អ្នកនាំពាក្យក្រសួងអប់រំ ឆ្លើយតបជុំវិញការប្រឡងបាក់ឌុប

លោក រស់ សុវាចា អ្នកនាំពាក្យក្រសួងអប់រំយុវជន និងកីឡា បានថ្លែងថា នៅចំពោះមុខនេះ ការប្រឡងបាក់ឌុប នឹងត្រូវធ្វើឡើងនៅពាក់កណ្តាលខែមករា ២០២១។ ការបញ្ជាក់របស់អ្នកនាំពាក្យក្រសួងអប់រំយុវជន និងកីឡា បានធ្វើឡើងបន្ទាប់ពីសមាគមគ្រឹះស្ថានឧត្តមសិក្សា បានស្នើសុំឲ្យបេក្ខជនប្រឡងបាក់ឌុប ដែលត្រូវប្រឡងនាពេលខាងមុខឲ្យជាប់ដោយស្វ័យប្រវត្តិ។

លោក រស់ សុវាចា បានមានប្រសាសន៍លើកឡើងថា «បើមានការប្រែប្រួល នៃការប្រឡងបាក់ឌុប ក្រសួងអប់រំ យុវជន និងកីឡា នឹងជម្រាបជូននាពេលសមស្រប។ លោកថា ក្រសួងអប់រំ យុវជន និងកីឡា បន្តតាមដានស្ថានការណ៍ កូវីដ-១៩ជាប្រចាំ»។ លោកបានបន្តទៀតថា ការដែលក្រសួងអប់រំយុវជន និងកីឡា សម្រេចពន្យាពេលការប្រឡងមធ្យមសិក្សាទុតិយភូមិ ឬបាក់ឌុប ដែលគ្រោងធ្វើនៅថ្ងៃទី២១និង២២ ខែធ្នូ ទៅធ្វើនៅពាក់កណ្តាលខែមករា ឆ្នាំ២០២១ គឺដោយសារស្ថានភាពមិនទាន់ច្បាស់លាស់ នៃផលប៉ះពាល់នៃព្រឹត្តិការណ៍សហគមន៍២៨វិច្ឆិកា។

លោក ហេង វ៉ាន់ដា ប្រធាន សមាគមគ្រឹះស្ថានឧត្តមសិក្សា បានមានប្រសាសន៍នៅព្រឹកថ្ងៃទី៨ ខែធ្នូនេះថា ដោយស្នើឲ្យក្រសួងអប់រំយុវជន និងកីឡា រក្សាការប្រឡងបាក់ឌុប នៅថ្ងៃទី២១ និង២២ ខែធ្នូ ដដែល។ ប៉ុន្តែក្នុងករណីប្រឡងមិនបានតាមកាលបរិច្ឆេទទេ ស្នើសុំឲ្យជាប់ដោយស្វ័យប្រវត្តិ ឬយកពិន្ទុមធ្យមថ្នាក់ទី១២ ដើម្បីកំណត់ជាប់ ឬធ្លាក់តែម្តង។

គួរបញ្ជាក់ថា ប្រឡងបាក់ឌុបនៅឆ្នាំនេះ មានបេក្ខជនដាក់ពាក្យប្រឡង ចំនួ១២១២០១នាក់ ក្នុងនោះបេក្ខនារី មានចំនួន៦៣៩៣៧នាក់ និងបុរស មានចំនួន៥៧២៦៤នាក់៕

អត្ថបទ ៖ សំអឿន