ព័ត៌មានជាតិ

រកឃើញពលរដ្ឋ១៤នាក់ បានប៉ះផ្ទាល់ និងប្រយោលជាមួយអ្នកមានវិជ្ជមានកូវីដ អូមីក្រុង នៅខេត្តកំពង់ឆ្នាំង

បានផុស

៣ years មុន

នៅ

ថ្ងៃសុក្រ ១៤ មករា ២០២២

ដោយ

លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង នៅព្រឹកថ្ងៃទី១៤ ខែមករា ឆ្នាំ២០២២ បានអោយដឹងថា តាមការស្រាវជ្រាវរបស់ក្រុមគ្រូពេទ្យនៅព្រឹកថ្ងៃទី១៣ ខែមករា នៅក្នុងភូមិតាអតឃុំពានី ស្រុកកំពង់ត្រឡាចឡាច មានប្រជាពលរដ្ឋប៉ះពាល់ដោយផ្ទាល់៥នាក់ និងប្រយោលចំនួន៩នាក់ ជាមួយប្ដីប្រពន្ធ២នាក់មានវិជ្ជមានកូវីដ១៩ ប្រភេទអូមេក្រុង ធ្វើការក្នុងទីក្រុងភ្នំពេញ និងដែលបានមកលេងផ្ទះម្តាយក្នុងស្រុកកំពង់ត្រឡាច ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិតបានបញ្ជាក់ថា ដោយបុរសប្តីនិងប្រពន្ធ២នាក់នេះ ត្រូវបានក្រុមគ្រូពេទ្យខេត្តកណ្ដាលធ្វើតេស្តរហ័ស និងតេស្តម៉ាស៊ីន PHD រកឃើញវិជ្ជមានជំងឺកូវីដ១៩ អូមេក្រុង កាលពីថ្ងៃទី ១១ ខែមករា ។ តាមការស្រាវជ្រាវឲ្យដឹងថា បុរសប្ដីប្រពន្ធពីរនាក់នេះនៅថ្ងៃទី១១ និង១២ ខែមករា បានលេងផ្ទះម្តាយនៅក្នុងភូមិតាអត ឃុំពានី ស្រុកកំពង់ត្រឡាច ទើបមានអ្នកប៉ះពាល់ដោយផ្ទាល់និងប្រយោលចំនួន១៤នាក់នៅក្នុងមូលដ្ឋានខាងលើនេះ។

ចំពោះវិធានការ គឺក្រុមគ្រូពេទ្យយើងបានយកសំណាកអ្នកប៉ះពាល់ដោយផ្ទាល់ចំនួន៥នាក់ នៅផ្ទះស្ត្រីជាម្តាយអ្នកមានវិជ្ជមានកូវីដ១៩ អូមេក្រុង ឈ្មោះ ជា អេង អាយុ៥៧ឆ្នាំ រស់នៅក្នុងភូមិតាអត ឃុំពានី រួមនិងអ្នកប៉ះពាល់ដោយប្រយោល៩នាក់ទៀត ប៉ុន្តែជាលទ្ធផលគឺអវិជ្ជមានទាំងអស់គ្នា។ ទោះយ៉ាងនេះក្តីក្រុមគ្រូពេទ្យ អាជ្ញាធរ និងសមត្ថកិច្ចស្រុកកំពង់ត្រឡាច បានដាក់អ្នកប៉ះពាល់ដោយផ្ទាល់និងប្រយោលទាំង១៤នាក់ ឲ្យធ្វើចត្តាឡីស័ក ចំនួន១៤ថ្ងៃ នៅផ្ទះសាម៉ីខ្លួនដោយផ្ទាល់ តាមវិធានការ ក្រសួងសុខាភិបាល ក្រោមការការត្រួតពិនិត្យយ៉ាងយកចិត្តទុកដាក់ពីអាជ្ញាធរ និងសមត្ថ កិច្ច ដើម្បីទប់ស្កាត់ការឆ្លងរាលដាលជំងឺកូវីដ១៩ អូមីក្រុងនេះចូលក្នុងសាគមន៍ ។

លោកប្រធានមន្ទីរសុខាភិបាលខេត្តកំពង់ឆ្នាំង សូមអំពាវនាវដល់ប្រជាពលរដ្ឋនៅក្នុងខេត្តកំពង់ឆ្នាំងទាំងអស់ សូមប្រុងប្រយ័ត្នដោយត្រូវចូលរួមទាំងអស់គ្នា អនុវត្តនូវវិធានការរបស់ក្រសួងសុខាភិបាលគឺ ៣កុំ និង៣ការពារ ឲ្យបានខ្ជាប់ខ្ជួន ជាពិសេសត្រូវទៅចាក់វ៉ាក់សាំងកូវីដដូសទី២ ឬទី៣ ឱ្យបានទាំងអស់គ្នា តាមពេលវេលាកំណត់ចាប់ពីថ្ងៃទី១៨ ខែមករានេះតទៅ នៅតាមមន្ទីរពេទ្យនិងមណ្ឌលសុខភាពនានាក្នុងក្រុងស្រុកនៃខេត្តកំពង់ឆ្នាំង ៕

អត្ថបទ៖ ឈៀងថារិទ្ធ