ព័ត៌មានជាតិ

ព្រឹកនេះ នៅតំបន់សមុទ្រ ខ្យល់បោកបក់ខ្លាំង រលកខ្ពស់ៗសូមអ្នកនេសាទ បង្កើនការប្រុងប្រយ័ត្ន

បានផុស

៤ years មុន

នៅ

ថ្ងៃព្រហស្បតិ៍ ១០ ធ្នូ ២០២០

ដោយ

ក្រសួងសាធារណការ និងដឹកជញ្ជូន បានអំពាវនាវដល់ក្រុមហ៊ុនដឹកជញ្ជូននិងម្ចាស់នាវាតាមផ្លូវសមុទ្រទាំងអស់ឲ្យមានការប្រុងប្រយ័ត្នខ្ពស់ចំពោះអាកាសធាតុមិនល្អដែលនឹងបង្កឲ្យមានខ្យល់បក់បោកខ្លាំងនិងរលកខ្ពស់ៗងាយប្រឈមនឹងគ្រោះថ្នាក់ ។

ការណែនាំរបស់ក្រសួងសាធារណការ បានធ្វើឡើងដោយសារតែរដូវនេះ មានខ្យល់បក់បោកខ្លាំងពិសេសនៅតំបន់មាត់សមុទ្រ ដែលអាចធ្វើឲ្យមានគ្រោះថ្នាក់ជាយថាហេតុដល់អ្នកធ្វើដំណើរតាមនាវាតាមសមុទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូនចុះថ្ងៃទី១០ ខែធ្នូនេះ បានឲ្យដឹងថា យោងលើស្ថានភាពអាកាសធាតុបច្ចុប្បន្ន គឺនៅខេត្តតំបន់ឆ្នេរសមុទ្រ កំពុងមានខ្យល់បក់បោកខ្លាំង និងរលកសមុទ្រខ្ពស់ៗដែលអាចបង្កឱ្យមានគ្រោះថ្នាក់ដល់អាយុជីវិត និងខូចខាតទ្រព្យសម្បត្តិ ដែលតម្រូវឲ្យម្ចាស់ក្រុមហ៊ុនដឹកជញ្ជូនតាមនាវា ម្ចាស់នាវា អ្នកបើកបរនាវា នាវិក និងប្រជានេសាទទាំងអស់យកចិត្តទុកដាក់ខ្ពស់ និងបញ្ចៀសនូវហានិភ័យដែលអាចកើតមានឡើង។

ក្រសួងសាធារណការ បានលើកឡើងថា «កន្លងមកមានម្ចាស់ទូកមួយចំនួនតូចពុំបានចូលរួមអនុវត្តទៅតាមការណែនាំរបស់សមត្ថកិច្ចស្តីពីបញ្ហាអាកាសធាតុឡើយ ដូច្នេះ ហើយទើបក្រសួងអំពាវនាវដល់ម្ចាស់ក្រុមហ៊ុនដឹកជញ្ជូនតាមនាវា ម្ចាស់នាវា អ្នកបើកបរនាវា នាវិក និងប្រជានេសាទទាំងអស់ ឱ្យបង្កើនការយកចិត្តទុកដាក់ប្រុងប្រយ័ត្នខ្ពស់ ដោយបំពាក់ឧបករណ៍សុវត្ថិភាពឱ្យបានគ្រប់គ្រាន់ទៅតាមចំនួនអ្នកដំណើរដែលមានដូចជា អាវពោង ពោងកង ពោងស ខ្សែពួរ ជាដើម ដើម្បីបញ្ចៀសគ្រោះថ្នាក់ជាយថាហេតុពេលធ្វើដំណើរតាមនាវានៅតាមសមុទ្រ»៕

អត្ថបទ ៖ សំអឿន