នាយឧត្តមសេនីយ៍ផ្កាយមាស៥៖ «ឥឡូវនេះ នាយទាហានរបស់យើងគ្រាន់តែដុះក្បាលពោះ ប្រហែលជាង៥០%ហើយ»

ពីវេទិកាសម្ពោធដាក់ឲ្យប្រើប្រាស់ជាផ្លូវការនូវអគាររដ្ឋបាល និងសាលប្រជុំទីស្តីការក្រសួងការពាជាតិថ្មីនៅព្រឹកថ្ងៃទី២៩ ខែធ្នូ ឆ្នាំ២០២១នេះ សម្តេចតេជោ ហ៊ុន សែន នាយឧត្តមសេនីយ៍ផុតលេខ ផ្កាយមាស៥ និងជានាយករដ្ឋមន្ត្រីនៃកម្ពុជា បានលើកឡើងថា នាយទាហានរបស់កម្ពុជាប្រមាណជាង៥០ភាគរយហើយ បាន«ដុះក្បាលពោះ»។ ប៉ុន្តែ សម្តេចថា ការដុះក្បាលពោះនេះ មិនថា សម្តេច ឬអ្នកផ្សេងទេ គឺអាស្រ័យដោយសារតែវ័យ។

សម្តេចតេជោ បានមានប្រសាសន៍បែបលេងសើចថា សូម្បីតែសម្តេចផ្ទាល់ក៏ឡើងគីឡូមិនតិចដែរនាពេលនេះ ដោយសម្តេចមិនអាចស្លៀកខោ ដោយមិន​ប្រើប្រាស់ខ្សែក្រវាត់បានឡើយ។ ប៉ុន្តែ យ៉ាងណាក៏ដោយ សម្តេច បានប្រាប់ឲ្យកងទ័ពទាំងអស់បន្តហ្វឹកហ្វឺនជាប្រចាំ និងបានប្រាប់ឲ្យក្រសួងការពារជាតិបន្តធ្វើការកែទម្រង់លើវិស័យការពារជាតិកម្ពុជា។

ជាមួយគ្នានេះ សម្តេចតេជោ នាយករដ្ឋមន្រ្តី ក៏បានរំលឹកឲ្យកងទ័ពទាំងអស់ដឹងច្បាស់ពីនាទីរបស់ខ្លួន ដែលជាអ្នកការពារជាតិ និងការពារទឹកដី។ សម្តេចតេជោ ក៏បានចង្អុលប្រាប់កងទ័ពកម្ពុជាថា កម្ពុជា ជាប្រទេសប្រកាន់របបរាជានិយមអាស្រ័យរដ្ឋធម្មនុញ្ញ។ ដូច្នេះហើយ ពួកគេត្រូវការពាររាជរដ្ឋាភិបាល ព្រះមហាក្សត្រ និងរដ្ឋធម្មនុញ្ញកម្ពុជា។ មិនតែប៉ុណ្ណោះ កងទ័ពទាំងអស់មិនអាចអព្យាក្រិតរវាងរាជរដ្ឋាភិបាល និងបណ្តាគណបក្សនយោបាយបានទេ។ ប៉ុន្តែ អាចអព្យាក្រិតបានរវាងគណបក្សនយោបាយ និងគណបក្សនយោបាយ៕

អត្ថបទ ៖ វណ្ណ សុគន្ធា