ព័ត៌មានជាតិ

មកដឹងលក្ខខណ្ឌ ផ្តល់ចំណាត់ថ្នាក់សណ្ឋាគារពីផ្កាយ ១ ដល់ផ្កាយ ៥

បានផុស

៣ years មុន

នៅ

ថ្ងៃព្រហស្បតិ៍ ១៦ ធ្នូ ២០២១

ដោយ

លោក គឹម សេរីរដ្ឋ ប្រធាននាយកដ្ឋានសេវាកម្មស្នាក់នៅ ទេសចរណ៍ និងម្ហូបអាហារ នៃក្រសួងទេសចរណ៍បានឲ្យកម្ពុជាថ្មីដឹងថា ការវាយតម្លៃឲ្យចំណាត់ថ្នាក់សណ្ឋាគារគឺផ្អែកលើអនុក្រឹត្យចេញតាំងពីឆ្នាំ២០០៤។

ការផ្តល់ចំណាត់ថ្នាក់សណ្ឋាគារ ត្រូវបានកំណត់ចាប់ពីកម្រិតថ្នាក់ផ្កាយមួយ រហូតដល់កម្រិតថ្នាក់ផ្កាយប្រាំតាមប្រព័ន្ធចំណាត់ថ្នាក់សណ្ឋាគារ។ ការវិនិច្ឆ័យសណ្ឋាគារណាមួយបើបំពេញលក្ខខណ្ឌបានកាន់តែច្រើន នឹងទទួលបានកម្រិតចំណាត់ថ្នាក់កាន់តែខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា ចាប់តាំងពីឆ្នាំ២០០៤ ដល់ឆ្នាំ២០១៥ ការស្នើសុំកម្រិតផ្កាយគឺអនុវត្តតាមការស្ម័គ្រចិត្ត ដោយម្ចាស់សណ្ឋាគារដាក់ពាក្យស្នើសុំ ដើម្បីឲ្យគណៈកម្មការចុះវាយតម្លៃផ្តល់កម្រិតផ្កាយតាមលក្ខខណ្ឌដែលបំពេញបាន។ តែចាប់ពីឆ្នាំ២០១៥ ក្រសួងបានរៀបចំនិងរុញការអនុវត្តជាកាតព្វកិច្ច។ ការអនុវត្តកាតព្វកិច្ចនេះរាល់សណ្ឋាគារដែលស្នើសុំអាជ្ញាបណ្ណអាជីវកម្មបើមិនទទួលការវាយតម្លៃដោយខ្លួនឯង ក្រសួងនឹងផ្ដល់កម្រិតផ្កាយ ១ ដោយស្វ័យប្រវត្តិ។

យ៉ាងណាក្នុងបរិបទកូវីដ ១៩ ក្រោមការសិក្សាគណៈកម្មការគោលនយោបាយគាំទ្រសហគ្រាសធុនតូចនិងមធ្យម បានស្នើឲ្យក្រសួងកែសម្រួលលើលក្ខខណ្ឌនេះអនុវត្តតែលើសហគ្រាសធុនធំតែប៉ុណ្ណោះ។

ការផ្តល់ចំណាត់ថ្នាក់សណ្ឋាគារ គឺសម្តៅ បញ្ជាក់អំពីកម្រិតគុណភាពជាក់លាក់នៃសេវាកម្ម សម្ភារៈគ្រឿងបំពាក់ និងការរៀបចំរបស់សណ្ឋាគារឱ្យបានសមស្របតាមនិយាមអន្ដរជាតិ។ សណ្ឋាគារទាំងអស់ត្រូវមានចំណាត់ថ្នាក់។ ចំណាត់ថ្នាក់សណ្ឋាគារត្រូវមានការស្នើសុំ និងបំពេញបែបបទដោយម្ចាស់សណ្ឋាគារ ឬអ្នកទទួលខុសត្រូវគ្រប់គ្រងសណ្ឋាគារ។ ចំណាត់ថ្នាក់សណ្ឋាគារ ត្រូវបានកំណត់ចាប់ពីកម្រិតអប្បបរមាថ្នាក់ផ្កាយមួយ រហូតដល់កម្រិតអតិបរមាថ្នាក់ផ្កាយប្រាំតាមប្រព័ន្ធចំណាត់ថ្នាក់សណ្ឋាគារ។

តាមគេហទំព័រ Cambodiatourismrating ដែលរៀបចំដោយក្រសួងទេសចរណ៍ ការដាក់ចំណាត់ថ្នាក់ពិន្ទុសណ្ឋាគារពីផ្កាយ ១ ដល់ ផ្កាយ ៥ តាមលក្ខខណ្ឌដូចខាងក្រោម៖

-ផ្កាយ ១ ៖ ២០០ពិន្ទុ ក្នុងនោះពិន្ទុគ្រឿងសម្ភារៈបំពាក់ យ៉ាងតិចបំផុតគឺ ៨០
-ផ្កាយ ២ ៖ ២៨០ពិន្ទុ ក្នុងនោះពិន្ទុគ្រឿងសម្ភារៈបំពាក់ យ៉ាងតិចបំផុតគឺ ១០០
-ផ្កាយ ៣ ៖ ៤០០ពិន្ទុ ក្នុងនោះពិន្ទុសម្រាប់សេវាបម្រើ យ៉ាងតិចបំផុតគឺ ៥០
-ផ្កាយ ៤ ៖ ៦០០ពិន្ទុ ក្នុងនោះពិន្ទុសម្រាប់សេវាបម្រើ យ៉ាងតិចបំផុតគឺ ១០០
-ផ្កាយ ៥ ៖ ៨០០ពិន្ទុ ក្នុងនោះពិន្ទុសម្រាប់សេវាបម្រើ យ៉ាងតិចបំផុតគឺ ១៥០

បើតាមមន្ត្រីក្រសួងទេសចរណ៍ សណ្ឋាគារដែលមានកម្រិតផ្កាយកាន់តែខ្ពស់ ផ្ដល់ភាពទុកចិត្តដល់ភ្ញៀវស្នាក់នៅ ហើយក៏ផ្តល់ប្រយោជន៍ជាកេរ្តិ៍ឈ្មោះសម្រាប់ការអភិវឌ្ឍអាជីវកម្មដល់ម្ចាស់សណ្ឋាគារផងដែរ។

តាមរបាយការណ៍របស់ក្រសួងទេសចរណ៍ នៅ ទូទាំងប្រទេសកម្ពុជា មានសណ្ឋាគារសរុបចំនួន ១,០២៨ ទីតាំង ស្មើនឹង ៤៤,៤២៨ បន្ទប់។

អត្ថបទ៖ ប៊ុណ្ណារ៉ា