ក្រសួងការងារបង្គាប់ឲ្យក្រុមហ៊ុនណាហ្កាវើលដ៍បើកប្រាក់បំណាច់បញ្ចប់កិច្ចសន្យាត្រឹមត្រូវឲ្យបុគ្គលិក

ក្រសួងការងារ និងបណ្តុះបណ្តាលវិជ្ជាជីវៈ បានជូនដំណឹងដល់អតីតបុគ្គលិកក្រុមហ៊ុនណាហ្កាវើលដ៍ លីមីធីត ដែលកំពុងធ្វើការដោយលើកមូលហេតុថា និយោជកមិនទូទាត់ប្រាក់បំណាច់បញ្ចប់កិច្ចសន្យាការងារដល់ខ្លួនមិនបានត្រឹមត្រូវតាមច្បាប់ ឲ្យទៅក្រសួងការងារចាប់ពីថ្ងៃទី ០៣ ខែមករា ឆ្នាំ ២០២២តទៅ ដោយផ្តល់ព័ត៌មានអំពីប្រាក់ឈ្នួល ប្រាក់អត្ថប្រយោជន៍ ដែលខ្លួនធ្លាប់ទទួលបាន រូបមន្តគណនា និងមូលដ្ឋានគណនា ដែលខ្លួនចង់បាន ដើម្បីក្រសួងធ្វើការផ្ទៀងផ្ទាត់ឡើងវិញ។
តាមរយៈសេចក្តីជូនដំណឹងរបស់ក្រសួងការងារ នៅថ្ងៃទី ០២ ខែមករា បានឲ្យដឹងថា ក្រសួងនឹងបង្គាប់ឲ្យនិយោជកធ្វើការទូទាត់សំណង​បន្ថែមដល់បុគ្គលិក ក្នុងករណីដែលក្រសួងទទួលបានព័ត៌មានពេញលេញ ហើយរកឃើញថា មានភាពលម្អៀងក្នុងការគណនាពិតប្រាកដមែន។

ជាមួយគ្នានេះ ក្រសួងការបានអំពាវនាវដល់អតីតបុគ្គលិក្រុមហ៊ុនណាហ្កាវើលដ៍ដែលកំពុងធ្វើការតវ៉ាទាំងអស់ វិលមកអនុវត្តឲ្យបានត្រឹមត្រូវតាមនិតិវិធីនៃការដោះស្រាយវិវាទការងាររួមវិញ ស្របតាមស្មារតីមាត្រា ៣០២ ដល់មាត្រា ៣១៧ នៃច្បាប់ស្តីពីការងារ និងប្រកាសលេខ ៣១៧ សកបយ. ចុះថ្ងៃទី ២៩ វិច្ឆិកា ឆ្នាំ ២០០១ ស្តីពីនិតិវិធីនៃការដោះស្រាយវិវាទការងាររួម ដែលបានកំណត់និតិវិធីបន្ត គឺត្រូវប្តឹងទៅតុលាការដើម្បីបញ្ចប់វិវាទ ក្រោយពេលការផ្សះផ្សា ការចេញសេចក្តីបង្គាប់របស់ក្រុមប្រឹក្សាអាជ្ញាកណ្តាល និងការអនុវត្តវិធានការវិវាទ ត្រូវបានតុលាចេញដីកាសម្រេចចាត់ចែងតាមបណ្តោះអាសន្នលេខ ៥២៤ “ត” ដ.រ ចុះថ្ងៃទី ១៦ ខែធ្នូ ឆ្នាំ ២០២១ របស់សាលាដំបូងរាជធានីភ្នំពេញ ដោយបានកំណត់គុណវុឌ្ឍថា ជាកូដកម្មខុសច្បាប់ និងត្រូវចាត់ទុកថា ជាកំហុសធ្ងន់។

គិតត្រឹមថ្ងៃនេះ អតីតបុគ្គលិកក្រុមហ៊ុនណាហ្កាវើលដ៍ប្រមាណជាង ២០០នាក់ ធ្វើកូវដកម្មអស់រយៈពេលជាង ១០ថ្ងៃហើយ  ដើម្បីទាមទារចូលបំពេញការងារជាធម្មតាវិញ ខណៈដែលកម្មករជាង១០០នាក់ទៀត ស្ម័គ្រទទួលយកការបញ្ឈប់ ប្រសិនបើភាគីនិយោជកទូទាត់ប្រាក់សំណងបានត្រឹមត្រូវ។

ពាក់ព័ន្ធនឹងវិវាទនេះ ក្រសួងការងារក្នុងនាមជាអ្នកផ្សះផ្សា ក៏បានសន្យាព្យាយាមសម្របសម្រួលរកដំណោះស្រាយជាបន្តបន្ទាប់ ដើម្បីតម្កល់ប្រយោជន៍ទាំងភាគីកម្មករ និងភាគីនិយោជក៕ ទួន សុផល