កម្ពុជា ប្រកាសបើកយុទ្ធនាការ“កម្ពុជា ៖ គោលដៅទេសចរណ៍សុវត្ថិភាព និងបៃតង” នៅថ្ងៃទី២៧ មករា

កម្ពុជា នឹងប្រកាសបើកយុទ្ធនាការ “កម្ពុជា៖ គោលដៅទេសចរណ៍សុវត្ថិភាព និងបៃតង” នៅថ្ងៃទី២៧ ខែមករា ឆ្នាំ២០២២នេះ ដោយមានការចូលរូមពីរដ្ឋមន្ត្រីមកពីក្រសួងពាក់ព័ន្ធចំនួន៥រូប។ ការប្រកាសបើកយុទ្ធនាការនេះ បានធ្វើឡើងក្រោយពីកម្ពុជាធ្វើជាម្ចាស់ផ្ទះរៀបចំវេទិកាទេសចរណ៍អាស៊ាន២០២២ ដែលចាប់ពីថ្ងៃទី១៦ដល់ថ្ងៃទី២២ ខែមករា នៅក្រុងព្រះសីហនុ ខេត្តព្រះសីហនុ ហើយបញ្ចប់ដោយជោគជ័យយ៉ាងត្រចះត្រចង់។

សេចក្តីជួនដំណឹងរបស់ក្រសួងទេសចរណ៍ចុះថ្ងៃទី២៥ ខែមករា បានឱ្យដឹងថា ក្រសួងទេសចរណ៍ ក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩ និងគណៈកម្មាធិការជាតិវាយតម្លៃទី-ក្រុងស្អាត គ្រោងនឹងរៀបចំកម្មវិធីបើកយុទ្ធនាការ “កម្ពុជា៖ គោលដៅទេសចរណ៍សុវត្ថិភាព និងបៃតង” ដែលនឹងប្រព្រឹត្តទៅ នៅថ្ងៃ ទី២៧ ខែមករា ឆ្នាំ២០២២  វេលាម៉ោង ៨:០០ នាទីព្រឹក នៅទីស្តីការក្រសួងទេសចរណ៍។ កម្មវិធីនេះ នឹងធ្វើឡើងក្រោមអធិបតីភាពលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩ ។

ក្រសួងទេសចរណ៍បានបន្តថា យុទ្ធនាការនេះ នឹងមានការចូលរួមពីរដ្ឋមន្ត្រីមកពីក្រសួងពាក់ព័ន្ធចំនួន៤រូបផ្សេងទៀត ក្នុងនោះរួមមាន លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធ នឹងជំងឺកូវីដ-១៩ លោក សាយ សំអាល់ រដ្ឋមន្ត្រីក្រសួងបរិស្ថាន លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និង លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងមានការចូលរួមពីលោក លោកស្រី សមាជិក សមាជិកានៃក្រុមការងាររាជរដ្ឋាភិបាលនិងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឹកូវីដ-១៩ និងសមាជិក សមាជិកាគណៈកម្មាធិការជាតិវាយ តម្លៃទីក្រុងស្អាតជាច្រើនទៀតផងដែរ។

គួរបញ្ជាក់ថា រាជរដ្ឋាភិបាល បាន​សម្រេច​បើក​ប្រទេស​ឡើងវិញកាលពីថ្ងៃទី០១​ ខែវិច្ឆិកា ឆ្នាំ២០២១ក្រោយ​ពីស្ថានភាពជំងឺកូវីដ១៩ មានការថយចុះ។ ជាងនេះទៀត រដ្ឋាភិបាល ក៏បានប្រកាសបិទបញ្ចប់សហគន៍២០ ខែកម្ភៈ កាលពីថ្ងៃទី២០ ខែធ្នូ ឆ្នាំ២០២១ផងដែរ៕

អត្ថបទ ៖ សំអឿន