​អ្នកចង់​រៀន​ជំនាញ​វិស្វករ​ត្រូវមាន​មូលដ្ឋាន​អ្វីខ្លះ?​​

​លោក ទុន សុភី អតីតនិស្សិតនៅវិទ្យាស្ថានពហុបច្ចេកទេសព្រះកុសមៈផ្នែកសំណង់ស៊ីវិល​បាន​​ចែក​រំលែក​នូវបទពិសោធន៍​​ថា​ យុវជនដែល​មាន​បំណងសិក្សាជំនាញវិស្វកម្មសំណង់ស៊ីវិល ត្រូវមានមូលដ្ឋានវិទ្យាសាស្ត្រដូចជា គណិតវិទ្យា រូបវិទ្យា គីមីវិទ្យា ដើម្បីជាមូលដ្ឋានក្នុងការគណនាច្រើនដំណាក់កាលនៅថ្នាក់ឧត្តមសិក្សា។

លោក​បាន​បន្ថែម​​ថា សម្រាប់រូបលោក ជំនាញវិស្វកម្មសំណង់ស៊ីវិល មិនពិបាកនោះទេ ដោយសារតែលោក មានមូល​ដ្ឋានគ្រឹះ​តាំងពីថ្នាក់វិទ្យាល័យ។ លោកថា សម្រាប់​អ្នកដែលពិបាក ដោយសារតែពួក​គាត់មិន​បានត្រៀមខ្លួនតាំងពីក្រោម។ លោក សុភី ប្រាប់ថា ការងារក្នុងវិស័យសំណង់មានច្រើន ដូចជា ការ​ងារ​ការដា្ឋន និងអូហ្វីស ការងារវាស់វែងដី ដែកបេតុងជាដើម។

លោក ជិននី លីហ៊ាង អតីតនិស្សិតវិស្វកម្មសំណង់ស៊ីវិល នៅសាលាតិចណូ ក៏បានឱ្យដឹងដែរថា មូលដ្ឋានសំខាន់ នៃមុខជំនាញវិស្វករ គឺគណិតវិទ្យា រូបវិទ្យា គីមីវិទ្យា និងភាសារអង់គ្លេស ដោយ​សារតែឯកសារភាគច្រើនជាភាសារបរទេស។ បុគ្គលិកផ្នែកគ្រប់គ្រងការដ្ឋានរូបនេះ បញ្ជាក់ថា មុខវិជ្ជានេះមានការលំបាក ហើយប្រសិនបើអ្នកគ្មានមូលដ្ឋានគ្រឹះ គណិតវិទ្យា រូបវិទ្យា​នោះ​ទេ កាន់​តែពិបាក។

ទោះជាយ៉ាងណា លោក ទុន សុភី និងលោក ជិននី លីហ៊ាង អះអាងប្រាប់កម្ពុជាថ្មីថា ជំនាញវិស្វករ មានតម្រូវការទីផ្សារការងារច្រើន ដោយសារតែប្រទេស​កម្ពុជា ជាប្រទេស​អភិវឌ្ឍន៍ ដែលមានតម្រូវ​ការសំណង់ច្រើន ដូចជាស្ពាន បុរី ផ្ទះល្វែង សំណង់ធំៗ ខុនដូជាដើម៕

អត្ថបទ៖ ឡេង ដេត