ព័ត៌មានជាតិ

វិស័យធនាគារនិងហិរញ្ញវត្ថុកម្ពុជា នៅតែមានសុខភាពល្អ ទោះបីរងផលប៉ះពាល់ដោយជំងឺកូវីដ១៩

បានផុស

៤ years មុន

នៅ

ថ្ងៃសៅរ៍ ២៤ តុលា ២០២០

ដោយ

ភ្នំពេញ ៖ លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា បានឲ្យដឹងថាទោះបីជាប្រទេសកម្ពុជាទទួលរងនូវផលប៉ះពាល់ដោយសារជំងឺកូវីដ១៩ក៏វិស័យធនាគារនិងហិរញ្ញវត្ថុនៅតែមានសុខភាពល្អដដែលទេ។

ថ្លែងក្រោយបើកសិក្ខាសាលាស្តីពី« «ឱកាសចំណេញក្នុងការវិនិយោគក្នុងវិស័យមូលបត្រ»នៅព្រឹកថ្ងៃទី២៤តុលានេះ លោកបណ្ឌិត អ៊ិន ចាន់នីដែលជាប្រធាននាយកប្រតិបត្តិធនាគារអេស៊ីលីដាបានមានប្រសាសន៍ថាការដែលវិស័យធនាគារនិងហិរញ្ញវត្ថុមានសុខភាពនេះគឺដោយសារតែស្ថានភាពជំងឺកូវីដ១៩នៅប្រទេសកម្ពុជាហាក់មិនសូវធ្ងន់ធ្ងរដូចបណ្តាប្រទេសមួយចំនួននោះទេដែលរហូតមកដល់ពេលនេះមិនមាន្នកស្លាប់ហើយនៅសល់អ្នកជំងឺតិចតួចប៉ុណ្ណោះកំពុងសម្រាកព្យាបាលជំងឺនៅមន្ទីរពេទ្យពិសេសមិនមានអ្នកឆ្លងនៅក្នុងសហគមន៍ដែរដែលធ្វើឲ្យវិស័យធនាគារនិងហិរញ្ញត្ថុមានហានិភ័យតិច។

ជាមួយគ្នានេះដែរ លោក បានបន្តទៀតថា លើសពីនេះទៀតរាជរដ្ឋាភិបាលតាមរយៈធនាគារជាតិបានដាក់ចេញនូវវិធានការជាច្រើន ដូចជាបន្ធូរបន្ថយទុនបម្រុង អនុបាទផ្សេងៗទៀតរួមទាំងពន្ធកាត់ទុកដើម្បីជួយសម្រាលដល់វិស័យធនាគារដើម្បីឲ្យធនាគារជួយគាំទ្រដល់ការលួតលាស់របស់អតិថិជន។

លោកបានបន្ថែមទៀតថា ម្យ៉ាងទៀតដោយសារការចាត់ចែងរបស់ធនាគារនីមួយៗបានល្អស្របទៅតាមវិធានការរបស់រាជរដ្ឋាភិបាលក្នុងការទប់ស្កាត់ឥណទានការខូចបង់បានច្រើន។អីចឹងហើយទើបសុខភាពធនាគារនិងវិស័យហិរញ្ញវត្ថុនៅល្អប្រសើរ។

លោកបានបញ្ជាក់ទៀតថា រហូតមកដល់សព្វថ្ងៃនេះ អតិថិជនប្រមាណជិត២៨ម៉ឺនគ្រួសារដែលបានខ្ចីប្រាក់ពីវិស័យធនាគារ ទទួលបានការរៀបចំឥណទានឡើងវិញដែលមានទឹកប្រាក់ប្រមាណ ៣ពាន់លានដុល្លារអាមេរិកបន្ទាប់ពីពួកគាត់ជួបបញ្ហាជីវភាព ដោយសារការរីករាលដាលនៃជំងឺកូវីដ១៩។

លោកបញ្ជាក់ថា យ៉ាងណាក៏ដោយក៏ធនាគារក៏បានរៀបចំឥណទានឡើងវិញតាមការស្នើរបស់រាជរដ្ឋាភិបាលដល់អតិថិជនដែលរងផលប៉ះពាល់ដោយសារជំនន់ទឹកភ្លៀងផងដែរ៕
ដោយ ៖ សំអឿន

Related Topics: