កម្ពុជាទទួលបាន ជំនួយវ៉ាក់សាំងជាបន្តបន្ទាប់ ដោយសារ​តែដើរលើនយោបាយការទូត ត្រឹមត្រូវ

ប្រទេសកម្ពុជា បានទទួលជំនួយវ៉ាក់សាំងបង្ការជំងឺកូវីដ-១៩ ជាបន្តបន្ទាប់ ពីបណ្ដាប្រទេសនានានៅលើ​ពិភពលោក ដែលនាំឲ្យកម្ពុជាអាចសម្រេចបានលទ្ធផល ចាក់វ៉ាក់ជូនប្រជាពលរដ្ឋបានយ៉ាងឆាប់រហ័ស។

កាលពីពេលកន្លងទៅ ប្រទេសកម្ពុជា បានទទួលជំនួយវ៉ាក់សាំង តាមរយៈយន្តការទ្វេភាគី និងតាមរយៈ​ យន្តការកូវ៉ាក់ ដោយមកដល់ពេលនេះ មានប្រទេសដូចជា៖ ចិន, ជប៉ុន, អាមេរិក, អង់គ្លេស, និងអូស្ត្រាលី ជាដើម បានផ្ដល់ជំនួយវ៉ាក់សាំង មកកាន់ប្រទេសកម្ពុជា។

ចំណែកនៅថ្ងៃទី ២៦ ខែមករា ឆ្នាំ ២០២២ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា នឹងអញ្ជើញទៅទទួលវ៉ាក់សាំង ដែ​ល​ជាជំនួយ របស់រដ្ឋាភិបាល និងប្រជាជនប៉ូឡូញ ប្រភេទអាស្ត្រាហ្សេនីកា ចំនួន ៣០ម៉ឺនដូសទៀត នៅព្រលានយន្ដហោះភ្នំពេញអន្តរជាតិ។ តើមានមូលហេតុអ្វីខ្លះ ដែលនាំឲ្យប្រទេសកម្ពុជា ទទួលបានជំនួយវ៉ាក់សាំងបង្ការជំងឺកូវីដ-១៩ ជាបន្តបន្ទាប់យ៉ាងដូច្នេះ?

មន្ត្រីជាន់ខ្ពស់រាជរដ្ឋាភិបាល លោក ​ជា ច័ន្ទ​បរិបូរណ៍ មានប្រសាសន៍ប្រាប់កម្ពុជាថ្មី នៅថ្ងៃទី ២៥ ខែមករានេះថា ការដែលប្រទេសកម្ពុជា ទទួលបានជំនួយវ៉ាក់សាំងបង្ការជំងឺកូវីដ-១៩ ជាបន្តបន្ទាប់នេះ ដោយសារតែសិល្បៈការទូត ដ៏ត្រឹមត្រូវរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

លោកថា «មិនអាចកាត់ផ្ដាច់បានអំពី គេហៅថា សិល្បៈការទូត សម្រាប់ឆ្លុះបញ្ចាំងអំពីកម្ពុជា កម្ពុជាមានវ៉ាក់សាំងដោយសំបូរបែប ទាំងយើងទិញ ទាំងជំនួយទ្វេភាគី នោះហើយ បង្ហាញអំពីសិល្បៈការទូតរបស់ប្រមុខដឹកនាំរបស់យើង ដែលមានភាពឈ្លាសវៃ ដូចខ្ញុំនិយាយខាងដើម ប្រទេសខ្លះរកវ៉ាក់សាំងប្រើអត់ទាន់បានផង»។

លោក ​ជា ច័ន្ទ​បរិបូរណ៍ ដែលជារដ្ឋលេខាធិការក្រសួងព័ត៌មាន បានរំលឹកផងដែរថា អង្គការសុខភាពពិភពលោក កាលពីខែធ្នូឆ្នាំ ២០២១កន្លងទៅនេះ បានបង្ហាញរបាយការណ៍មួយ ដោយថា ប្រទេសអ្នកមាន គឺបានចាក់វ៉ាក់សាំងជូនប្រជាជន របស់ពួកគេ បានរហូតដល់ដូសជំរុញពី ៧៥ ទៅ៨០ភាគរយហើយ តែសម្រាប់ប្រទេសក្រីក្រនៅតំបន់អាហ្វ្រិក គឺបានប្រមាណតែ ១០ភាគរយប៉ុណ្ណោះ ហើយប្រទេ​សខ្លះទៀត បានទទួលវ៉ាក់សាំងហើយ តែពុំមានគ្រូពេទ្យសម្រាប់ចាក់ទៅទៀត។

