អភិបាលខេត្តកំពង់ឆ្នាំងគ្រោងពង្រីកការចិញ្ចឹមសត្វចៀមយកសាច់ផ្គត់ផ្គង់ទីផ្សារ និងទាក់ទាញទេសចរណ៍

លោកអភិបាលខេត្តកំពង់ឆ្នាំងមានគម្រោងឲ្យកសិករពង្រីកការចិញ្ចឹមសត្វចៀម ដើម្បីសម្រាប់ផ្គត់ផ្គង់ទីផ្សារ និងជាពិសេសទាក់ទាញភ្ញៀវទេសចរណ៍បរទេស ដែលចូលចិត្តទទួលទានសត្វចៀម អាចមកកម្សាន្ត និងទទួលទានសាច់ចៀមនៅខេ្តកំពង់ឆ្នាំង។

លោក ស៊ុន សុវណ្ណរិទ្ធិ អភិបាលខេត្តកំពង់ឆ្នាំង លើកឡើងបែបនេះ កាលពីថ្ងៃទី២៥ ខែមករាឆ្នាំ២០២២ នៅក្នុងសន្និសីទសារព័ត៌មានស្តីពី “វឌ្ឍនភាព មូលដ្ឋានឃុំ សង្កាត់និងទិសដៅការងារបន្ត” របស់រដ្ឋបាលខេត្តកំពង់ឆ្នាំង ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលនៅទីស្តីការគណៈរដ្ឋមន្ត្រី។

លោកអភិបាលខេត្តកំពង់ឆ្នាំងបានថ្លែងថា បច្ចុប្បន្នការចិញ្ចឹមចៀមនៅខេត្តកំពង់ឆ្នាំង បាននិងកំពុងអនុវត្តហើយ នៅស្រុកទឹកផុសដោយចិញ្ចឹមបានជាង៦០០ក្បាល និងកំពុងតែពង្រីកបន្ថែមទៀត។

លោក ស៊ុន សុវណ្ណរិទ្ធិ បានបន្ថែមទៀតថា «គោលដៅរបស់ខ្ញុំគឺទៅដល់កំពង់ឆ្នាំងមានសាច់ចៀមមហូប ដោយកាលពីមុនយើងថាមានតែនៅអូស្ត្រាលីប៉ុណ្ណោះទេ »។

មុខរបរចិញ្ចឹមសត្វចៀម មិនសូវមានអ្នកចិញ្ចឹមច្រើនឡើយ ដោយសារតែប្រជាកសិករភាគច្រើនយល់ថា សត្វមួយប្រភេទនេះពិបាកក្នុងការរកពូជ និងថែទាំ ហើយបារម្ភពីកង្វះទីផ្សារ។ ប៉ុន្តែកាលពីពេលថ្មីៗនេះកសិដ្ឋានចិញ្ចឹមចៀមមួយនៅខេត្តកំពង់ឆ្នាំងកំពុងពង្រីកការចិញ្ចឹមបន្ថែមទៀត ឆ្លើយតបទៅនឹងទីផ្សារក្នុងស្រុក បច្ចុប្បន្នដែលពេញនិយមត្រូវការសាច់ចៀមយ៉ាងខ្លាំង។

លោក ប៊ុន ចាន់វីរៈ ម្ចាស់កសិដ្ឋានចិញ្ចឹមចៀមមួយកន្លែងស្ថិតនៅក្នុងភូមិខ្វិតទួលឃ្លាំង ឃុំក្បាលទឹកស្រុកទឹកផុសខេត្តកំពង់ឆ្នាំង តាមជួរភ្នំឱរ៉ាល់ជាប់នឹងព្រំប្រទល់របស់ ខេត្តកំពង់ស្ពឺធ្លាប់​បានឲ្យដឹងថា បើប្រៀបធៀបរវាងការចិញ្ចឹមគោ មាន់ ទា ជ្រូក ក្របី សេះ និងការចិញ្ចឹមចៀមគឺមានលក្ខណៈងាយស្រួលជាងព្រោះសត្វចៀមជាប្រភេទ សត្វម្យ៉ាងដែលងាយស្រួលក្នុងការចិញ្ចឹម មិនរើសទីកន្លែងទេ ដែលយើងអាចចិញ្ចឹមបានគ្រប់ទីកន្លែងនៅក្នុងប្រទេសកម្ពុជាជាពិសេសនោះ គឺសត្វដែលធន់នឹងអាកាសធាតុនៅប្រទេសយើង។ ប៉ុន្ដែយើងចាំបាច់ត្រូវតែយល់ដឹងពីបច្ចេកទេសមួយចំនួនពីការចិញ្ចឹមចៀម ដើម្បីទទួលបានទិន្នផលខ្ពស់។

