នាយករដ្ឋមន្ត្រី អនុញ្ញាតឲ្យចាក់វ៉ាក់សាំងដូសទី ៣ ដល់កុមារ និងយុវវ័យអាយុពី ១២ឆ្នាំ ដល់ ១៨ឆ្នាំ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតឲ្យចាក់វ៉ាក់សាំងបង្ការជំងឺកូវីដ-១៩ ដូសទី ៣ សម្រាប់កុមារ និងយុវវ័យអាយុចាប់ពី ១២ឆ្នាំ ដល់ ១៨ឆ្នាំ ចាប់ខែមករា ឆ្នាំ ២០២២តទៅ។

ក្នុងពិធីសម្ពោធសណ្ឋាគារ HYATT REGENCY ភ្នំពេញ នាព្រឹកថ្ងៃទី ១៥ ខែធ្នូ ឆ្នាំ ២០២១នេះ សម្ដេចតេជោ ហ៊ុន សែន បានថ្លែងថា សម្ដេចបានសម្រេចអនុម័ត ឲ្យចាក់វ៉ាក់សាំងបង្ការជំងឺកូវីដ-១៩ ដល់កុមារ និងយុវវ័យអាយុ ចាប់ពីអាយុ ១២ឆ្នាំ ដល់អាយុ ១៨ឆ្នាំ នៅខែមករាខាងមុខនេះ។ ការចាក់នេះ ត្រូវធ្វើឡើងតាមរបៀបផ្ការីក ដូចដែលការចាក់ទៅលើមនុស្សចាស់ដែរ។ មកដល់ពេលនេះ ការចាក់វ៉ាក់សាំងដូសទី ៣ ឬដូសជំរុញ ដល់មនុស្សចាស់បានប្រមាណ ៣លាននាក់ហើយ។

បើតាមសម្ដេចតេជោ ហ៊ុន សែន កុមារ និងយុវវ័យ អាយុចាប់ពី ១២ឆ្នាំ ដល់ ១៨ឆ្នាំ នៅទូទាំងប្រទេស ដែលត្រូវចាក់វ៉ាក់សាំងបង្ការជំងឺកូវីដ-១៩ ដូសទី ៣ មានចំនួនប្រមាណ ២លាននាក់ ហើយការចាក់ចាប់ផ្ដើមពីរាជធានីភ្នំពេញ និងខេត្តកណ្ដាលទៅ៕

អត្ថបទ៖ ឃួន សុភ័ក្រ