១២ខែឆ្នាំនេះក្រុម​បឹ្រក្សា​អភិវឌ្ឍន៍​កម្ពុជាអនុម័តគម្រោងវិនិយោគ ១៦១ មានទំហំទឹកប្រាក់ជិត ៤ពាន់លានដុល្លារ

ក្រុម​បឹ្រក្សា​អភិវឌ្ឍន៍​កម្ពុជា(CDC)​ បាន​អនុម័តលើ​គម្រោង​វិនិយោគ​សរុប​ចំនួន​១៦១គម្រោង​ ដោយ​គិត​ជា​ទំហំទឹក​ប្រាក់​ប្រមាណ​ជិត៤ពាន់​លាន​ដុល្លារ​អាមេរិក រយៈពេល ១២ខែ ឆ្នាំ ២០២១ គឺធ្លាក់​ចុះចំនួន ៧៧គម្រោង​ បើធៀប​ទៅនឹងរយៈពេលដូចគ្នាកាលពី​ឆ្នាំ​២០២០​។ គម្រោងវិនិយោគនេះ អាចបង្កើតការងារដល់ប្រជាពលរដ្ឋសរុបចំនួន១០៩,៤១៣កន្លែង។

កាលពីឆ្នាំ២០២០ មានគម្រោងវិនិយោគចំនួន២៣៨គម្រោង ក្នុងនោះ ទំហំទុនវិនិយោគមានចំនួន ៨​,២ពាន់លានដុល្លារ។

បើតាមក្រុមប្រឹក្សាអភិវឌ្ឍន៍កម្ពុជា គម្រោងដែលបានអនុម័តរួចនោះ គឺការវិនិយោគនៅក្រៅតំបន់សេដ្ឋកិច្ចពិសេសមានចំនួន ១២៥គម្រោង សរុបទុនវិនិយោគចំនួន ១.៩៧ពាន់លានដុល្លារ និងនៅក្នុងតំបន់សេដ្ឋកិច្ចពិសេស មានចំនួន ៣៦គម្រោង សរុបទុនវិនិយោគជាង ១.៩៨ពាន់លានដុល្លារ។ ក្នុងនោះ គម្រោងវិនិយោគលើផ្នែកកសិកម្ម និងកសិឧស្សាហកម្មមានចំនួន១៤គម្រោង, គម្រោងវិនិយោគលើផ្នែកឧស្សាហកម្មមានចំនួន១៣៥គម្រោង, គម្រោងវិនិយោគលើផ្នែកទេសចរណ៍មានចំនួន២គម្រោង និងហេដ្ឋារចនាសម្ព័ន្ធ និងផ្សេងៗទៀតមានចំនួន១០គម្រោង។

គណៈកម្មាធិការវិនិយោគកម្ពុជា និងគណៈកម្មាធិការតំបន់​សេដ្ឋកិច្ចពិសេសកម្ពុជាបានបញ្ជាក់ថា នៅឆ្នាំ ២០២០ គម្រោងវិនិយោគ​ចំនួន ២៣៨គម្រោងនេះ គឺថយចុះប្រមាណ ១២% ធៀប ឆ្នាំ២០១៩៕