ស្រុកបាទី ទទួលបានអគារមន្ទីរពេទ្យ តម្លៃជាង ៨ ម៉ឺនដុល្លារ

ប្រជាពលរដ្ឋនៅស្រុកបាទី ខេត្តតាកែវ ទទួលបានអគារមន្ទីរពេទ្យតម្លៃជាង ៨ ម៉ឺនដុល្លារដ៏ថ្មីស្រឡាងមួយទៀតសម្រាប់ព្យាបាលជំងឺ ដោយមិនចាំបាច់ធ្វើដំណើរទៅព្យាបាលនៅទីរួមខេត្ត ឬនៅរាជធានីភ្នំពេញទៀតទេ។

អគារមន្ទីរពេទ្យថ្មីនេះស្ថិតនៅឃុំពត់សរ ស្រុកបាទី ខេត្តតាកែវ ដែលចំណាយថវិកាសាងសង់ជាង ៨ ម៉ឺនដុល្លារ សហរដ្ឋអាមេរិក មានទទឹង ៨ ម៉ែត្រ និងបណ្ដោយ ៣៧ ម៉ែត្រ បានសម្ពោធដាក់ឱ្យប្រើប្រាស់ នៅថ្ងៃទី ១០ ខែមករាឆ្នាំ ២០២២ ក្រោមអធិបតីភាព លោក បណ្ឌិត ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និង លោក អ៊ូច ភា អភិបាល នៃគណៈអភិបាលខេត្តតាកែវ ព្រមទាំង មន្ត្រីរាជការ និងប្រជាពលរដ្ឋជាច្រើន។

ថ្លែងនៅក្នុងឱកាសនោះ លោក ជា វ៉ានដេត បានមានប្រសាសន៍ថា អគារពេទ្យថ្មីមណ្ឌលសុខភាពពត់សរនេះ ប្រាកដជាក្លាយទៅជាមន្ទីរពេទ្យបង្អែកស្រុកទី ២ នៅក្នុងស្រុកបាទី ហើយវាជាមន្ទីរពេទ្យបង្អែកថ្នាក់ស្រុកដែលមានសម្ភារៈបរិក្ខាពេទ្យទំនើបៗ សម្រាប់បម្រើដល់ប្រជាពលរដ្ឋ រស់នៅក្នុងមូលដ្ឋាននេះផ្ទាល់ ក៏ដូចជាមូលដ្ឋានផ្សេងទៀតនៅក្បែស្រុកភូមិនេះ អាចចូលមកសម្រាកព្យាបាល ដោយមិនចាំបាច់ធ្វើដំណើរទៅព្យាបាលនៅទីរួមខេត្ត ឬនៅរាជធានីភ្នំពេញនោះទេ។

លោករដ្ឋមន្រ្តីបានមានប្រសាសន៍បន្តថា ក្រៅពីសាលារៀនដែលរាជរដ្ឋាភិបាលបានខិតខំធ្វើយ៉ាងណាកសាងឱ្យមកនៅជិតផ្ទះរបស់ប្រជាពលរដ្ឋនោះ មណ្ឌលសុខភាព និងមន្ទីរពេទ្យដែលបម្រើឱ្យសុខភាពរបស់ប្រជាពលរដ្ឋក៏ត្រូវបានកសាងឱ្យមកនៅក្នុងភូមិឃុំរបស់ប្រជាពលរដ្ឋផងដែរ។

លោករដ្ឋមន្ត្រីសង្ឃឹមថា ការកសាងមណ្ឌលសុខភាព ឬមន្ទីរពេទ្យនេះ នឹងជួយកាត់បន្ថយអត្រាគ្រោះថ្នាក់ដល់ស្រ្តីឆ្លងទន្លេ និងប្រជាពលរដ្ឋដែលមានជំងឺប្រចាំកាយ អាចចូលមកសម្រាកព្យាបាល ដែលនឹងជួយកាត់បន្ថយការចំណាយថវិការបស់ប្រជាពលរដ្ឋបានមួយចំនួនធំ៕

អត្ថបទ៖ សំអឿន