ខេត្តបាត់ដំបង មានបេក្ខជនជាង ៧ពាន់នាក់ បានចូលប្រឡងបាក់ឌុបនៅថ្ងៃនេះ

នៅថ្ងៃទី១ នៃការប្រឡងយកសញ្ញាបត្រមធ្យមសិក្សាទុតិយភូមិហៅថា បាក់ឌុប(BacII) ក្នុងឆ្នាំសិក្សា ២០២០-២០២១ មានបេក្ខជនចំនួន ៧,០៣៦ នាក់បានចូលប្រឡងនៅក្នុងខេត្តបាត់ដំបង។ លោក សុខ លូ អភិបាលខេត្តបាត់ដំបង បានចូលរួមពិនិត្យហិបវិញ្ញាសា និងការកាត់វិញ្ញាសានៅមណ្ឌលសាកលវិទ្យាល័យជាតិបាត់ដំបង ដើម្បីបញ្ជាក់ពីភាពត្រឹមត្រូវ មិនមានការបែកធ្លាយវិញ្ញាសាក្នុងការផ្តល់នូវភាពយុត្តិធម៌សម្រាប់បេក្ខជន បេក្ខនារី ដែលបានចូលប្រឡងនាថ្ងៃទី២៧ ខែធ្នូ ឆ្នាំ២០២១។

សូមបញ្ជាក់ថា សម្រាប់ខេត្តបាត់ដំបងក្នុងឆ្នាំសិក្សា ២០២០-២០២១ មានមណ្ឌលប្រឡង ១០ មណ្ឌល​ស្ថិតក្នុងក្រុងបាត់ដំបង និង ១មណ្ឌលក្នុងស្រុកសង្កែ។ សម្រាប់មណ្ឌលវិទ្យាសាស្ត្រពិតវិញ មាន៥មណ្ឌល និងវិទ្យាសាស្ត្រសង្គមមាន ៥មណ្ឌល។ នៅមុនពេលបេក្ខជនចូលបន្ទប់ប្រឡង ក្រុមអនុរក្សបានឆែករកសំណៅឯកសារ និងឧបករណ៍អេឡិចត្រូនិកគ្រប់ប្រភេទមុនឱ្យចូលក្នុងមណ្ឌលប្រឡង ពោល គឺមិនខុសពីឆ្នាំមុនៗនោះទេ ទោះស្ថិតក្នុងបរិបទកូវីដ-១៩ ក៏ដោយ គ្រាន់តែត្រូវរក្សាគម្លាត និងមានការវាស់កម្តៅឱ្យបានត្រឹមត្រូវប៉ុណ្ណោះ៕

អត្ថបទ ៖ ណារី