​អបអរសាទរ​ អ្នកជំងឺ​កូវីដ១៩​ នៅខេត្តកំពង់ស្ពឺ​ ជាសះស្បើយ​ទាំងស្រុង​

អភិបាលខេត្តកំពង់ស្ពឺ លោក វី សំណាង បានឱ្យដឹងថា អ្នកឆ្លងជំងឺកូវីដ១៩ នៅក្នុងខេត្តកំពង់ស្ពឺ​ទាំងអស់ជាង ៥ ពាន់ នាក់ (៥៤៣៥) បានជាសះស្បើយ ១០០%។

លោក វី សំណាង មានប្រសាសន៍ថា ” ក្នុងនាម ក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ និងខ្លួនខ្ញុំផ្ទាល់ ខ្ញុំសូមចូលរួមអបអរសាទរជាមួយប្រជាពល​រដ្ឋក្នុងខេត្ត​កំពង់ស្ពឺ ដែលមកដល់ពេលនេះអ្នកកើតជំងឺ កូវីដ១៩ ទាំងអស់នៅក្នុងមណ្ឌលព្យាបាល និងនៅព្យាបាលតាមផ្ទះ បានជាសះស្បើយ១០០%”។

លោកអភិបាលខេត្តរូបនេះ អះអាងថា លទ្ធផលនេះ គឺដោយសារនយោបាយវ៉ាក់សាំងរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាការចូល​រួមរបស់​អាជ្ញាធរគ្រប់លំដាប់ថ្នាក់ មន្ត្រីរាជការ កងកម្លាំងប្រដាប់អាវុធគ្រប់ប្រភេទ ជាពិសេស គឺប្រជាពលរដ្ឋក្នុងខេត្តកំពង់ស្ពឺទាំងមូល។

ខេត្តកំពង់ស្ពឺ មានអ្នកឆ្លងជំងឺកូវីដ១៩ ចំនួន ៥៤៣៥ នាក់ អ្នកជាសះស្បើយ ៥៣៦៨ នាក់ និងស្លាប់ចំនួន ១៦៧ នាក់៕