ឃាត់ខ្លួន​ពលករខ្មែរ​ និងមេខ្យល់​ជាង​ ៥០ នាក់​ បម្រុង​ឆ្លងចូល​ទឹកដីថៃ​

ពលករចំនួន ៥០នាក់ រួមនិងមេខ្យល់ ៣នាក់ ត្រូវបានកម្លាំងចម្រុះឃាត់ខ្លួននៅតាមខ្សែបន្ទាត់ព្រំដែន ខណ:ដែលពួកគេត្រៀមបម្រុងឆ្លងដែនចូលទឹកដីថៃដោយគ្មានច្បាប់អនុញ្ញាត។

ដោយអនុវត្តតាមបទបញ្ជារបស់លោកឧត្តមសេនីយ៍ទោ​ សាត​ គឹមសាន​ ស្នងការ នៃស្នងការដ្ឋាននគរបាលខេត្តបាត់ដំបង កម្លាំងប៉ុស្តិ៍ព្រំដែនគីឡូ៩ សហការជាមួយកម្លាំងយោធាផ្នែកសឹករងសំពៅលូន នៅវេលាម៉ោង ៤៖៣០ នាទីទៀបភ្លឺ នាថ្ងៃទី ២៧ ខែធ្នូ ឆ្នាំ២០២១ បានធ្វើសកម្មភាពទប់ស្កាត់ប្រជាពលរដ្ឋបម្រុងលួចឆ្លងដែនចូលទឹកដីថៃ ត្រង់ចំណុច ភូមិសាស្ត្រភូមិ ស្ពានយោល ឃុំជ្រៃសីមា ស្រុកសំពៅលូន ខេត្តបាត់ដំបង។

នៅក្នុងកិច្ចប្រតិបត្តិការនេះ កម្លាំងបានឃាត់មនុស្ស ចំនួន ៥០នាក់ ស្រី ១៤នាក់ ក្មេង១៤នាក់ ក្នុងនោះសមត្ថកិច្ចឃាត់ខ្លួន​ជនសង្ស័យជាអ្នកនាំផ្លូវចំនួន០២នាក់ និងអ្នកបើកបររថយន្ត០១នាក់ ដែលពួកគេមានឈ្មោះ ១-ឈ្មោះ កូ សុថាត ភេទស្រី អាយុ ៣៤ឆ្នាំ មានទីលំនៅភូមិត្រពាំងព្រលិត ឃុំសន្តិភាព ស្រុកសំពៅលូន (ជាអ្នកនាំផ្លូវ) ២-ឈ្មោះ អឹម សុខមុល ភេទប្រុស អាយុ ៣៣ ឆ្នាំ មានទីលំនៅភូមិភ្នៅ ឃុំស្នាមព្រះ ស្រុកបាកាន ខេត្តពោធិ៍សាត់ (ជាអ្នកបើកបររថយន្ត) ៣-ឈ្មោះ លៀង ចិន្ដា ភេទប្រុស អាយុ ៣៦ឆ្នាំ មានទីលំនៅភូមិត្រពាំងព្រលិត ឃុំសន្តិភាព ស្រុកសំពៅលូន (ជាអ្នកនាំផ្លូវ បានរត់គេចខ្លួនបាត់)។

សមត្ថកិច្ចធ្វើការដកហូតវត្ដុតាងរួមមាន ម៉ូតូ១គ្រឿង ម៉ាកHONDA ពណ៌ខ្មៅ និងរថយន្ដ១គ្រឿង ម៉ាកHYUNDAI ពណ៌ស។

ក្រោយពីឃាត់ខ្លួន និងបានធ្វើការសាកសួរចុះកំណត់ហេតុ និងអប់រំណែនាំរួចបានប្រគល់ប្រជាពលរដ្ឋទាំង ៥០នាក់ ព្រមទាំងវត្ដុតាងទាំងអស់ឱយទៅកម្លាំងជំនាញនៃអធិការដ្ឋាននគរបាលស្រុកសំពៅលូនចាត់ការបន្តតាមនីតិវិធី៕

អត្ថបទៈ សោ និយមរ័ត្ន