អគារ​មជ្ឈមណ្ឌល​ព្យាបាល​កម្ពស់​៥​ជាន់​តម្លៃ៨លានដុល្លារ​ នឹង​ដាក់​ប្រើ​ប្រាស់​នៅ​ខែ​មេសា​ឆ្នាំ​ក្រោយ​

អគារមជ្ឈមណ្ឌលព្យាបាលត្រចៀក ច្រមុះ និងបំពង់កមានកម្ពស់៥ជាន់ដែលមានទីតាំងស្ថិតនៅមន្ទីរពេទ្យព្រះអង្គឌួង ដែលជាជំនួយរបស់រដ្ឋាភិបាលកូរ៉េខាងត្បូង គ្រោងនឹងដាក់ឱ្យប្រើប្រាស់ជាផ្លូវការនៅខែមេសាឆ្នាំ២០២២ខាងមុខនេះ។

លោកសាស្ត្រាចារ្យ លូ លីឃាង នាយកមន្ទីរពេទ្យព្រះអង្គឌួងបានមានប្រសាសន៍នៅព្រឹកថ្ងៃទី២៤ធ្នូនេះថាអគារមជ្ឈមណ្ឌលព្យាបាលត្រចៀក ច្រមុះ និងបំពង់ក ដែលមានកម្ពស់ ៥ជាន់ នៅមន្ទីរពេទ្យព្រះអង្គឌួង បានចាប់ផ្តើមសាងសង់នៅខែមីនា ឆ្នាំ២០២០ហើយតាមផែនការគ្រោងបញ្ចប់នៅចុងឆ្នាំ២០២១ តែដោយសារការរាតត្បាតនៃជំងឺកូវីដ១៩ គម្រោងនេះបានពន្យាពេល ទៅដើមឆ្នាំ២០២២វិញ។

លោក នាយកមន្ទីរពេទ្យបានបន្តថាតាមអ្នកជំនាញការកូរ៉េអគារនេះគ្រោងនឹងដាក់ឱ្យដំណើរការជាផ្លូវការនៅក្នុងកំឡុងខែមេសាឆ្នាំ២០២២ខាងមុខនេះ។

លោក នាយកមន្ទីរពេទ្យ បានបន្ដទៀតថា អគារនេះគ្រោងចំណាយថវិកាសរុបប្រមាណ ៨លានដុល្លារអាមេរិក ដោយនឹងត្រូវបានបំពាក់សម្ភារទំនើបបំផុត និងចាំបាច់នានា ដើម្បីពិនិត្យព្យាបាល និងវះកាត់ ធ្វើយ៉ាងណាបង្កើនគុណភាពសេវាកម្ម ក្នុងមន្ទីពេទ្យព្រះអង្គឌួងឱ្យល្អប្រសើរមួយកម្រិតទៀត។

លោក នាយកមន្ទីរពេទ្យ បានបន្ថែមថា នៅពេលអគារនេះសាងសង់រួចរាល់ហើយនឹងជួយបំពេញការឆ្លើយតបទៅនឹងតម្រូវការរបស់ប្រជាពលរដ្ឋយើង កាន់តែល្អបន្ថែមទៀត ខណៈដែលមន្ទីរពេទ្យព្រះអង្គឌួងសព្វថ្ងៃនេះ ផ្ដល់សេវាថែទាំជំងឺជូនប្រជាពលរដ្ឋ មានចំនួនច្រើនក្នុងមួយថ្ងៃៗ ជាពិសេស កម្មករ កម្មការិនី។

លោកសាស្ត្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាលធ្លាប់បានលើកឡើងថា កន្លងមកនេះ ភាគីកូរ៉េ បានជួយឧបត្ថម្ភគាំទ្រ ថវិកា ក្នុងការជួយសាងសង់មន្ទីរពេទ្យ ដូចជាជួយសាងសង់មន្ទីរពេទ្យខេត្ដពោធិ៍សាត់, សាងសង់បន្ថែមនៅមន្ទីរពេទ្យខេត្ដបាត់ដំបង, និងអគារភ្នែកនៅមន្ទីរពេទ្យព្រះអង្គឌួងមានកម្ពស់៣ជាន់។ លើសពីនេះ បានជួយបណ្ដុះបណ្ដាលធនធានមនុស្សនៅក្នុងវិស័យសុខាភិបាលហើយក្នុងស្ថានភាពបច្ចុប្បន្នភាពការរាលត្បាតជំងឺកូវីដ១៩នេះ ភាគីកូរ៉េបានជួយគាំទ្រក្នុងការប្រយុទ្ធប្រឆាំងនឹងជំងឺកូវីដ១៩ ដោយផ្ដល់ជំនួយជាសម្ភារបរិក្ខារពេទ្យផងដែរ៕

អត្ថបទ៖ សំអឿន