ចំណែកប្រទេសកម្ពុជាវិញ គឺបានចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋរហូតដល់ដូសទី ៤ ដែល​ជាដូសជំរុញទៅហើយ និងចាក់បានលើស ៨៥ភាគរយនៃចំនួនប្រជាជន ផងដែរ ទោះបីជាប្រទេសកម្ពុជា មិនមែនជាប្រទេសអ្នកមានក៏ដោយ។ លោកបន្ថែមថា «វ៉ាក់សាំង បានឆ្លុះបញ្ចាំងអំពីភាពប៉ិនប្រសប់ អំពីភាពឈ្លាសវៃ ដឹកនាំរបស់ប្រមុខដឹកនាំរបស់យើង វិញ្ញាសារកូវីដ-១៩ វាជាវិញ្ញាសារមួយ ដែលខ្ញុំចាប់អារម្មណ៍ចំណុចចំនួន ២ ដែលទីមួយ គឺទាញមនុស្សឲ្យបែរមកគោរព នូវវប្បធម៌អរិយធម៌ និងទំនៀមទម្លាប់ប្រពៃណីសាសនា របស់ខ្លួនវិញ ហើយទីពីរ គឺឆ្លុះបញ្ចាំងឲ្យឃើញថាតើ មេដឹកនាំរូបណា ដែលមានភាពប៉ិនប្រសប់»។

ចំណែកលោកបណ្ឌិត គិន ភា ប្រ​ធា​នវិទ្យាស្ថានទំនាក់ទំនង អន្តរជាតិកម្ពុជា នៃរាជបណ្ឌិត្យសភាកម្ពុជា និងជាអ្នកវិភាគបញ្ហានយោបាយ មានប្រសាសន៍ប្រាប់កម្ពុជាថ្មីដែរថា មូលហេតុដែលនាំឲ្យប្រទេសកម្ពុជា ទទួលបានជំនួយវ៉ាក់សាំងជាបន្តបន្ទាប់នោះ ដោយសារតែការដើរលើនយោបាយការបរទេស ដ៏ត្រឹមត្រូវរបស់រាជរដ្ឋាភិបាលកម្ពុជា។ ម្យ៉ាងទៀត កន្លង មកប្រមុខរាជរដ្ឋាភិបាលកម្ពុជា ធ្លាប់បានប្រកា​សហើយថា កម្ពុជាស្វាគមន៍ជានិច្ចនូវរាល់ការផ្ដល់ជំនួយ ពីបណ្ដាប្រទេសនានានៅលើពិភពលោក ដោ​យថា ប្រទេសកម្ពុជា មានទំនាក់ទំនងល្អជាមួយប្រទេសទាំងអស់។ ដូច្នេះទើប ធ្វើឲ្យប្រទេសកម្ពុជា ទទួ​លបានជំនួយវ៉ាក់សាំងបង្ការជំងឺកូវីដ-១៩ ជាបន្តបន្ទាប់។

សូមជម្រាបថា គិតត្រឹមថ្ងៃទី ២៤ ខែមករា ឆ្នាំ ២០២២ ប្រទេសកម្ពុជា បានចាក់វ៉ាក់សាំងបង្ការជំងឺកូវីដ-១៩ ដូចជា៖ -លើប្រជាជនអាយុពី ១៨ឆ្នាំឡើង មាន ១០១,៩៣% ធៀបជាមួយចំនួនប្រជាជនគោលដៅ ១០លាននាក់។ -លើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៩៩,៤៤% ធៀបជាមួយចំនួនប្រជាជនគោលដៅ ១,៨២៧,៣៤៨ នាក់។ -លើកុមារអាយុពី ៦ឆ្នាំ ដល់ក្រោម ១២ឆ្នាំ មាន ១០៥​,៨២% ធៀបជាមួយនឹងប្រជាជនគោលដៅ ១,៨៩៧,៣៨២ នាក់។ -លើកុមារអាយុ ៥ឆ្នាំ មាន ១០៥​,២៩% ធៀបជាមួយនឹងប្រជាជនគោលដៅ ៣០៤,៣១៧នាក់។ -លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាននាក់ មាន ៨៩,៦២%៕

អត្ថបទ៖ ឃួន សុភ័ក្រ