឋកិច្ច ឲ្យមានសន្ទុះកើនឡើងយ៉ាងឆាប់រហ័ស។

ជាក់ស្តែង មន្រ្តីជាន់ខ្ពស់ក្រសួងសេដ្ឋកិច្ចលោក ផាន់ ផល្លា បានបង្ហាញរបាយការណ៍នៃការនាំចេញសម្លៀកបំពាក់រយៈពេល ១១ខែឆ្នាំ ២០២១​ មានកំណើន ១៣,៦ភាគរយ បើធៀបនឹងឆ្នាំ ២០២០ ពោលគឺកើនឡើង ៣ភាគរយ។ ជាមួយគ្នានេះ សម្រាប់ការនាំចេញទំនិញមិនមែនកាត់ដេរ មានកំណើនខ្ពស់រហូតដល់ ៥៣,១ភាគរយ ក្នុងរយៈពេលដូចគ្នានេះ។ ទន្ទឹមគ្នានេះ ការនាំចេញវិស័យកសិកម្ម ដែលជាវិស័យស្នូលសំខាន់របស់កម្ពុជា ក៏កើនឡើងខ្ពស់ផងដែរ។ លើសពីនេះទៀត វិស័យអចលនទ្រព្យ ក៏ជាចំណែកសំខាន់ក្នុងការជំរុញសេដ្ឋកិច្ចឲ្យកើនឡើងគួរកត់សម្គាល់ដែរ។

ទោះយ៉ាងណាលោក ផាន់ ផល្លា បានបញ្ជាក់ថា ក្រសួងមិនអាចវាយតម្លៃអំពីកំណើនសេដ្ឋកិច្ចនៅឆ្នាំ ២០២១នេះបាននៅឡើយ ដោយរង់ចាំដាច់ឆ្នាំ ទើបកំណត់តួលេខបានច្បាស់។ ប៉ុន្តែលោកថា ការកើនឡើងគ្រប់វិស័យ ឆ្លុះបញ្ចាំងពីសញ្ញាវិជ្ជមាននៃកំណើនសេដ្ឋកិច្ចជាតិ៕ ទួន សុផល