លោក​ស្រី​ ពេជ ចន្ទមុន្នី ​ត្រូវបាន​បោះឆ្នោតជ្រើស​​តាំងជាអគ្គស្នងការ នៃសមាគមកាយឫទ្ធិកម្ពុជា​​

ការបោះឆ្នោតជ្រើសតាំងលោកស្រី ពេជ ចន្ទមុនី្ន ជាអគ្គស្នងការថ្មី នៃសមាគមកាយឫទ្ធិនារីកម្ពុជា បានធ្វើឡើងក្នុងសន្និបាតសមាគមកាយឫទ្ធិនារីកម្ពុជាលើកទី១០ ដែលប្រព្រឹត្តទៅ នៅ ថ្ងៃទី១៦ ខែធ្នូ ឆ្នាំ២០២១នេះ នៅ មជ្ឈមណ្ឌលសហប្រតិបត្តិការ​កម្ពុជា-កូរ៉េ រាជធានីភ្នំពេញ។ ​

សន្និបាតនេះធ្វើឡើង​ដើម្បីបូកសរុបការងារអាណត្តិ ២០១៦-២០២១ និងលើកទិសដៅ សម្រា​ប់​អាណត្តិ ២០២១-២០២៤ និងដើម្បីបោះឆ្នោតជ្រើសរើសគណៈកម្មាធិការប្រតិបត្តិថ្មី។

លោកស្រីបណ្ឌិត ពេជ ចន្ទមុន្នី ទទួលបានសំឡេងគាំទ្រពីអង្គបោះឆ្នោតចំនួន ២០៦ សម្លេង លើ ២១០ សម្លេង ក្នុងការបោះឆ្នោតជ្រើសរើសតែងតាំងជាអគ្គស្នងការ នៃសមាគមកាយឫទ្ធិ​កម្ពុជាអណត្តិឆ្នាំ ២០២១-២០២៤។​

មានប្រសាសន៍នៅ ក្នុងពិធីនោះ លោកស្រី ពេជ ចន្ទមុន្នី ​អះអាងថា ទោះ​បី​មានការមមាញឹក​ក្នុង​ការ​ចូល​រួម​ប្រយុទ្ធប្រឆាំងនឹងការរីករាលដាលជំងឺកូវីដ-១៩ កិច្ចការមនុស្សធម៌ និងកិច្ចការសង្គមសំខាន់ៗជាច្រើនទៀត លោកស្រី ក៏​ដូចជាគណៈកម្មាធិការប្រតិបត្តិថ្មីទាំងអស់ ពេញចិត្តចូលរួមកិច្ចការដឹកនាំសមាគមកាយឫទ្ធិនារីកម្ពុជាប្រកប​ដោយមោទនភាព និងភាពជឿជាក់ ហើយបានធ្វើការប្ដេជ្ញាចិត្តដោយមុតមាំនៅ ចំពោះមុខអង្គសន្និបាតថា នឹងប្រើអស់កម្លាំងកាយចិត្តប្រាជ្ញាស្មារតី និងពេលវេលាក៏ដូចជាចំណេះដឹងដែលមានខិតខំបំពេញតួនាទីភារកិច្ចរបស់ខ្លួនឱ្យបានល្អប្រសើរ បន្តពីគណៈកម្មាធិការប្រតិបត្តិមុន ដោយអនុលោមតាមផែនការសកម្ម​ភាព​ការងារ និងទិសដៅ ការងារឆ្នាំ ២០២១-២០២៤ របស់សមាគមកាយឫទ្ធិកម្ពុជា។

ជាមួយគ្នានោះ នឹងរៀបចំកែលម្អនូវយន្តការ អនុវត្តការងារផ្ទៃក្នុងរបស់សមាគម តាមរយៈការពង្រឹងបន្ថែមលើយន្តការដែលមានស្រាប់ និងស្វែងរកធនធានមនុស្សដែលមានឆន្ទៈ សមត្ថភាព និងសក្តានុពលបន្ថែមដើម្បីបំពេញតួនាទីភារកិច្ចរបស់សមាគម និងបណ្ដុះបណ្ដា​លសមត្ថភាពធនធានមនុស្សរបស់ខ្លួនឱ្យកាន់តែមានគុណភាពដើម្បីបំពេញការងារជូនសមាគម​ប្រកបដោយប្រសិទ្ធភាពខ្ពស់។ លោក​ស្រីសង្កត់ធ្ងន់ថា សង្គម​មួយ​រីកចម្រើនជឿនលឿន​ទៅ បាន​ អាស្រ័យលើធនធានមនុស្សទាំងបុរសទាំងស្ត្រីដែលខ្លាំង។

ចំណែកលោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្រ្តីទំនាក់ទំនងរដ្ឋសភា ព្រឹទ្ធសភា និងអធិការកិច្ច បានអបអរសាទរដោយស្មោះ ចំពោះភាពជោគជ័យចេញពីការបោះឆ្នោតរបស់សមាជិកាសមាគមកាយឫទ្ធិនារីកម្ពុជា​ និងបានកោតសរសើរចំពោះស្នាដៃការងាររបស់សមាគមកាយឫទ្ធិនារីកម្ពុជា ដែលសម្រេចបាននាពេលកន្លងមក។ លោកស្រី​ បានគាំទ្រ និងលើកទឹកចិត្តចំពោះគណៈកម្មាធិការថ្មី​ សូមបន្តខិតខំប្រឹងប្រែងយកអស់កម្លាំងកាយចិត្តប្រាជ្ញាស្មារតីប្រកបដោយការដឹកនាំសមាគមកាយឫទ្ធិនារីកម្ពុជាទៅ កាន់ជោគជ័យបន្ថែមទៀត ដើម្បីបន្តរួមចំណែកជាមួយរាជរដ្ឋាភិបាលក្នុងការអភិវឌ្ឍធនធានកុមារីស្របតាមគោលការណ៍សមាគមកាយឫទ្ធិនារីពិភពលោក។

លោកស្រីឧបនាយករដ្ឋមន្ត្រី​សង្ឃឹមយ៉ាងមុតមាំថា គណៈកម្មការថ្មីដឹកនាំដោយលោកស្រី ពេជ ចន្ទមុន្នី ដែល​ទទួល​បានភារកិច្ចដ៏ថ្លៃថ្លានេះពិត​ជា​អាចរក្សាភាពគង់វង្ស​នៃការ​រីក​ចម្រើន និងជំរុញការកសាងសមត្ថភាពរបស់កុមារី យុវតី និង​ស្ត្រីឱ្យចូលរួមយ៉ាងសកម្មក្នុងការកសាងប្រទេសជាតិ និងលើកតម្កើងតម្លៃស្ត្រី និងភាពថ្លៃថ្នូរនៃប្រពៃណីខ្មែរយើង និងការលើកកម្ពស់សមត្ថភាពកុមារី យុវតីនិងស្ត្រីវ័យក្មេងឲ្យក្លាយជាស្ត្រីរឹងមាំដែលមានតួនាទី និងឋានៈនៅ ក្នុងសង្គមតាមរយៈការកសាងសមត្ថភាពខ្លួនជាគន្លឹះដ៏សំខាន់សម្រាប់ផ្ដល់ឱកាសដល់ស្ត្រីឲ្យចូលរួមពេញលេញក្នុងការអភិវឌ្ឍសេដ្ឋកិច្ចសង្គម និងការកាត់បន្ថយភាពក្រីក្រនិងលើកស្ទួយស្ថានភាពស្ត្រីនៅ កម្ពុជា។

គួរបញ្ជាក់ថា ពិធីបើកអង្គសន្និបាត​សមាគមកាយឫទ្ធិនារីកម្ពុជាលើកទី១០ ​បាន​ធ្វើឡើងក្រោមព្រះរាជា​ធិបតីភាព​​​សម្តេចស៊ីសុវត្ថិ ពង្សនារី មុនីពង្ស ព្រះរាជតំណាង ព្រះមហាក្សត្រី នរោត្តម មុនិនាថ សីហនុ ហើយពិធីបិទក្រោមអធិបតីភាពដ៏ខ្ពង់ខ្ពស់របស់លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្រ្តីទំនាក់ទំនងរដ្ឋសភា ព្រឹទ្ធសភា និងអធិការកិច្ច៕

អត្ថបទ៖ កោះកែវ