អាជ្ញាធរខេត្តព្រះសីហនុ ប្រកាសតាមចាប់ខ្លួន អ្នកបើកបរគ្រឿងចក្រ ដែលឈូសឆាយដីព្រៃរបស់រដ្ឋ

ដីព្រៃរបស់រដ្ឋ ស្ថិតក្នុងតំបន់គម្របព្រៃឈើឆ្នាំ ២០០២ មួយកន្លែង ត្រូវបានជនល្មើសមួយក្រុម បានយកគ្រឿងចក្រ ប្រភេទអេស្ការវ៉ាទ័រចំនួន ២គ្រឿងទៅឈូសឆាយ និងកាស់កាយដីយ៉ាងអនាធិបតេយ្យ។
សកម្មភាពកាប់កាយបំផ្លាញដីព្រៃរដ្ឋ ដែលត្រូវបានការពារដោយច្បាប់នេះ ត្រូវមន្ត្រីផ្នែករដ្ឋបាលព្រៃឈើសហការជាមួយ កម្លាំងគណៈបញ្ជាការឯកភាពស្រុកព្រៃនប់ ចុះស្រាវជ្រាវ រុករក និងបង្ក្រាបបទល្មើសព្រៃឈើ ប្រទះឃើញនៅព្រឹកថ្ងៃទី ១៦ ខែធ្នូ ឆ្នាំ ២០២១ នៅចំណុចជើងភ្នំខាងក្រោយវត្តសំរុង ស្ថិតនៅភូមិសំរុង ឃុំសំរុង ស្រុកព្រៃនប់ ខេត្តព្រះសីហនុ។

ពេលក្រុមសមត្ថកិច្ច ចុះទៅដល់ទីតាំងជាក់ស្តែង ពិនិត្យឃើញមានគ្រឿងចក្រអេស្កាវ៉ាទ័រចំនួន ២គ្រឿង បានធ្វើសកម្មភាពគាស់កកាយដីព្រៃរបស់រដ្ឋ (ដីគម្របព្រៃឈើ ឆ្នាំ២០០២) នៅជើងភ្នំក្នុងភូមិសាស្ត្រខាងលើ នៅលើទីតាំងដី ២កន្លែងផ្សេងគ្នា ពេលនោះអ្នកបើកបរគ្រឿងចក្រទាំងនោះ បានរត់គេចខ្លួនបាត់ ដោយបន្សល់ទុកគ្រឿងចក្រអេស្កាវ៉ាទ័រ ២គ្រឿង នៅកន្លែងកើតហេតុ។

សូមជម្រាបថា ចំពោះទីតាំងដីជម្រាលភ្នំនេះ បើតាមមន្ត្រីជំនាញ បាននិយាយថា ប្រសិនបើរងការគាស់កកាយបំផ្លិចបំផ្លាញ នឹងធ្វើឲ្យមានការជន់លិចភូមិដ្ឋាន របស់ប្រជាពលរដ្ឋ ដែលរស់នៅផ្នែកខាងក្រោម ហើយនឹងបង្កបញ្ហាជាច្រើនទៀត នាពេលខាងមុខ។

បច្ចុប្បន្នគ្រឿងចក្រអេស្កាវ៉ាទ័រទាំង ២គ្រឿ ត្រូវបានដឹកយកមករក្សាទុក នៅផ្នែករដ្ឋបាលព្រៃឈើព្រៃនប់ និងស្វែងរកចាប់ខ្លួនជនល្មើស គាស់កកាយដីព្រៃរបស់រដ្ឋ ដើម្បីចាត់ការតាមនីតិវិធីច្បាប់៕

អត្ថបទ៖ ស៊ុយ ចាន់ធា