ព័ត៌មានជាតិ

ប៉ូលិសស័ក្ដិ៤នៅក្រសួងមហាផ្ទៃម្នាក់ ផ្ទុះអាវុធ២គ្រាប់លើគូទំនាស់ បណ្ដាលឲ្យរបួសជើង ហើយបើករថយន្តគេចខ្លួនបាត់

បានផុស

៤ years មុន

នៅ

ថ្ងៃព្រហស្បតិ៍ ១០ ធ្នូ ២០២០

ដោយ

មន្ត្រីនគរបាលម្នាក់ ដែលគេស្គាល់ថា ជាប៉ូលិសស័ក្ដិ៤នៅក្រសួងមហាផ្ទៃ បានផ្ទុះអាវុធចំនួនពីរគ្រាប់ បណ្ដាលឲ្យជនរងគ្រោះរងរបួសជើង ហើយក្រោយពីបង្កហេតុជនបង្កបើករថយន្ដគេចខ្លួនបាត់ បន្ទាប់ពីមានទំនាស់ពាក្យសម្ដីគ្នាបន្តិចបន្ទួចអស់រយះពេលជាង២ឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីផ្ទុះអាវុធដែលបណ្ដាលឲ្យមានអ្នករងរបួសនេះ បានកើតឡើងកាលពីវេលាម៉ោងប្រមាណ៩យប់ ថ្ងៃទី៩ ខែធ្នូ ឆ្នាំ២០២០ នៅតាមបណ្ដោយផ្លូវ៣៧១ ក្នុងសង្កាត់បឹងទំពុន២ ខណ្ឌមានជ័យ ជាប់ព្រំប្រទល់និងសង្កាត់ដង្កោ ខណ្ឌដង្កោ រាជធានីភ្នំពេញ។

តាមការរៀបរាប់របស់ជនរងគ្រោះឈ្មោះ ប៊ុន ស៊ិម ភេទប្រុស អាយុ៣៩ឆ្នាំ មុខរបបនៅផ្ទះ ស្នាក់ នៅសង្កាត់បឹងត្របែក ខណ្ឌចំការមន បានឲ្យដឹងថា ជនដៃដល់មានឈ្មោះ កេត ផារ៉េន ភេទប្រុស អាយុ ៣៩ឆ្នាំ មុនរបបជាមមន្ត្រីប៉ូលីសស័ក្តិ៤នៅក្រសួងមហាផ្ទៃ។ ។

ជនរងគ្រោះបានរៀបរាប់ប្រាប់អ្នកសារព័ត៌មានថា មុនពេលកើតហេតុរូបគាត់និងមិត្តភ័ក្ដ៣នាក់ទៀត ជិះម៉ូតូចេញពីហូបចុកតិចតួចនៅម្ដុំបឹងត្របែក។ ហើយក៏ជូនមិត្តភ័ក្ដមកផ្ទះនៅកន្លែងកើតហេតុ ខណៈមកដល់មុខផ្ទះបានមួយសន្ទុះ ស្រាប់តែលេចមុខជនដៃដល់ដែលធ្លាប់ស្គាល់គ្នាតែមិនជិតស្និត បានចុះពីលើរថយន្ត របស់ខ្លួនមិនចាំម៉ាក ហើយដើរឆ្លងផ្លូវមកសួរនាំមិត្តភ័ក្តគាត់ម្នាក់ទៀតមួយមាត់ពីរ រួចដើរទៅជិះរថយន្តរបស់ខ្លួនវិញ។ ពេលឡើងជិះរថយន្ដជនដៃដល់បានបើកកញ្ចក់រថយន្តដកកាំភ្លើងខ្លីបាញ់សម្ដៅមកជនរងគ្រោះ ដែលនៅចំណែកផ្លូវម្ខាងទៀត ចំនួន២គ្រាប់ ចំជើងខាងស្ដាំមួយគ្រាប់ និងមួយគ្រាប់ទៀតចំទ្វាកញ្ចក់មួយផ្ទាំងបែកខ្ទេច។

ជនរងគ្រោះបានបន្តថា ក្រោយពីផ្ទុះអាវុធពីរគ្រាប់រួច ជនដៃដល់ ក៏បើករថយន្តគេចខ្លួនបាត់។ ចំណែកជនរងគ្រោះ ត្រូវបានមិត្តភ័ក្ដដឹកទៅមន្ទីរពេទ្យដើម្បីពិនិត្យនិងលាងរបួស។

ក្រោយពីលាងរបួសហើយ ជនរងគ្រោះបានមកកន្លែងកើតហេតុវិញ ទើបបង្កមានការភ្ញាក់ផ្អើលដល់ សមត្ថកិច្ចប៉ុស្ដិ៍នគរបាលបឹងទំពុន២ និងសមត្ថកិច្ចប៉ុស្ដិ៍នគរបាល ដង្កោ ចុះមកដល់កន្លែងកើតហេតុហើយរុញដាក់គ្នាទៅវិញទៅមក ដោយប្រកែកថាមិនមែនជាទឹកដីរបស់ខ្លួនទេ។

ដោយឃើញសមត្ថកិច្ចរុញដាក់គ្នាបែបនេះ ទើបជនរងគ្រោះសម្រេចចិត្តយកសម្បកគ្រាប់ដែលនៅសល់មួយគ្រាប់ទុក រង់ចាំទៅដាក់ពាក្យបណ្ដឹងនៅមូលដ្ឋានកងរាជអាវុធហត្ថរាជធានីភ្នំពេញ ដើម្បីឲ្យជួយស្រាវជ្រាវចាប់ជនបង្កយកមកផ្ដន្ទាទោសតាមច្បាប់៕

អត្ថបទដោយ ៖សុខុម