ព័ត៌មានជាតិ

កម្ពុជាជាប់លេខ២ ក្នុងអាស៊ាន ដែលបញ្ជូនកងទ័ពស្ត្រីចូលរួមជាមួយអង្គការសហប្រជាជាតិ

បានផុស

៤ years មុន

នៅ

ថ្ងៃអង្គារ ៨ ធ្នូ ២០២០

ដោយ

នេះជាការបញ្ជាក់របស់លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការ អន្តរជាតិ នៅក្នុងពិធីបើកសន្និសីទអន្តរជាតិ ស្តីពី “ការពង្រឹងតួនាទីស្ត្រីក្នុងការកសាង និងការថែរក្សាសន្តិភាព៖ ពីការប្តេជ្ញាចិត្តរហូតដល់លទ្ធផល” កាលពីទី០៧ ខែធ្នូ ម្សិលមិញ តាមរយៈប្រព័ន្ធវីដេអូ។

មានប្រសាសន៍នៅក្នុងពិធីនោះ លោកឧបនាយករដ្ឋមន្ត្រី ប្រាក់ សុខុន លើក ឡើងថា ស្ត្រី និងក្មេងស្រី មានអំណាចក្នុងការផ្លាស់ប្តូរ និងជំរុញការអភិវឌ្ឍប្រកបដោយវិជ្ជមាន។លោកថា ពួកគេអាចចូលរួមចំណែកជួយកសាងសង្គមប្រកបដោយភាពត្រឹមត្រូវ បរិយាប័ន្ន វិបុលភាព និងសន្តិភាព។ ទោះបីជាយ៉ាងណាក៏ដោយ ផ្នត់គំនិតអំពីសក្ដានុពល និងការពាក់ព័ន្ធរបស់ស្ត្រី និងក្មេងស្រី នៅតែបន្តកើតមាន ជាពិសេស ក្នុងវិស័យកសាង សន្តិភាព និងសន្តិសុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកឧបនាយករដ្ឋមន្ត្រី ប្រាក់ សុខុន ពីអតីតកាលដ៏មហាសោកនាដកម្ម កម្ពុជាបានមើលឃើញពីថាមពល និងភាពរឹងមាំរបស់ស្ត្រី ក្នុងការកសាងសង្គមជាតិឡើងវិញ ព្រមទាំងបង្កើតបរិយាកាសសន្តិភាព និងសន្តិសុខ ដែលមានសារៈសំខាន់សម្រាប់ការអភិវឌ្ឍសេដ្ឋកិច្ច និងសង្គមរបស់ប្រទេស ជាតិ។ ហេតុដូច្នេះ កម្ពុជាសូមសម្តែងការស្វាគមន៍ ចំពោះសេចក្តីសម្រេចចិត្តរបស់អង្គការសហប្រជាជាតិស្តីពីស្ត្រី សន្តិភាព និងសន្តិសុខ នៅក្នុងការកសាង និងការទ្រទ្រង់សន្តិភាព ក៏ដូចជាផែនការសកម្មភាពទាំង៧ចំណុចរបស់អគ្គលេខាធិការអង្គការសហប្រជាជាតិ ស្តីពីការកសាងសន្តិភាពឆ្លើយតបនឹងយេនឌ័រ។

ប្រមុខការទូតកម្ពុជាបញ្ជាក់ថា សមភាពយេនឌ័រ គឺជាតម្លៃស្នូលមួយក្នុងចំណោមតម្លៃស្នូលជាច្រើនទៀត ដែលបានគាំទ្រដោយរាជរដ្ឋាភិបាលកម្ពុជា និងត្រូវបានបញ្ជ្រាបទៅក្នុងយុទ្ធសាស្ត្រ និងគោលនយោបាយអភិវឌ្ឍន៍ជាតិនៅគ្រប់កម្រិត។

ដោយមានកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា បច្ចុប្បន្នមន្ត្រីរាជការជាស្ត្រីមានចំនួន៤១ភាគរយ ក្នុងចំណោមមន្ត្រីរាជការសរុប ទាំងអស់ ក្នុងឆ្នាំ ២០២០ ហើយតួលេខនេះ កំពុងតែកើនឡើងក្នុងតួនាទីជាអ្នកដឹកនាំ និងក្នុងមុខតំណែងជាអ្នកធ្វើសេចក្តីសម្រេចចិត្ត។ ស្ត្រីកម្ពុជាបច្ចុប្បន្នបានទទួលនូវការគាំទ្រ និងការគាំពារសង្គមកាន់តែប្រសើរឡើង តាមរយៈការជំរុញឱ្យទទួលបានការថែរក្សាសុខភាព ការការពារផ្នែកច្បាប់ និងយុត្តិធម៌ប្រឆាំងនឹងអំពើហិង្សា ការជួញដូរមនុស្ស និងការកេងប្រវ័ញ្ចផ្លូវភេទ ហើយធនធានសេដ្ឋកិច្ច ដូចជា តាមរយៈការពង្រីកឥណទានសម្រាប់ សហគ្រាសធុនតូចបំផុត តូច និងមធ្យម ដែលមានចំនួន៦១ភាគរយ គ្រប់គ្រងដោយស្ត្រី។

លោកបន្តថា ចាប់តាំងពីឆ្នាំ២០០៦ កម្ពុជាបានបញ្ជូនកងរក្សាសន្តិភាពជាស្ត្រីចំនួន៤១៩នាក់ ក្នុងចំណោមកងរក្សាសន្តិភាព សរុបចំនួន ៧.១២៣ នាក់ ទៅកាន់បេសកកម្មថែរក្សាសន្តិភាពរបស់អង្គការសហប្រជាជាតិ នៅក្នុងប្រទេសចំនួន៩។ ឆ្នាំនេះ ស្ត្រីចំនួន៩២នាក់ ក្នុងចំណោមកងរក្សាសន្តិភាពកម្ពុជាចំនួន៧៨១នាក់ កំពុងបំពេញបេសកកម្មថែរក្សាសន្តិភាពនៅប្រាំប្រទេស។ បច្ចុប្បន្នកម្ពុជាជាប់ចំណាត់ ថ្នាក់លេខ២ នៅក្នុងអាស៊ាន បន្ទាប់ពីប្រទេសឥណ្ឌូនេស៊ី និងជាប់ចំណាត់ថ្នាក់លេខ១៧ ក្នុងពិភពលោក ដែលបានបញ្ជូនកងទ័ពជាស្ត្រី ចូលរួមប្រតិបត្តិការថែរក្សាសន្តិភាពរបស់អង្គការសហប្រជាជាតិ។

លើការអនុវត្តប្រកបដោយប្រសិទ្ធិភាពនូវសេចក្តីសម្រេចចិត្តរបស់ក្រុមប្រឹក្សាសន្តិសុខ អង្គការសហប្រជាជាតិ លោកឧបនាយករដ្ឋមន្ត្រី ប្រាក់ សុខុន ជឿជាក់ថា រដ្ឋសមាជិកគួរតែ យកចិត្តទុកដាក់ឱ្យបានដិតដល់ចំពោះស្ថានភាពរបស់ស្ត្រី និងក្មេងស្រី ដែលប្រឈមនឹងការកើនឡើងនូវអំពើហិង្សា និងសេចក្តីលំបាកវេទនាផ្នែកសេដ្ឋកិច្ច ដោយសារផលប៉ះពាល់ នៃជំងឺរាតត្បាតកូវីដ-១៩ និងជំរុញការទទួលស្គាល់ស្ត្រី ដែលជាឆ្អឹងខ្នង នៃសង្គម និងកម្លាំងដែលមិនអាចខ្វះបាន សម្រាប់ការរក្សាសន្តិភាព និងការអភិវឌ្ឍប្រកបដោយចីរភាព៕

អត្ថបទ ៖ កោះកែវ