គ.ជ.ប នឹងបើកកិច្ចប្រជុំជាមួយភាគីពាក់ព័ន្ធ ស្តីពីការបិទផ្សាយបញ្ជីបោះឆ្នោតដំបូង បន្ទាប់ពីបិទបញ្ចប់ការចុះឈ្មោះ

គណៈកម្មាធិការជាតិរៀបចំការបោះឆ្នោត (គ.ជ.ប) នឹងរៀបចំកិច្ចប្រជុំផ្សព្វផ្សាយជាមួយភាគីពាក់ព័ន្ធតាមប្រព័ន្ធវីដេអូអនឡាញ (Microsoft Teams) ស្តីពី ការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោតនៅឃុំ សង្កាត់ ទូទាំងប្រទេស និងការដាក់ ការទទួល ការដោះស្រាយពាក្យបណ្ដឹងតវា បណ្តឹងជំទាស់ ទាក់ទងនឹងបញ្ជីបោះឆ្នោតដំបូង។

កិច្ចប្រជុំនេះ នឹងប្រព្រឹត្តទៅនៅថ្ងៃសុក្រ ទី៣១ ខែធ្នូ ឆ្នាំ២០២១ នៅទីស្តីការ គ.ជ.ប វេលាម៉ោង ១០ព្រឹក ក្រោមអធិបតីភាពលោក ហ៊ីង ធីឫទ្ធិ សមាជិក គ.ជ.ប។ ភាគីពាក់ព័ន្ធ ត្រូវចូលរួមក្នុងកិច្ចប្រជុំនេះ ត្រូវផ្តល់ឈ្មោះ តួនាទី អង្គភាព ស្ថាប័ន លេខទូរស័ព្ទសាមីខ្លួន ទៅអគ្គលេខាធិការដ្ឋាន គ.ជ.ប ត្រឹមថ្ងៃទី២៨ ខែធ្នូ ឆ្នាំ២០២១ ឬទាក់ទងតាមរយៈលេខទូរស័ព្ទ ០៧៨ ៦៦៥ ៨២៦, ០៩៩ ៦១ ៦១ ៦៤។

សូមបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២១ បានធ្វើឡើងចាប់តាំងថ្ងៃទី១២ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២១។ បើតាមរបាយការណ៍រហូតដល់ថ្ងៃចុងក្រោយ គឺមានប្រជាពលរដ្ឋដែលបានអញ្ជើញមកចុះឈ្មោះបោះឆ្នោតថ្មីសរុបចំនួន ៤៥០.៣៨២ នាក់ ខណៈអ្នកដែលត្រូវលុបឈ្មោះចេញពីបញ្ជីបោះឆ្នោតសរុបមានចំនួន ២២៤.៩០២ នាក់ ហើយអ្នកដែលបានកែតម្រូវទិន្នន័យសរុបមានចំនួន ១៨៧.៥៨៦ នាក់ និងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មីសរុប មានចំនួន១៤៨.២៩២ នាក់។

បើតាមគ.ជ.ប ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតរយៈពេល៥០ ថ្ងៃកន្លងមក បានប្រព្រឹត្តទៅ ដោយរលូនក្នុងបរិយាកាសសន្តិសុខ សុវត្ថិភាព និងមានសណ្តាប់ធ្នាប់ល្អ ដោយសារមានការចូលរួម និងកិច្ចសហការល្អពីគ្រប់ភាគីពាក់ព័ន្ធ៕ 

អត្ថបទ ៖ កោះកែវ