ក្រសួង​គ្រោង​សាងសង់​មណ្ឌលព័ត៌មាន​ទេសចរណ៍​១៨កន្លែង​ទៀតដើម្បីបម្រើដល់វិស័យ​ទេសចរណ៍

ក្រសួងទេសចរណ៍ គ្រោងនឹងសាងសង់មណ្ឌលព័ត៌មាន ទេសចរណ៍​ចំនួន១៨ កន្លែងបន្ថែមទៀត​ដើម្បីបម្រើដល់វិស័យទេសចរណ៍ ខណៈបច្ចុប្បន្នមានត្រឹមតែ ៣៤កន្លែង ប៉ុណ្ណោះនៅទូទាំងប្រទេស។

ថ្លែងក្នុងវគ្គបណ្តុះបណ្តាលពង្រឹងសមត្ថភាពមន្រ្តីប្រចាំការនៅតាមមណ្ឌលព័ត៌មាន ទេសចរណ៍មានរយៈពេល ២ថ្ងៃ គិតចាប់ពីថ្ងៃទី ២០ ដល់ថ្ងៃទី ២១ ខែធ្នូ នៅសាលបណ្តុះ បណ្តាលរបស់​មន្ទីរទេសចរណ៍​ខេត្តព្រះសីហនុ លោក គុជ បញ្ញាសា អនុរដ្ឋលេខាធិការក្រសួងទេសចរណ៍ និងជាប្រធានក្រុមការងារគ្រប់គ្រងមណ្ឌលព័ត៌មានទេសចរណ៍ បានលើកឡើងពីតម្រូវការនៃការធ្វើដំណើរ កម្សាន្តរបស់ភ្ញៀវទេសចរផ្ទៃក្នុងដែលបានជំរុញឲ្យ​មានការបង្កើននូវការគ្រប់គ្រងព័ត៌មានទេសចរណ៍ឱ្យកាន់តែច្បាស់លាស់ និងប្រកបដោយប្រសិទ្ធិភាពខ្ពស់ដើម្បីធ្វើការផ្តល់ព័ត៌មានទេសចរណ៍ដល់ភ្ញៀវទេសចរ។

លោកបានមានប្រសាសន៍ថា «ទោះបីជាយើងកំពុងដើរក្នុងសម័យឌីជីថលនៃបដិវត្តិឧស្សាហកម្ម៤.០ក៏ដោយ យើងក៏ត្រូវការមណ្ឌលព័ត៌មានទេសចរណ៍ជាលក្ខណៈ រូបវ័ន្តផងដែរ»។

លោកប្រធានក្រុមការងារបានបន្តថាការធ្វើដំណើរជាទេសចរណ៍ទាមទារចាំបាច់នូវការស្វែងរកព័ត៌មានដែលទាក់ទងនឹងតម្រូវការរបស់ភ្ញៀវទេសចរ ដូចជាព័ត៌មានអំពីការស្នាក់នៅ មធ្យោបាយ ធ្វើដំណើរ ការហូបចុក កន្លែងដែលទាក់ទាញ និងសេវាកម្មទ្រទ្រង់ទេសចរណ៍ផ្សេងៗទៀត ដែលជំរុញពីភាពចាំបាច់ថា តំបន់គោលដៅទេសចរណ៍ត្រូវមានមណ្ឌលព័ត៌មានទេសចរណ៍ ឬបញ្ជរព័ត៌មាន ទេសចរណ៍ ជាពិសេសនៅតាមគោលដៅទេសចរ ណ៍សំខាន់ៗ។

លោកបានបន្តទៀតថាគិតត្រឹមខែធ្នូ ឆ្នាំ២០២១នេះ ប្រទេសកម្ពុជាមានមណ្ឌលព័ត៌មានទេសចរណ៍ដែលមានស្រាប់សរុបចំនួន៣៤កន្លែងហើយនាពេលខាងមុខមានគម្រោងសាងសង់ក្នុងផែនការ របស់មន្ទីរទេសចរណ៍តាមរាជធានីខេត្តចំនួន១៨កន្លែងទៀត។

លោកបានបញ្ជាក់ថាគោលបំណងនៃវគ្គបណ្តុះបណ្តាលនេះគឺពង្រឹងសមត្ថភាពបន្ថែមដល់មន្ត្រីរាជការ និងបុគ្គលិកដែលធ្វើការ ប្រចាំនៅតាមមណ្ឌលព័ត៌មានទេសចរណ៍​ដើម្បីគ្រប់គ្រងលើ​ប្រតិបត្តិការ​មណ្ឌលព័ត៌មានទេសចរណ៍ និង បង្កើនសមត្ថភាពសេវាបដិសណ្ឋារកិច្ច​ឱ្យមានប្រសិទ្ធ​ភាពខ្ពស់ និងដើម្បីត្រៀមការរៀបចំវេទិកាទេសចរណ៍ អាស៊ានលើកទី៤០ នៅខេត្តព្រះសីហនុ ដែលគ្រោងនឹងធ្វើក្នុងខែមករា ឆ្នាំ២០២២ ខាងមុខនេះផងដែរ។

គួរបញ្ជាក់ថាវគ្គបណ្តុះបណ្តាលនេះមានអ្នកចូលរួមសរុប៥០នាក់ភាគច្រើនជាមន្ត្រីរាជការ និងបុគ្គលិកដែលប្រចាំ នៅតាមមណ្ឌលព័ត៌មានទេសចរណ៍មកពីខេត្តព្រះសីហនុ ខេត្តកែប ខេត្តកំពត និងខេត្តកោះកុង៕

អត្ថបទ៖ សំអឿន