ព័ត៌មានជាតិ

អាជ្ញាធរខេត្តបាត់ដំបង ដាំកូនឈើ និងដើមឫស្សី៥០០០ដើម លើដីតំបន់៣ ដែលរងការទន្ទ្រានកន្លងមក

បានផុស

៣ years មុន

នៅ

ថ្ងៃពុធ ១៥ ធ្នូ ២០២១

ដោយ

កូនឈើដែលជាប្រភេទឈើលិចទឹក និងដើមឫស្សី សរុបចំនួន៥.០០០ ដើម ត្រូវបានដាំដុះឡើងវិញហើយនៅលើផ្ទៃដីដ៏ធំល្វឹងល្វើយ ក្នុងតំបន់៣ នាមាត់បឹងទន្លេសាប ដែលត្រូវបានក្រុមទុច្ចរិតទន្ទ្រាន និងកាប់បំផ្លាញនាពេលកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី១៤ ខែធ្នូ ឆ្នាំ២០២១ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញដឹកនាំក្រុមការងារ ដើម្បីចុះដាំកូនឈើឡើងវិញនៅតំបន់៣ ត្រង់ចំណុចក្រពើស្គម ស្ថិតក្នុងឃុំព្រៃចាស់ ស្រុកឯកភ្នំ បន្ទាប់ពីរងការកាប់ទន្ទ្រានដីព្រៃលិចទឹក នាមាត់បឹងទន្លេសាប ពីសំណាក់ជនខិលខូច និងក្រោយពេលដែលសម្ដេចអគ្គមហាសេនាបតី តេជោ ហ៊ុនសែន បានចេញបទបញ្ជាឲ្យមានការបង្ក្រាប ជាបន្ទាន់រាល់សកម្មភាពដែលរំលោភបំពានដីតំបន់៣ ។

ការដាំកូនឈើនេះក៏មានការអញ្ជើញចូលរួម ពី ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល លោក ឧត្តមសេនីយ៍ទោ សាត គឹមសាន ស្នងការនគរបាលខេត្ត លោកប្រធានមន្ទីរ អង្គភាពពាក់ព័ន្ធ លោកអភិបាលស្រុកឯកភ្នំ ព្រមទាំងកងកម្លាំងប្រដាប់អាវុធ ផងដែរ ។

ដើមឈើព្រៃលិចទឹកដែលយកទៅដាំនាពេលនោះគឺ មានកូនឈើព្រៃលិចទឹកចម្រុះចំនួន ៥.០០០ ដើម ក្នុងនោះមានដើមប្ញស្សីគ្មានបន្លា ចំនួន ១.០០០ ដើម ផងដែរ ត្រូវបានយកទៅដាំនៅតំបន់ ដែលរងការកាប់បំផ្លាញធ្វើជាកម្មសិទ្ធិផ្ទាល់ខ្លួន បន្ទាប់ពីបានរឹបអូសពីក្រុមជនទុច្ចរិត និង ប្រជាពលរដ្ឋ បានទន្ទ្រានព្រៃលិចទឹកទាំងនោះ យកមកធ្វើជាសម្បត្តិរដ្ឋឡើងវិញ ៕

អត្ថបទ៖ សោ និយមរ័ត្ន