កម្ពុជា មានអ្នកឆ្លងជំងឺកូវីដ១៩ បំប្លែងថ្មី ប្រភេទអូមីក្រុង កើនឡើងជាង១០០ករណីហើយ

រហូតមកដល់ថ្ងៃទី០៦ ខែមករា ឆ្នាំ២០២២នេះ កម្ពុជា មានអ្នកឆ្លងជំងឺកូវីដ១៩ បំប្លែងថ្មី ប្រភេទអូមីក្រុងកើនឡើងចំនួន១១២ករណីហើយ ក្នុងនោះ ១៨នាក់ករណី បានរកឃើញនៅថ្ងៃព្រហស្បតិ៍នេះ ដែលជាអ្នកដំណើរមកពីបរទេសទាំងអស់។ នេះបើតាមក្រសួងសុខាភិបាលកម្ពុជា។

ក្រសួងសុខាភិបាល បានឱ្យដឹងថា ក្រសួងបានរកឃើញករណីមេរោគបំប្លែងថ្មីប្រភេទអូមេក្រុងជាលើកដំបូងនៅថ្ងៃទី១៤ ខែធ្នូ ឆ្នាំ២០២១ ទៅលើស្ត្រីមានផ្ទៃពោះជាជនជាតិខ្មែរម្នាក់អាយុ ២៣ឆ្នាំនៅ​​ខេត្តស្វាយរៀង ដែលបានធ្វើដំណើរតាមជើងហោះហើរចេញពីប្រទេសហ្គាណា។ បើតាមក្រសួងសុខាភិបាល គឺគិតមកដល់ព្រឹកថ្ងៃទី០៦ ខែមករានេះ ក្រសួងបានរកឃើញអ្នកឆ្លងជំងឺកូវីដ១៩ប្រភេទថ្មីអូមីក្រុងចំនួន១១២ករណីនាក់ហើយ ក្នុងនោះ មានអ្នកជាសះស្បើយមួយចំនួនផងដែរ។

គិតត្រឹមព្រឹក ថ្ងៃទី០៦ ខែមករា ឆ្នាំ២០២២ កម្ពុជា មានអ្នកឆ្លងជំងឺកូវីដ១៩ សរុបចំនួន១២០៥៥៣នាក់ អ្នកជាសះស្បើយចំនួន១១៦៩៨២នាក់ និងអ្នកស្លាប់ចំនួន៣០១៥នាក់។ ពាក់ព័ន្ធនឹងជំងឺកូវីដ១៩ បំប្លែងថ្មី ប្រភេទអូមីក្រុងនេះដែរ ក្រសួងសុខាភិបាល មិនអនុញ្ញាតឱ្យអ្នកជំងឺប្រភេទថ្មីនេះព្យាបាលនៅតាមផ្ទះជាដាច់ខាត ដើម្បីបង្ការ និងទប់ស្កាត់ការឆ្លងរាលដាលនៃវីរុសនេះចូលក្នុងសហគមន៍។

លោក សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានឱ្យដឹងនៅក្នុងសេចក្តីប្រកាសព័ត៌មានចេញផ្សាយនៅយប់ថ្ងៃទី៥ ខែមករាថា ករណីជំងឺកូវីដ១៩ បំប្លែងថ្មី ប្រភេទអូមីក្រុង ត្រូវបានរកឃើញថា ជាករណីនាំចូលមកពីបរទេស និងភាគច្រើនជាអ្នកដំណើរមកពីបរទេសតាមផ្លូវអាកាស។ ទោះបីជាពុំទាន់មានទិន្នន័យបញ្ជាក់ថា វីរុសនេះបណ្តាលឱ្យមានភាពធ្ងន់ធ្ងរនៅឡើយ ប៉ុន្តែវាមានលទ្ធភាពឆ្លងលឿន។ ដូច្នេះ ដើម្បីបង្ការ និងទប់ស្កាត់ជាអតិបរមានូវការឆ្លងរាលដាលនៃវីរុសនេះ ចូលក្នុងសហគមន៍អ្នកជំងឺកូវីដ-១៩បំប្លែងថ្មី ប្រភេទអូមីក្រុង ដែលបានបញ្ជាក់ដោយមន្ទីរពិសោធន៍ ពុំត្រូវបានអនុញ្ញាតឱ្យព្យាបាលនៅតាមផ្ទះឡើយ ទោះបីក្នុងលក្ខខណ្ឌណាក៏ដោយ។

លោករដ្ឋមន្ត្រី បានបន្តទៀតថា អ្នកជំងឺកូវីដ-១៩ បំប្លែងថ្មី ប្រភេទអូមីក្រុងទាំងអស់ ត្រូវស្នាក់នៅ ថែទាំ និងព្យាបាល នៅក្នុងមន្ទីរពេទ្យ ឬមណ្ឌលព្យាបាលជំងឺកូវីដ-១៩ ដែលកំណត់ដោយក្រសួងសុខាភិបាល ឬដោយគណៈកម្មការប្រយុទ្ធនឹងជំងឺកូវីដ-១៩ ថ្នាក់រាជធានី-ខេត្ត៕

អត្ថបទ ៖ សំអឿន