ម្ចាស់កសិដ្ឋានរូបនេះ បានប្រាប់ផងដែរថា គាត់រៀនបច្ចេកទេសចិញ្ចឹមចៀមនេះ ដោយខ្លួនឯងនៅផ្ទះលក្ខណៈជា home  school ដែលយើងអាចទិញមេរៀនគេមករៀន។

លោក ចាន់វីរៈ បានចាប់ផ្ដើមដំណើរការចិញ្ចឹមដំបូងកាលពី ៣ឆ្នាំមុន ដោយចាប់ផ្ដើមពីសត្វចៀមញី១០ក្បាលនិងឈ្មោល១ក្បាល ដោយចំណាយដើមទុនប្រមាណជាង បីពាន់ដុល្លា ព្រោះសត្វចៀមមួយក្បាលមានតម្លៃប្រមាណ៣០០ដុល្លារ ។ លោកបានប្រលែងចៀមឱ្យទៅស៊ីស្មៅនៅចំការដូងរបស់លោក ពោលគឺការចិញ្ចឹមចំណាយអស់ ភាគច្រើនតែទៅលើការទិញពូជប៉ុណ្ណោះ ហើយចំណីគឺងាយស្រួលណាស់វាអាចស៊ីបានទាំងស្មៅធម្មជាតិ ស្មៅដាំ ស្មៅក្រៀម ឬស្លឹកឈើក៏បាន។

សត្វចៀមអាចកើតកូន១ឆ្នាំ ២ ដង លុះដល់កូនដែលកើតមកនោះមានអាយុត្រឹម ៦ ទៅ ៨ខែ វាក៏ចាប់ផ្ដើមរកបង្កាត់ពូជបន្តទៀត។ ឯចៀមឈ្មោលត្រឹម ៦ទៅ៨ ខែក៏អាចបង្កាត់ពូជបាន។ បើតាមលោកចាន់វីរៈចៀមញី ២០-៣០ ក្បាល ត្រូវការតែឈ្មោល១ក្បាលប៉ុណ្ណោះ ដូចនេះនៅពេលដែលមានចៀមឈ្មោលច្រើ គឺគេអាចលក់ចេញបាន។ ក្នុងអាយុពី៦ ទៅ ៨ ខែ ចៀមមានទម្ងន់ជាមធ្យម ៣០គីឡូក្រាម ឯការលក់ក្នុងទីផ្សារគឺ១គីឡូក្រាម មានតម្លៃ ៧ ទៅ ៨ដុល្លារ ដូចនេះចៀមមួយក្បាលទម្ងន់ ៣០ គីឡូក្រាមលក់បានតម្លៃពី ២១០ ទៅ ២៤០ដុល្លារ។

មកដល់ពេលបច្ចុប្បន្នកសិដ្ឋានចិញ្ចឹមចៀមនៅស្រុកទឹកផុសនេះមានចៀមប្រមាណ៦00ក្បាល ក្នុងនោះមានជាង៣០០ ក្បាលសម្រាប់ចិញ្ចឹម និង ៣០០ ក្បាលទៀត សម្រាប់លក់។

បើតាមលោក ប៊ុន ចាន់វីរៈ លោកមានគម្រោងពង្រីកកសិដ្ឋានដោយបន្ថែមេចៀមដល់​៦០០ក្បាល និងកូន៦០០ក្បាល ខណៈដែលសព្វថ្ងៃកំពុងពង្រីកការដាំស្មៅប្រមាណជាង២០ហិចតាបន្ថែមទៀត ។ សម្រាប់វាលស្មៅធម្មជាតិក្នុង១ហិចតាអាចប្រលែងចៀមឱ្យស៊ីបាន ២០ ក្បាលឯស្មៅដាំវិញគេអាចដាក់ចៀមបានពី ៦០ ទៅ១០០ ក្បាល។

យោងតាមរបាយការណ៍អង្គការស្បៀងអាហារនិងកសិកម្មបានឲ្យដឹងថាកាលពីឆ្នាំ២០២០ប្រទេសអូស្រ្តាលី បានជាប់លំដាប់ថ្នាក់ទី១ នៅទូទាំងពិភពលោកជាប្រទេសដែលបានចិញ្ចឹម និងនាំចេញចៀមច្រើនជាងគេ ទៅកាន់ទីផ្សារអន្តរជាតិ។ បច្ចុប្បន្នប្រទេសចិនគឺជាអ្នកនាំចូលសាច់ចៀមធំបំផុតរបស់ពិភពលោក ២,៧ លានតោនជាង ៧០%នៃការប្រើប្រាស់សរុបរបស់ពិភពលោក៕ អត្ថបទ៖ ណារី