រថយន្ដផលិត​នៅ​វៀតណាម​ ៥​គ្រឿង ប្រគល់​ដល់ក្រសួងមហាផ្ទៃកម្ពុជា

រថយន្ត ៥ គ្រឿង​ដែល​ផលិតនៅវៀតណាម​របស់ក្រុមហ៊ុន Vinfast រួមទាំង​ម៉ូតូ និង​សម្ភារៈពេទ្យ​​មួយ​ចំនួន​ទៀត ​បានប្រគល់​ឲ្យ​ក្រសួងមហាផ្ទៃកម្ពុជា​​ ដែលផ្តល់​ឲ្យ​តាម​រយៈ​ក្រសួងនគរបាលវៀតណាម។

ពិធីប្រគល់ និងទទួលសម្ភារៈ ក៏ដូចជាអំណោយខាងលើនេះ បានធ្វើឡើងនៅក្នុងជំនួបពិភាក្សាការងាររវាងសម្ដេចក្រឡាហោម ស ខេង ឧបនាយរដ្ឋមន្ដ្រី រដ្ឋមន្ដ្រីក្រសួងមហាផ្ទៃ ជាមួយលោកឧត្តមសេនីយ៍ឯក តូ ឡឹម រដ្ឋមន្ដ្រីក្រសួងនគរបាលនៃសាធារណរដ្ឋសង្គមនិយមវៀតណាម នៅបណ្ឌិត្យសភានគរបាលកម្ពុជា កាលពីថ្ងៃទី២២ ខែធ្នូ ឆ្នាំ​២០២១ ម្សិលមិញ។

ក្នុងកម្មវិធីប្រគល់សម្ភារៈ​របស់​ក្រសួងនគរបាល​វៀតណាមដែលមាន​រថយន្ដចំនួន៥គ្រឿង ម៉ូតូ និងសម្ភារពេទ្យសម្រាប់សង្គ្រោះបន្ទាន់មួយចំនួនទៀត លោកឧត្តមសេនីយ៍ឯក តូ ឡឹម រដ្ឋមន្ត្រីក្រសួងនគរបាលវៀតណាម ក៏បានគោរពអញ្ជើញសម្តេចក្រឡាហោម ស ខេង ទៅបំពេញទស្សនកិច្ចផ្លូវការនៅសាធារណរដ្ឋសង្គមនិយមវៀតណាមនៅឆ្នាំ២០២២ ខាងមុខ តាមពេលវេលាសមស្របផងដែរ។

នៅក្នុងកិច្ចពិភាក្សា និងប្រគល់ទទួលអំណោយនេះ សម្ដេចក្រឡាហោម ស ខេង ក៏បានអញ្ជើញលោកឧត្តមសេនីយ៍ឯក តូ ឡឹម ដើម្បីពិនិត្យ និងទស្សនាសាលមហាស្របរបស់បណ្ឌិត្យសភានគរបាលកម្ពុជា និងទស្សនាជុំវិញបរិវេណបណ្ឌិត្យ​សភា​នគរបាលកម្ពុជា ដើម្បីទស្សនាពីហ្វឹកហ្វឺនរបស់សិក្ខាកាមនគរបាល ដែលកំពុងសិក្សានៅបណ្ឌិត្យសភានគរបាលកម្ពុជា៕

អត្ថបទ៖ កោះកែវ