ព័ត៌មានជាតិ

លោក ង្វៀន សួនហ៊្វុក យាងព្រះមហាក្សត្រ និងសម្តេចព្រះមហាក្សត្រី បំពេញព្រះរាជទស្សនកិច្ចនៅប្រទេសវៀតណាម

បានផុស

៣ years មុន

នៅ

ថ្ងៃពុធ ២២ ធ្នូ ២០២១

ដោយ

លោក ង្វៀន សួនហ៊្វុក (Nguyen Xuan Phuc) ប្រធានរដ្ឋ នៃសាធារណរដ្ឋសង្គមនិយមវៀតណាម បានដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា រយៈពេល២ថ្ងៃ ដោយចាប់ពីថ្ងៃទី២១ ដល់ថ្ងៃទី២២ ខែធ្នូ ឆ្នាំ២០២១ ហើយក្នុងឱកាសចូលក្រាបបង្គំគាល់ លោកបានយាងព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ដើម្បីបំពេញព្រះរាជទស្សនកិច្ចនៅប្រទេសទសវៀតណាម តាមពេលវេលាសមរម្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមការបញ្ជាក់នៅក្នុងសេចក្តីថ្លែងការរួម ដែលផ្សព្វផ្សាយដោយក្រសួងការបរទេសកម្ពុជា នារសៀលថ្ងៃនេះ។

សេចក្តីថ្លែងការណ៍រួមបានបញ្ជាក់ថា នៅក្នុងដំណើរបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជារយៈពេល២នេះ លោកប្រធានរដ្ឋ ង្វៀន សួនហ៊្វុក បានថ្លែងអំណរព្រះគុណចំពោះព្រះរាជបដិសណ្ឋារកិច្ចយ៉ាងកក់ក្តៅ ដែលព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃ ព្រះរាជាណាចក្រកម្ពុជា ថ្នាក់ដឹកនាំ និងប្រជាជនកម្ពុជា បានផ្តល់ជូនគណៈប្រតិភូជាន់ខ្ពស់វៀតណាម។

ជាមួយគ្នានោះ លោកប្រធានរដ្ឋ ង្វៀន សួនហ៊្វុក បានទូលយាងព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា សម្តេចព្រះមហាក្សត្រី នរោត្តម មុនិនាថ សីហនុ និងអញ្ជើញថ្នាក់ដឹកនាំកម្ពុជា ដើម្បីបំពេញព្រះរាជទស្សនកិច្ច និងទស្សនកិច្ចនៅប្រទសវៀតណាម ហើយការយាងនេះ ត្រូវបានព្រះមហាក្សត្រ និងសម្តេចព្រះមហាក្សត្រី និងថ្នាក់ដឹកនាំកម្ពុជា បានសព្វព្រះរាជហឫទ័យទទួល និងឆ្លើយតប ដោយសេចក្តីសោមនស្សរីករាយ។ តែពេលវេលាជាក់លាក់ នឹងត្រូវរៀបចំដោយស្ថាប័នពាក់ព័ន្ធ តាម មធ្យោបាយការទូតក្នុងពេលវេលាសមស្របណាមួយ។

គួររំលឹកថា ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គធ្លាប់បានយាងបំពេញព្រះរាជទស្សនកិច្ចផ្លូវរដ្ឋនៅសាធារណរដ្ឋសង្គមនិយមវៀតណាមចុងក្រោយរយៈពេល៣ថ្ងៃ ដោយចាប់ពីថ្ងៃទី១៩ ដល់ថ្ងៃទី២១ ខែធ្នូ ឆ្នាំ២០១៨៕

ដោយ ៖ កោះកែវ