ព័ត៌មានជាតិ

សម្ដេចតេជោ ហ៊ុន សែន អនុញ្ញាតឲ្យសិស្សដែលមានវិជ្ជមានកូវីដ១៩ អាចប្រលងបាន

បានផុស

៣ years មុន

នៅ

ថ្ងៃចន្ទ ២៧ ធ្នូ ២០២១

ដោយ

មានប្រសាសន៍នៅក្នុងពិធីអញ្ជើញទទួលវ៉ាក់សាំង Pfizer ដែលជាជំនួយរបស់រដ្ឋាភិបាលអូស្ត្រាលីចំនួន ៧៨៣,០០០ ដូស នៃជំនួយសរុបចំនួន ២,៣៥០,៥៣០ ដូស នៅព្រលានយន្តហោះអន្តរជាតិភ្នំពេញ នាព្រលប់ថ្ងៃអាទិត្យ ទី ២៦ ខែធ្នូ ឆ្នាំ ២០២១ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចអនុញ្ញាតឲ្យសិស្ស ដែលមានវិជ្ជមានកូវីដ១៩ អាចប្រឡងបាក់ឌុបបាន ដែលមុននេះក្រសួងអប់រំមិនអនុញ្ញាតឲ្យប្រឡង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចហ៊ុន សែន បានមានប្រសាសន៍ថា ថ្ងៃនេះសម្ដេចបានដោះស្រាយបញ្ហាមួយទាក់ទងទៅនឹងការប្រលងបាក់ឌុបនាឆ្នាំនេះ ដែលអ្នកនាំពាក្យក្រសួងអប់រំបានបញ្ជាក់ថា សិស្សដែលកើតកូវីដមិនអនុញ្ញាតឲ្យចូលប្រឡង។ ចំណុចនេះសម្ដចបានស្នើឲ្យធ្វើការកែតម្រូវ ហើយអនុញ្ញាតឲ្យមានការចូលប្រឡងបាន តែប្រឡងនៅមន្ទីរពេទ្យ។

សម្ដេចបានបញ្ជាក់ថា “ខ្ញុំបានស្នើឲ្យមានការកែតម្រូវហើយអនុញ្ញាតឲ្យមានការចូលប្រលង ក៏ប៉ុន្តែខ្ញុំក៏បានស្នើ កុំឲ្យយកវិទ្យាល័យបាក់ទូក ដែលមុននេះគ្រោងប្រលងនៅមណ្ឌលបាក់ទូកមានការស្លន់ស្លោ យើងមិនយកសិស្សទាំងពីររូប ដែលបានចេញទៅប្រកួតកីឡា ដោយមានការចាត់តាំងត្រឹមត្រូវពីក្រសួងអប់រំយុវជន និងកីឡា ទៅធ្វើការប្រឡងនៅវិទ្យាល័យបាក់ទូក មណ្ឌលប្រឡងបាក់ទូកនោះទេ ក៏ប៉ុន្តែយើងនឹងរៀបចំចាត់ចែងឱ្យមានការប្រឡងនៅនឹងមន្ទីរពេទ្យតែម្តង ដោយមានគ្រូពេទ្យដោយមានសាស្ត្រាចារ្យ ចូលទៅពិនិត្យមើល នៃការប្រឡងនោះ”។

សម្ដេចតេជោបានលើកឡើងទៀតថា ការកើនឡើងវិញ នៃការឆ្លង ចាប់ពី៤ ករណី ៥ ករណីឡើងដល់១៥ ករណី ដែលនឹងប្រកាសនៅថ្ងៃស្អែកនេះ គឺជាករណីឆ្លងនាំចូល ហើយជាករណីមេរោគ Omicron ដែលយើងកំពុងតែធ្វើការត្រួតត្រា ហើយសង្ឃឹមថា អូមីក្រុង នឹងមិនហៀចូលទៅក្នុងសហគមន៍ដូចដែលតា និងអាល់ហ្វានោះទេ។

សម្ដេចបានបញ្ជាក់ដែរថា ភាពជោគជ័យនៃការប្រយុទ្ធប្រឆាំងជំងឺ Covid-19 នៅកម្ពុជា មិនអាចសម្រេចបានឡើយ ប្រសិនបើមិនមានការចូលរួមជួយជ្រោម ជ្រែងពីសំណាក់ប្រជាជនកម្ពុជា ប្រទេសជាមិត្ត និងដៃគូអភិវឌ្ឍនានានោះទេ៕

អត្ថបទ៖ កោះកែវ