ទំនាស់ដីធ្លីនៅ​ខេត្ត​បាត់ដំបង​​ សល់​ជាង ៣ ពាន់ករណី ​នៅ​បន្ត​ដោះស្រាយ

ខេត្តបាត់ដំបង÷ លោកសុខ លូ អភិបាលខេត្តបាត់ដំបងបានថ្លែងថា បញ្ហាទំនាស់ដីធ្លីនៅក្នុងខេត្តបាត់ដំបងកន្លងមកនេះ​ជាង១ម៉ឺនករណី ដោះស្រាយបញ្ចប់ជម្លោះដីរ៉ាំរ៉ៃជាបន្តបន្ទាប់នៅសល់ប្រមាណជាង៣ពាន់ករណីតែប៉ុណ្ណោះ។

ការថ្លែងបែបនេះខណះដែលលោកបានចុះជួបសំណេះសំណាលជាមួយថ្នាក់ដឹកនាំស្រុកក្រុមប្រឹក្សាស្រុក មន្រ្ដីរាជការស៊ីវិល លោកមេឃុំក្រុមប្រឹក្សាឃុំស្មៀនព្រមទាំងកងកម្លាំងប្រដាប់អាវុធនៅក្នុងស្រុករតនមណ្ឌលខេត្តបាត់ដំបងកាលពីរសៀលថ្ងៃទី០៣ខែមករាឆ្នាំ២០២២ថ្មីៗនេះ។

លោកសុខ លូ អភិបាលខេត្តបាត់ដំបងបានណែនាំឲ្យរដ្ឋបាលស្រុករៀបចំបញ្ជីទំនាស់ ដែលកំពុងតែកើតមាននៅក្នុងមូលដ្ឋានក្នុងឃុំនីមួយៗ ដើម្បីធ្វើការពិនិត្យនិងរៀបចំនូវយន្តការក្នុងការដោះស្រាយនៅក្រៅប្រព័ន្ធតុលាការជាមុនសិន។ ចំពោះ​បញ្ហាណាដែលអាជ្ញាធរឃុំនិងរដ្ឋបាលស្រុកដោះស្រាយមិនបាន ត្រូវបញ្ជូនសំណុំរឿង​មករដ្ឋបាលខេត្ត​ដើម្បី​ធ្វើការពិនិត្យ​ដោះស្រាយបន្ត។

ជាមួយគ្នានេះ លោក​ណែនាំ​ឲ្យ​អាជ្ញាធរស្រុកនិងមន្រ្ដីរាជការនៅគ្រប់លំដាប់ថ្នាក់ត្រូវខិតខំពង្រឹងវិន័យការងារនិងពីឥរិយាបទរបៀបរបបធ្វើការងាររបស់​ខ្លួន ហើយក៏ត្រូវចេះបែងចែកការងារកំណត់តួនាទីមុខងារ​និង​ភារកិច្ចការងារ​ទទួលខុសត្រូវទាំងថ្នាក់ដឹកនាំទាំងមន្រីរបស់ខ្លួនឲ្យបានជាក់លាក់គឺចាប់តាំងពីគណៈអភិបាល រហូតដល់មន្រ្ដីជាប់កិច្ចសន្យា​ដោយមិនត្រូវឲ្យមានមន្ត្រីណាម្នាក់គ្មានការងារធ្វើនោះទេ។

លោក​បន្ត​ថា អ្វីដែលជាតួអង្គសំខាន់នៅក្នុងមូលដ្ឋានគឺអស់លោកមេភូមិមេឃុំស្មៀន និងប៉ុស្តិ៍រដ្ឋបាលដែលជាតួអង្គនៅកៀកកិតនិងបម្រើប្រជាពលរដ្ឋនៅក្នុងមូលដ្ឋានដោយផ្ទាល់ ត្រូវយកចិត្តទុកដាក់ក្នុងការគិតគូរដោះស្រាយនូវរាល់សេវាដែល​ជាតម្រូវការចាំបាច់ដូចជា៖ សៀវភៅគ្រួសារ សៀវភៅស្នាក់នៅ អត្តសញ្ញាណប័ណ្ណ សំបុត្រកំណើតសំបុត្រអាពាហ៍ពិពាហ៍​ សំបុត្រមរណភាពជាដើម។

ដូចនេះរដ្ឋបាលស្រុកនិងអាជ្ញាធរមូលដ្ឋានឃុំត្រូវតែយកចិត្តទុកដាក់គិតគូរៀបចំឲ្យមានវេទិកាសាធារណៈនៅតាមភូមិឃុំខ្លួនឡើងវិញដើម្បីពន្លឿននូវក្នុងការរកដំណោះស្រាយនិងធ្វើការដោះស្រាយនូវបញ្ហាប្រឈមនិងភាពអសកម្មមួយចំនួនដែលកំពុងតែកើតមាននៅក្នុងមូលដ្ឋានជូនប្រជាពលរដ្ឋខ្លួនឲ្យបានឆាប់រហ័សនិងដើម្បីធ្វើការឆ្លុះបញ្ចាំងពិនិត្យមើលពីការអនុវត្តនូវគោលនយោបាយភូមិឃុំមានសុវត្ថិភាពរបស់រាជរដ្ឋាភិបាលកន្លងមកក្នុងមូលដ្ឋានរបស់ខ្លួនឡើងវិញ។

លោកអភិបាលខេត្តបាត់ដំបងក៏បានធ្វើការក្រើនរំលឹកនិងបានជម្រុញឲ្យអាជ្ញាធរស្រុក ដែលមានទីប្រជុំជនស្រុកឃុំជាប់និងភូមិសាស្រ្តផ្លូវជាតិ ក៏ត្រូវធ្វើការពិចារណាពិនិត្យលទ្ធភាពនិងតម្រង់ទិសក្នុងការកែលម្អនូវហេដ្ឋារចនាសម្ព័ន្ធផ្លូវក្នុងទីប្រជុំជនស្រុកនិងឃុំរបស់ខ្លួនជាបណ្តើរៗទៅតាមលទ្ធភាព និងថវិកាដែលខ្លួនមាននៅក្នុងស្រុកនិងនៅតាមឃុំនិមួយៗ។

ជាពិសេសបញ្ហាអនាម័យបរិស្ថាន និងសម្រាមនៅក្នុងទីប្រជុំជនស្រុកដែលតម្រូវឲ្យអាជ្ញាធរស្រុកនិងគ្រប់អង្គភាពជុំវិញស្រុករួមគ្នាគិតរួមគ្នាធ្វើនិងត្រូវរិះរកទីតាំងធ្វើទីលានចាក់សម្រាមនៅក្នុងស្រុកខ្លួនឲ្យបានធំទូលាយយ៉ាងហោចណាស់ផ្ទៃដី១០ទៅ២០ហិកតា៕

អត្ថបទ៖ សៅ សារិទ្ធ