ព័ត៌មានជាតិ

ចំនួនអ្នកជាប់ពាក់ព័ន្ធជាមួយស្ត្រីឈ្មោះ អៀម ធីតា កើនឡើងដល់៥២នាក់ហើយ

បានផុស

៤ years មុន

នៅ

ថ្ងៃពុធ ៩ ធ្នូ ២០២០

ដោយ

ប្រធានមន្ទីរសុខាភិបាលខេត្តកណ្តាល បានអះអាងនៅមុនបន្តិចថា ចំនួនអ្នកជាប់ពាក់ព័ន្ធជាមួយស្ត្រីឈ្មោះ អៀម ធីតាមានឆ្លងកូវីដ១៩ ដែលបានទៅលេងម្តាយនៅកណ្តាលស្ទឹង បានកើនឡើងដល់៥២នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល បានឲ្យដឹងនៅមុននេះថានៅរសៀលនេះក្រុមការងារបានស្រាវជ្រាវរកអ្នកជាប់ពាក់ព័ន្ធនឹងស្ត្រីឈ្មោះ អៀម ធីតា ចំនួន៨នាក់បន្ថែមទៀត ក្នុងនោះស្រី៦នាក់ ត្រូវបានបញ្ជួនទៅធ្វើចត្តាឡីស័កនៅមន្ទីរពេទ្យបង្អែកស្រុកកណ្តាលស្ទឹងរួចហើយ ដែលធ្វើឲ្យចំនួនអ្នកអ្នកជាប់ពាក់ព័ន្ធកើនឡើងដល់៥២នាក់។

លោកបានបន្តថា ចំណែកអ្នកពាក់ព័ន្ធផ្សេងៗទៀតពួកគេធ្វើចត្តាឡីស័ក នៅពេទ្យជ័យជំនះ ក្រុងតាខ្មៅ ខេត្តកណ្តាល នៅសាលាបឋមសិក្សាព្រែកតាពៅ ក្រុងតាខ្មៅ ខេត្តកណ្តាលនិងធ្វើចត្តាឡីស័ក នៅមន្ទីរពេទ្យបង្អែកស្រុកកណ្តាលស្ទឹងផងដែរ។ លោកបានបន្ថែមថា ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកានេះដែរ គិតចាប់ពីថ្ងៃទី២៨ ខែវិច្ឆិការហូតមកដល់ថ្ងៃទី០៨ធ្នូ មានចំនួន១០១៥នាក់មានតេស្តអវិជ្ជមានទាំងអស់។

គួរបញ្ជាក់ថាស្ត្រីឈ្មោះ អៀម ធីតា អាយុ៣៥ ឆ្នាំ មានអាសយឋាន រស់នៅសង្កាត់បឹងទំពន់ រាជធានីភ្នំពេញ ដែលបានធ្វើតេស្តមានវិជ្ជមានកូវីដ១៩ នៅថ្ងៃទី០៧ ខែធ្នូ ឆ្នាំ២០២០ បន្ទាប់ពីស្ត្រីរូបនោះកាលពីថ្ងៃទី ២៧ ខែវិច្ឆិកា ឆ្នាំ២០២០បានទៅហាង pedro នៅផ្លូវព្រះសីហនុ។ នៅថ្ងៃទី០៨ ខែ ធ្នូ ឆ្នាំ ២០២០ វេលាម៉ោងប្រមាណ៩ព្រឹក ឈ្មោះ អៀម ធីតា បានមកលេងម្តាយ រហូតដល់ ម៉ោងប្រមាណ ៣ រសៀលបានត្រឡប់ទៅភ្នំពេញវិញហើយក្រុមគ្រួសារគាត់បានបន្តទៅផ្សារនិងវត្តជាបន្តបន្ទាប់រហូតអាជ្ញាធរសម្រេចបិទផ្សារកំពង់អំពិលនិងវត្តវិហារត្រាញ់។

ជាមួយគ្នានេះដែរ អាជ្ញាធរក្រុងតាខ្មៅ ក៏បានសម្រេចបិទផ្សារតាមមាត់ទន្លេនិងមាត់ស្ទឹងនិងតូបលក់មួយចំនួន ដែលមានការពាក់ព័ន្ធផងដែរ ដើម្បីទប់ស្កាត់កុំឲ្យមានការឆ្លងរីករាលដាលជំងឺកូវីដ១៩កាន់តែទ្រង់ទ្រាយធំ។ គួរបញ្ជាក់ថារហូតមកដល់ពេលនេះ ក្រសួងសុខាភិបាលបានរកឃើញអ្នកដែលមានជាប់ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកាជាង១ម៉ឺននាក់ហើយ ក្នុងនោះមានវិជ្ជមានវីរុស១៩ចំនួន៣៨នាក់៕

អត្ថបទ៖ សំអឿន

Related Topics:កូវីដ-១៩