ពលរដ្ឋ ១៧០ គ្រួសារ រងគ្រោះជំនន់ទឹកភ្លៀង ទទួលអំណោយរាជរដ្ឋាភិបាល

ខេត្តរតនគិរី៖ លោក មួង ប៉ាង អភិបាលរងខេត្ត តំណាង លោក ញ៉ែម សំអឿន អភិបាលខេត្តរតនគិរី នៅព្រឹក ថ្ងៃទី២៣ ខែធ្នូ ឆ្នាំ២០២១ បាននាំយកអំណោយរបស់រាជរដ្ឋាភិបាល ផ្តល់តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ចែកជូនប្រជាពលរដ្ឋដែលមានជីវភាពខ្វះខាត និងទទួលរងគ្រោះដោយសារជំនន់ទឹកភ្លៀងនាពេលកន្លងមក នៅស្រុកតាវែង ចំនួន ១៧០ គ្រួសារ។

លោក មួង ប៉ាង បានបញ្ជាក់ថា រាជរដ្ឋាភិបាល ក្រោមការដឹកនាំរបស់សម្ដេចតេជោ ក្រុមការងាររាជរដ្ឋាភិបាល ចុះមូលដ្ឋានខេត្ត និងអាជ្ញាធរខេត្ត-ស្រុក ក្នុងអំឡុងពេលដែលបងប្អូនកំពុងតែជួបការលំបាកនៅពេលនេះ ថ្នាក់ដឹកនាំខិតខំ ចុះសាកសួរសុខទុក្ខ បងប្អូនគ្រប់ទីកន្លែង ទោះបីស្ថិតនៅក្នុងស្ថានភាពលំបាកយ៉ាងណាក៏ដោយ នៅតែត្រៀមចាំអន្តរាគមន៍ ជួយប្រជាពលរដ្ឋ គ្រប់ពេលវេលាជានិច្ច។

លោកអភិបាលរងខេត្ត បានក្រើនរំឭកបន្ថែមដល់ប្រជាពលរដ្ឋ ត្រូវចូលរួមថែរក្សាសុខភាពឱ្យបានល្អ តាមរយៈការ ហូបស្អាត ផឹកស្អាត រស់នៅស្អាត និងប្រកបដោយអនាម័យខ្ពស់។ ម្យ៉ាងទៀត ក៏ត្រូវប្រកាន់ខ្ជាប់នូវការអនុវត្តវិធានសុវត្ថិភាព និងគោលការណ៍ណែនាំ របស់ក្រសួងសុខាភិបាល ក្នុងការប្រយុទ្ធប្រឆាំងនឹងជំងឺកូវីដ-១៩។ 

លោកបានសំណូមពរ ដល់មាតាបិតា អាណាព្យាបាល សិស្សានុសិស្សទាំងអស់ ចូលរួមការពារ ទប់ស្កាត់ការចែកចាយ និងជួញដូរគ្រឿងញៀន នៅក្នុងមូលដ្ឋានរបស់ខ្លួន យើងត្រូវចាត់ទុកថា បញ្ហា គ្រឿងញៀន គឺជាភារកិច្ចរបស់យើងទាំងអស់គ្នា ដែលត្រូវរួមគ្នាទប់ស្កាត់មិនឱ្យមាននៅក្នុងភូមិ ក្នុងសហគមន៍។

គួរបញ្ជាក់ថា អំណោយដែលនាំមកជូនប្រជាពលរដ្ឋចំនួន ១៧០ គ្រួសារ នៅស្រុកតាវែង នាឱកាសនេះ ក្នុង១គ្រួសារ ទទួលបានអង្ករ ២៥ គីឡូ មី ១ កេស ត្រីខ ១ យួរ ឃីត ១ កញ្ចប់ និងអាវរងារជូនមនុស្សចាស់៕

អត្ថបទ៖ វុទ្ធឦសាន