ស្វាយរៀងមិនសូវមានភ្ញៀវទេសចរ ខណៈថ្ងៃឆ្លងឆ្នាំសកលមានមនុស្សតែជាង ២៥០០នាក់ប៉ុណ្ណោះដើរកម្សាន្ត​ក្នុងខេត្ត

 (ខេត្តស្វាយរៀង)៖ ខេត្តស្វាយរៀងមានភ្ញៀវទេសចរ ដែលមកកម្សាន្តតាមរមណីយដ្ឋាននានា នៅក្នុងខេត្ត មានចំនួនសរុបត្រឹមតែ ២,៥១៨នាក់ នៅក្នុងថ្ងៃឆ្លងឆ្នាំសកល ឆ្នាំ២០២២កន្លងទៅនេះ។

លោក វ៉ាន់ សារ៉ាត់ ប្រធានមន្ទីរទេសចរណ៍ខេត្តស្វាយរៀង បានឲ្យដឹងថា ភ្ញៀវទេសចរដែលបានមកកម្សាន្ត នៅតាមរមណីយដ្ឋាន ច្រាំងទន្លេវ៉ៃគោ ក្នុងក្រុងស្វាយរៀង មានចំនួន ២,៥១៨នាក់, ស្រី១,១៤៧នាក់។  ក្នុងនោះ រមណីយដ្ឋានប្រាសាទបាសាក់ ប្រហែល៥០នាក់ ស្រី២៧នាក់ប៉ុណ្ណោះ។

លោក វ៉ាន់ សារ៉ាត់ បានបញ្ជាក់ថា ក្នុងឱកាសបុណ្យចូលឆ្នាំសកល មន្ទីរទេសចរណ៍បានសហការ ជាមួយអាជ្ញាធរដែនដីផ្សព្វផ្សាយអំពីវិធានការ បង្ការទប់ស្កាត់នៃជំងឺកូវីដ-១៩ និងបាញ់ទឹកអាកុល ជូនភ្ញៀវដែលមកទស្សនា ក្នុងនោះគណៈបញ្ជាការឯកភាពខេត្ត បានដាក់ចេញវិធានការការពារ សន្តិសុខសណ្តាប់ធ្នាប់ សាធារណៈជូនប្រជាពលរដ្ឋ ក៏ដូចជាភ្ញៀវទេសចរ ដោយមានកម្លាំងសមត្ថកិច្ច ធ្វើការចេញល្បាត និងឈរជើងនៅតាមចំណុចគោលដៅ សំខាន់ៗ ដើម្បីធានាសុវត្ថិភាពនៅទីសាធារណៈនានា ជូនដល់ប្រជាពលរដ្ឋ និងភ្ញៀវទេសចរក្នុងភូមិសាស្ត្រខេត្តស្វាយរៀង ប្រកបដោយសុវត្ថិភាព។

សូមបញ្ជាក់ថា នៅក្នុងខេត្តស្វាយរៀង ពុំសូវមានមនុស្សច្រើនដើរកម្សាន្តនោះទេ ភាគច្រើនពួកគេរៀបចំកម្មវិធីជួបជុំនៅផ្ទះរៀងៗខ្លួន។ ហើយមួយចំនួនទៀត ចេញទៅកម្សាន្តនៅតាមបណ្តាខេត្តគោលដៅផ្សេងៗដូចជា ខេត្តព្រះសីហនុ, កែប, កោះកុង, សៀមរាប, រតនគិរី, និងមណ្ឌលគិរី ជាដើម៕ ដោយ:ភក្ដី