ព័ត៌មានជាតិ

បឹងយក្សឡោមទទួលបានភ្ញៀវចូលទស្សនាមួយសប្តាហ៍ប្រមាណជាង ៦,០០០ នាក់

បានផុស

៣ years មុន

នៅ

ថ្ងៃព្រហស្បតិ៍ ២៧ មករា ២០២២

ដោយ

ក្រោយពីប្រមុខរាជរដ្ឋាភិបាលកម្ពុជា បានប្រកាសបើកប្រទេសទាំងស្រុងឡើងវិញកាលពីខែវិច្ឆិកា២០២១ មក បច្ចុប្បន្នបឹងយក្សឡោមដែលជារមណីយដ្ឋានទេសចរណ៍ ដ៏គួរឲ្យទាក់ទាញមួយរបស់ខេត្តរតនគិរី ចាប់ផ្តើមទទួលបានភ្ញៀវទេសចរជាតិឡើងវិញជាបណ្តើរៗ ប្រមាណ ៦ ពាន់នាក់ក្នុងមួយសប្តាហ៍ ។ នេះបើតាមការបញ្ជាក់របស់លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ង៉ែត ពិទូ បានថ្លែងឲ្យដឹងយ៉ាងនេះនាព្រឹកថ្ងៃទី២៧ខែមករាឆ្នាំ២០២២នេះនៅក្នុងសន្និសីទសារព័ត៌មានស្ដីពី “វឌ្ឍនភាពមូលដ្ឋានឃុំ សង្កាត់ និងទិសដៅការងារ បន្ដរបស់រដ្ឋបាលខេត្តរតនគិរី” ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល។

លោក ង៉ែត ពិទូ បានលើកឡើងថា វិស័យទេសចរណ៍បានដើរតួយ៉ាងសំខាន់ក្នុងការអភិវឌ្ឍនិងជួយសេដ្ឋកិច្ចប្រជាពលរដ្ឋនៅខេត្តរតនគិរីយ៉ាងច្រើនក៏ប៉ុន្តែបន្ទាប់ពីមាន ការរាតត្បាតនៃជំងឺកូវីដ១៩ រយៈពេលពីរឆ្នាំចុងក្រោយនេះបានធ្វើឲ្យវិស័យមួយនេះមានការធ្លាក់ចុះខ្លាំង វាមិនមែនតែរតនគីរីនោះទេវាគឺជាវិបត្តិសាកល។ ប៉ុន្តែបច្ចុប្បន្ន នេះក្រោយរាជរដ្ឋាភិបាលប្រកាសបើកប្រទេសទាំងស្រុងឡើងវិញភ្ញៀវទេសចរជាតិបានចាប់ផ្តើមកម្រើកឡើងវិញជាបណ្តើរនិងមានភ្ញៀវទៅទស្សនាកម្សាន្តនៅខេត្ត រតនគិរី ជាហូរហែជាបន្តបន្ទាប់មិនដាច់នោះទេ។

លោកប្រធានមន្ទីរបន្តថា ជាមធ្យមអាចមានភ្ញៀវប្រមាណ ៥ ទៅ ៦ពាន់នាក់បានទៅទស្សនាបឹងយក្សឡោម។

លោកប្រធានមន្ទីរទេសចរណ៍បានឲ្យដឹងដែរថា កន្លងទៅមុនវិបត្តិកូវីដ១៩ ខេត្តរតនគិរីទទួលបានភ្ញៀវទេសចរជាតិប្រមាណ២០ម៉ឺននាក់ក្នុងមួយឆ្នាំ។ ប៉ុន្តែក្រោយវិបត្តិ កូវីដ១៩មកដល់ធ្វើឲ្យភ្ញៀវទេសចរធ្លាក់ចុះពោលគឺក្នុងឆ្នាំ២០២១មានត្រឹមតែប្រមាណ១២ម៉ឺននាក់ប៉ុណ្ណោះ ។ កាលពីឆ្នាំ២០២០កន្លងទៅខេត្តរតនគិរីទទួលបានភ្ញៀវ ទេសចរសរុបជាង ២០ម៉ឺននាក់ទោះបីស្ថិតក្នុងបរិបទជំងឺកូវីត-១៩ក៏ដោយ ។

ខេត្តរតនគិរីមានរមណីយដ្ឋានមានចំនួន ៣០ កន្លែងក្នុងនោះរមណីយដ្ឋានបែបវប្បធម៌ ២ កន្លែង, រមណីយដ្ឋានធម្មជាតិមាន ២០ កន្លែងនិងរមណីយដ្ឋានផ្នែកវិស័យ ឯកជនរីសតមានចំនួន៨កន្លែង។

លោកប្រធានមន្ទីរបានបន្តថា ខេត្តរតនគិរី មានទិសដៅធ្វើយ៉ាងណាឲ្យទទួលភ្ញៀវឲ្យបាន ៣០ ម៉ឺននាក់ដើម្បីឆ្លើយតបទៅនឹងយុទ្ធសាស្ត្ររបស់ក្រសួងទេសចរណ៍ពីឆ្នាំ ២០២២ដល់ឆ្នាំ២០២៦ ហើយដើម្បីសម្រេចបាននូវទិសដៅនេះទាមទារការចូលរួមពីសំណាក់វិស័យឯកជនតាមរយៈការអភិវឌ្ឍតំបន់រមណីយដ្ឋាន ឬផ្ទះសំណាក់ និងសណ្ឋាគារជាដើម៕

ដោយ ៖ ណារី