មន្ទីរទេសចរណ៍ ណែនាំភ្ញៀវទេសចរទៅលេងរមណីយ​ដ្ឋាន២កន្លែងក្នុងខេត្តកំពតនៅថ្ងៃឆ្លងឆ្នាំ

ប្រធានមន្ទីរទេសចរណ៍ខេត្តកំពត បានប្រាប់កម្ពុជាថ្មីថា អាជ្ញាធរ បានត្រៀមបង្កើតកម្មវីធីកម្សាន្តជាច្រើន នៅតំបន់រមណីយដ្ឋានចំនួន២កន្លែង ក្នុងខេត្តកំពត។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យដឹងថា នៅខេត្តកំពតមានតំបន់ទេសចរណ៍ធំពីរ ដែលទទួលបានភ្ញៀវទេសចរច្រើនជាងគេ រួមមាន រមណីយដ្ឋានទឹកឈូ និងរមណីយដ្ឋានភ្នំបូកគោ។ លោកបានលើកឡើងថា«​ នៅខេត្តកំពតនេះ យើងមានតំបន់ធំពីរ ដែលទទួលបានភ្ញៀវច្រើនជាងគេ ​ទី១ គឺតំបន់ទឹកឈូ ​ដែលទីនោះមានកន្លែងកម្សាន្តច្រើន ដោយមានភាពអំណោយផលចំពោះភ្ញៀវដែលនិយមធម្មជាតិ…ទី២ តំបន់ភ្នំបូកគោ មានសាលធំ មានកម្មវិធីជាច្រើនដូចជា អុជកាំជ្រួច ការបោះតង់ ការរៀបចំភ្លើងគប់ក្នុងព្រឹត្តិការណ៍ឆ្លងឆ្នាំ»។​

លោក សយ ស៊ីណុល បានបញ្ជាក់ថា ភ្ញៀវទេសចរចាប់ផ្តើមកក់បន្ទប់ស្នាក់នៅបណ្តើរៗហើយរហូតមកដល់ពេលនេះ។

បើទោះជាមានវិបត្តិកូវីដ-១៩ ក៏ខេត្តកំពតនៅទទួលបានភ្ញៀវទេសចរក្នុងស្រុកប្រមាណជិត ៩០ម៉ឺននាក់ ក្នុងឆ្នាំ ២០២១នេះ។ នេះបើតាមការបញ្ជាក់របស់ប្រធានមន្ទីរទេសចរណ៍ខេត្តកំពត។ ចំពោះបញ្ហាការឡើងថ្លៃផ្ទះសំណាក់ ឬម្ហូបអាហារ ពុំមានកើតឡើងនៅខេត្តកំពតនោះទេ ព្រោះអាជ្ញាធរ តែងតែក្រើនរំលឹកដល់ប្រតិបត្តិករទេសចរទាំងអស់ ទៅលើបញ្ហានេះ។

លោក សយ ស៊ីណុល រំពឹងថា ថ្ងៃឆ្លងឆ្នាំសកលខាងមុខនេះ នឹងមានកំណើនភ្ញៀវទេសចរទៅលេងកម្សាន្តនៅខេត្តកំពតច្រើន ដោយលោកសង្កត់ធ្ងន់ថា ខេត្តកំពតមានរមណីយដ្ឋានច្រើនកន្លែង និងមានហេដ្ឋារចនាសម្ព័ន្ធល្អសម្រាប់ភ្ញៀវទេសចរទាំងជាតិ និងអន្តរជាតិ៕ ទួន សុផល