ភ្ញៀវទេសចរច្រើនកុះករបោះតង់លើឆ្នេរសមុទ្រក្រុងព្រះសីហនុត្រៀមឆ្លងឆ្នាំសកល

ទិដ្ឋភាពនៅលើឆ្នេរសមុទ្រក្រុងព្រះសីហនុ ពោរពេញទៅដោយភ្ញៀវទេសចរកម្សាន្ត និងបានចាប់កន្លែងបោះតង់ក្រាលកន្ទេលរួចជាស្រេច ដើម្បីត្រៀមខ្លួនឆ្លងឆ្នាំសកល ២០២២ នៅយប់នេះ។

រដ្ឋបាលខេត្តព្រះសីហនុ បានដាក់ចេញនូវវិធានការមួយចំនួន ដោយកម្លាំងមានសមត្ថកិច្ចក្រុង ស្រុក និងស្នាក់ការសន្តិសុខ ចេញល្បាតឈរជើងតាមគោលដៅសំខាន់ៗ ក្នុងភូមិសាស្ត្រទទួលខុសត្រូវ ក្នុងឱកាសថ្ងៃឆ្លងឆ្នាំថ្មី ឆ្នាំសកល២០២២ ដើម្បីការពារសន្តិសុខ រក្សាសុវត្ថិភាព សណ្ដាប់ធ្នាប់ សាធារណៈ ជូនដល់ប្រជាពលរដ្ឋ ភ្ញៀវទេសចរណ៍ជាតិ-អន្តរជាតិ ក្នុងភូមិសាស្ត្រខេត្តព្រះសីហនុ។

មន្រ្តីជាន់ខ្ពស់ក្រសួងទេសចរណ៍ បានលើកឡើងថា ក្រសួងនឹងរៀបចំកន្លែងបោះតង់បន្ថែមទៀត ​សម្រាប់ទទួលភ្ញៀវទេសចរ ប្រសិនបើចំនួនបន្ទប់ស្នាក់នៅមិនអាចផ្គត់ផ្គង់បានគ្រប់តម្រូវការ។ លើសពីនេះទៀត ក្រសួងអះអាងថា នឹងពិនិត្យតាមដានទៅលើផ្នែកសេវាកម្ម បដិសណ្ឋារកិច្ច ជាពិសេសតម្លៃម្ហូបអាហារនៅតាមតំបន់កម្សាន្តនានា។

កំណើន​ភ្ញៀវទេសចរ​ ​កើន​ឡើង​ខ្ពស់​នាថ្ងៃ​ឆ្លង​ឆ្នាំនេះ ខណៈ​អត្រានៃ​ការ​កក់​បន្ទប់​ស្នាក់​នៅក្នុង​សណ្ឋាគារ​ ផ្ទះ​សំណាក់​នៅតាម​បណ្តាខេត្ត​គោលដៅ​ទេសចរណ៍​ធំៗ​មួយ​ចំនួន​បាន​បន្ត​កើន​ឡើង​ជាលំដាប់។​ ភ្ញៀវទេសចរណ៍ភាគច្រើន បានទៅដល់គោលដៅដើម្បីត្រៀមឆ្លងឆ្នាំយប់នេះ និងមួយចំនួនទៀត ត្រៀមរៀបចំចេញដំណើរកម្សាន្តនៅថ្ងៃទី០១ ខែ មករា ឆ្នាំ ២០២២។

យោងតាមរបាយការណ៍របស់ក្រសួងទេសចរណ៍ បានបង្ហាញថា ចំនួនភ្ញៀវទេសចរដែលបានដើរលេងកម្សាន្តក្នុងសប្តាហ៍ទី៤ បើធៀបទៅនឹងសប្តាហ៍ទី៣ក្នុងខេធ្នូ គឺបរិមាណភ្ញៀវទេសចរបន្តកើនឡើងចំនួន ២៤.៧%។ ក្នុងនោះ គោលដៅទេសចរណ៍សំខាន់ៗ រួមមាន៖ រាជធានីភ្នំពេញមានភ្ញៀវទេសចរដើរលេងកម្សាន្តប្រមាណជាង ៥ម៉ឺន៥ពាន់នាក់, ខេត្តព្រះសីហនុប្រមាណ ៤ម៉ឺន៥ពាន់នាក់, ខេត្តសៀមរាបជាង២ម៉ឺន៥ពាន់នាក់, ខេត្តពោធិ៍សាត់ជាង ២ម៉ឺន៣ពាន់នាក់, ខេត្តកំពតជាង ២ម៉ឺន១ពាន់នាក់, ខេត្តបាត់ដំបងជាង ១ម៉ឺន៣ពាន់នាក់ និងខេត្តមណ្ឌលគិរីជាង ១ម៉ឺន១ពាន់នាក់៕ ទួន សុផល