ភ្ញៀវសម្រុកកក់តង់ តាម​រមណីយដ្ឋាន​​នៅ​ខេត្ត​បាត់ដំបង

ខេត្តបាត់ដំបង÷ រមណីយដ្ឋានទេសចរណ៍ជាគោលដៅទេសចរណ៍នៅក្នុងខេត្តបាត់ដំបងមានចំនួន២៣រួមមាន រមណីយដ្ឋានប្រាសាទបាណន់ រមណីយដ្ឋានភ្នំសំពៅ ប្រាសាទឯកភ្នំ អាងទឹកកំពីងពួយ ទឹកធ្លាក់៥៣ភ្នំព្រឹក រមណីយដ្ឋាននគរជុំភ្នំព្រឹក រមណីយដ្ឋានភ្នំកំពូល រមណីយដ្ឋានវាលចម្បាំងខេមសាយ សហគមន៍អេកូទេសចរណ៍ទឹកធ្លាក់អូរជាំ និង​សហគមន៍​អេកូទេសចរណ៍ព្រែកទាល់ជាដើម។

លោកអ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបងបានប្រាប់ឲ្យដឹងនៅថ្ងៃទី៣១ខែធ្នូឆ្នាំ២០២១នេះថា ក្នុងឱកាសថ្ងៃសម្រាក​ឆ្លងឆ្នាំសកល នៅតាមបណ្តារមណីយដ្ឋានទេសចរណ៍​ធំតូចមួយចំនួនក្នុងខេត្ត​ត្រូវបានភ្ញៀវក្នុងស្រុកនាំគ្នាសម្រុកកក់តង់ចាប់តាំងពី២សប្តាហ៍មុនមកម៉្លេះ។

ក្នុងចំណោមរមណីយដ្ឋានទេសចរណ៍ទាំង ២៣ កន្លែង មានរមណីយដ្ឋានចំនួន០៦កន្លែងរួមមាន រមណីយដ្ឋានចំការស្វាយ រមណីយដ្ឋានស្ទឹងថ្មដាចំការធុរេន រមណីយដ្ឋានចំការធុរេនអូរតង រមណីយដ្ឋានខេមសាយ សហគមន៍អេកូទេសចរណ៍ទឹកធ្លាក់អូរជាំ និងសហគមន៍អេកូទេសចរណ៍ព្រែកទាល់ ដែល​ទទួល​ភ្ញៀវសម្រាកកម្សាន្តបោះតង់។

លោកអ៊ុច អ៊ុំភីនីស្សារ៉ាបានបញ្ជាក់ដែរថា ភ្ញៀវទេសចរចាប់ផ្តើម​ដើរកម្សាន្ត​តាមគោលដៅទេសចរណ៍ទូទាំងខេត្ត បន្ទាប់​ពី​កូវីដ​មានសភាពស្ងប់ស្ងាត់។ បើទោះបីជាបែបនេះ លោកក៏ទទួចសំណូមពរដល់គ្រប់អ្នកទេសចរទាំងអស់ត្រូវប្រកាន់ខ្ជាប់នូវ​វិធានការការពារ៣កុំ៣ការពារឲ្យបានល្អដើម្បីសុវត្ថិភាពនិងក្តីសុខសាន្ត៕

អត្ថបទ៖​ សៅ សារិទ្ធ