មិនទាន់កំណត់ពេល ចាក់វ៉ាក់សាំងដូសទី ៤ ដល់មន្ត្រីជួរមុខនៅឡើយទេ

រហូតមកដល់ពេលនេះ ប្រទេសកម្ពុជានូវមិនទាន់បានកំណត់ពេលវេលា ក្នុងការចាក់វ៉ាក់សាំងដូសទី ៤ ដល់មន្ត្រីជួរមុខនៅឡើយទេ ខណៈបច្ចុប្បន្នកំពុងមមារញឹក រៀបចំចាក់ដូសជំរុញឬដូសទី ៣ ដល់ប្រជាពលរដ្ឋចាប់ពីអាយុ ១៨ឆ្នាំឡើងទៅ និងកុមារ-យុវវ័យ អាយុ ១២ឆ្នាំ ដល់ក្រោម ១៨ឆ្នាំ ចាប់ពីថ្ងៃទី ៣ ខែមករា ឆ្នាំ២០២២ខាងមុខ។

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាល និងជាប្រធានគណៈកម្មការចំពោះកិច្ច ចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានមានប្រសាសន៍ នៅរសៀលថ្ងៃទី២៩ ខែធ្នូនេះថា ចំពោះការចាក់ដូសទី ៤ ដល់មន្ត្រីជួរមុខនូវមិនទាន់កំណត់ពេលវេលា នៅឡើយទេ។

សូមជម្រាបថា រាជរដ្ឋាភិបាល នឹងប្រើប្រាស់វ៉ាក់សាំង Pfizer ចំនួន ២.៣៥លានដូស ដែលជាជំនួយរបស់រដ្ឋាភិ បាលអូស្ត្រាលី សម្រាប់ចាក់ដូសទី ៤ដល់មន្ត្រីជួរមុខ។ ថ្លែងក្នុងពិធីប្រគល់ និងទទួលវ៉ាក់សាំង Pfizer ចំនួន២.៣៥ លានដូស កាលពីយប់ថ្ងៃទី ២៦ ខែធ្នូ ឆ្នាំ ២០២១កន្លងទៅ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា វ៉ាក់សាំង​ Pfizer ដែលផ្តល់ដោយប្រទេសអូស្ត្រាលី នឹងប្រើប្រាស់ជាដូសទី ៤ ចាក់ឲ្យអ្នកជួរមុខ។ សម្តេច បានណែនាំឲ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក អូន ព័ន្ធមុនីរ័ត្ន ប្រធានគណៈប្រចាំការ នៃគណ:កម្មការជាតិប្រយុទ្ធ នឹងជំងឺកូវីដ-១៩ សិក្សាករណីនេះ អំពីលទ្ធភាពក្នុងការចាក់ដូសទី ៤ ដល់អ្នកជួរមុខ។

គួរបញ្ជាក់ថា គិតត្រឹមថ្ងៃទី ២៨ ខែឆ្នូ ឆ្នាំ ២០២១ កំណើនអត្រាចាក់វ៉ាក់សាំងកូវីដ-១៩ នៅកម្ពុជា  លើប្រជាជនអាយុពី ១៨ឆ្នាំឡើង មាន ១០១,៤៦% ធៀបជាមួយចំនួនប្រជាជនគោលដៅ ១០លាននាក់។ ការចាក់លើកុមារ-យុវវ័យ អាយុពី ១២ឆ្នាំ ទៅក្រោម ១៨ឆ្នាំ មាន ៩៩,០៨% ធៀបជាមួយចំនួនប្រជាជនគោលដៅ ១,៨២៧,៣៤៨ នាក់។ ការចាក់លើកុមារអាយុពី ៦ឆ្នាំ ដល់ក្រោម ១២ឆ្នាំ មាន ១០៥,១៥% ធៀបជាមួយនឹងប្រជាជនគោលដៅ ១,៨៩៧, ៣៨២ នាក់។ ការចាក់លើកុមារអាយុ ៥ឆ្នាំ មាន ៩៩,០២% ធៀបជាមួយនឹងប្រជាជនគោលដៅ ៣០៤,៣១៧ នាក់ និងលទ្ធផលចាក់វ៉ាក់សាំងធៀប នឹងចំនួនប្រជាជនសរុប ១៦លាននាក់ មាន ៨៩,០៨%៕

អត្ថបទ៖ សំអឿន