អភិបាលខេត្តកំពង់ចាម ផ្តាំដល់«ទំពាំងស្នងឫស្សី»របស់កម្ពុជា ត្រូវយល់ដឹងពីប្រវត្តិសាស្ត្រឲ្យបានច្បាស់

លោក អ៊ុន ចាន់ដា លោកអភិបាលខេត្តកំពង់ចាម បានផ្តាំឲ្យសិស្ស និស្សិតដែលជាទំពាំងស្នងឫស្សីនាពេលអនាគត ត្រូវយល់ដឹងពីប្រវត្តិសាស្ត្រឲ្យបានច្បាស់ និងត្រូវចេះប្រៀបធៀប ពេលនេះ និងអតីតកាល។ លោ​កបានផ្តាំដូច្នេះ នៅក្នុងពិធីបើកបវេសនកាលឆ្នាំសិក្សាថ្មី២០២១-២០២២ និងចែកប័ណ្ណសរសើរជូននិសិ្សត បុគ្គលិក សាស្ត្រាចារ្យ នៃសាខាសាកលវិទ្យាល័យគ្រប់គ្រង និងសេដ្ឋកិច្ច ខេត្តកំពង់ចាម កាលពីព្រឹកថ្ងៃទី ២៣ ខែមករា ឆ្នាំ ២០២២។

ជាមួយគ្នានេះ លោកអភិបាលខេត្តកំពង់ចាម  បានលើកទឹកចិត្តដល់សិស្ស និស្សិត ទាំងអស់ត្រូវខិតខំរៀនសូត្រ និងចូលរួមការបណ្ដុះបណ្ដាលធនធានមនុស្ស ដែលជាកត្តាចាំបាច់បំផុតក្នុងការចូលរួមអភិវឌ្ឍប្រទេសជាតិទៅរកសុខសន្តិភាព  និងការអភិវឌ្ឍន៏លើគ្រប់វិស័យ  ជាពិសស កាលពីកម្ពុជា ទើបរួចផុតពីសង្គ្រាមផ្ទៃក្នុង  រាជរដ្ឋាភិបាល បានដាក់គោលដៅ៤ចំណុចជាអាទិភាព គឺ មនុស្ស ទឹក ភ្លើង និងផ្លូវ ក្នុងការស្ដារ  កសាង និងអភិវឌ្ឍន៏ប្រទេសពីចំណុចសូន្យ។

លោក  អ៊ុន  ចាន់ដា  បានបន្ថែមទៀតថា  ក្នុងនាមជានិស្សិត ត្រូវយល់ដឹងពីប្រវត្តិសាស្ត្រឲ្យបានច្បាស់កុំជឿការអូសទាញពីក្រុមអគតិមួយចំនួនដែលប្រឆាំងជាមួយរាជរដ្ឋាភិបាលកម្ពុជាបច្ចប្បន្ន  ដែលកំពុងនាំសុខសន្តិភាពមកជូនប្រជាពលរដ្ឋទាំងអស់គ្នា  និងបន្ថែមការអភិវឌ្ឍន៍ប្រទេសជាតិជាបន្តបន្ទាប់ទៀត។ ប្រសិនបបើមានភ្លើងសង្គ្រាមនោះ  គឺសិស្សានុសិស្ស ពុំអាចសិក្សារៀនសូត្រក្រេបយកចំណេះដឹង បច្ចេកទេស និងជួបជុំគ្នាបានឡើយ៕

អត្ថបទ ៖ ហុង ម៉េង ហៀ