រដ្ឋមន្ត្រីអប់រំ៖ បេក្ខជនប្រឡងបាក់ឌុប ​មានកម្តៅ​ឡើងខ្ពស់​ សង្ស័យ​កូវីដត្រូវ​ប្រឡង​បន្ទប់​ដាច់​ដោយឡែក

រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន មានប្រសាសន៍ឱ្យដឹងថា នៅ ក្នុងមណ្ឌលនីមួយៗ ក្រសួងបានរៀបចំបន្ទប់ដាច់ដោយឡែក សម្រាប់ដាក់សិស្សដែលមានកម្ដៅ ឡើងខ្ពស់ និងសង្ស័យវិជ្ជមានជំងឺកូវីដ១៩។

លោករដ្ឋមន្ត្រីថ្លែងថា លទ្ធភាពដែលមានជំងឺកូវីដ១៩ នោះ គឺតិចណាស់ ដោយសារតែក្រសួងបានតាមដានជាប្រចាំ មិនមានសិស្សតាមសាលាណាមួយមានជំងឺកូវីដនោះទេគិតត្រឹមថ្ងៃនេះ។

លោករដ្ឋមន្ត្រីថ្លែងថា ប្រសិនបើសិស្សមានកម្ដៅ សីតុណ្ហភាពក្ដៅ លើសកម្រិត ៣៧.៥ គឺក្រសួងមានបន្ទប់មួយដាច់ដោយឡែក ដើម្បីដាក់ប្រឡង។

លោករដ្ឋមន្ត្រីបានបន្តថា ការមិនឱ្យបេក្ខជនដែលមានឆ្លងជំងឺកូវីដ១៩ ចូលប្រឡងនេះដោយសារខ្លាចឆ្លងរាលដាលដល់បេក្ខជន និងគ្រូផ្សេងទៀត ព្រមទាំងធ្វើឱ្យបេក្ខជនមានការភ័យខ្លាច ឬបង្កចលាចល និងបាត់បង់សណ្តាប់ធ្នាប់ដល់ដំណើរការប្រឡង។

លោករដ្ឋមន្ត្រីបានបន្តថា ក្រសួងមិនមានធ្វើតេស្តរកកូវីដដល់បេក្ខជនប្រឡងទេគឺគ្រាន់តែមានការវាស់កម្តៅ មុនពេលចូលប្រឡង ១ថ្ងៃគឺនៅ ថ្ងៃទី២៦ធ្នូ។ បើបេក្ខជនណាមានកម្តៅ ធម្មតាក្រសួង នឹងបិទស្ទីកឃ័រតែបើបេក្ខជនកម្តៅ ក្តៅ លើសពី៣៧​អង្សាសេណែនាំឱ្យទៅ ធ្វើតេស្តរកជំងឺកូវីដ១៩ហើយនៅ ថ្ងៃប្រឡងត្រូវវាស់ម្តងទៀត៕