ស្ករត្នោតកំពង់ស្ពឺនាំចេញបានជិត ១៦០តោនឆ្នាំ ២០២១ រំពឹងកើនឡើង ១៧០តោននៅឆ្នាំនេះ

កាលពីឆ្នាំ ២០២១ សមាគមស្ករត្នោតកំពង់ស្ពឺ បាននាំចេញស្ករត្នោតប្រមាណ ១៥៧តោន និងរំពឹងថា ឆ្នាំ ២០២២នេះ នឹងកើនឡើងដល់ ១៧០តោន។

លោក វី វាសនា អ្នកចាត់ការទូទៅនៃសមាគមស្ករត្នោតកំពង់ស្ពឺ បានឲ្យកម្ពុជាថ្មីដឹងថា បច្ចុប្បន្នសមាគមមានកសិករផលិតស្ករត្នោតចំនួន ១៥៥គ្រួសារ ស្មើនឹងផលិតបានស្ករម្សៅចំនួន ៧០តោន ស្ករហុយ និងស្ករសាច់ចំនួន ៩៧តោន។​ លោកថា កាលពីឆ្នាំ ២០២១ មានកសិករ ១៥០គ្រួសារ សម្រេចការផលិតបានទាំងស្ករសាច់ និងស្ករម្សៅចំនួន ១៥៧តោន ក្នុងនោះ មាន ៤២តោន ស្ករម្សៅ ១៩តោន ស្ករសេរ៉ូ ក្រៅពីនេះគឺស្ករសាច់។

ស្ករត្នោត ដែលសមាគមផលិតមាន៤ប្រភេទ គឺស្ករម្សៅ ស្ករសេរ៉ូ ស្ករផែន និងស្ករសាច់។ ចំពោះតម្លៃសម្រាប់ស្ករសាច់ កាលពីឆ្នាំ ២០២១ ១គីឡូតម្លៃ ៦,៨០០រៀល ចំណែកឆ្នាំនេះ ឡើងបាន ៧,១០០រៀល។ ​

បើតាមលោក វី វាសនា បច្ចុប្បន្នសមាគមស្ករត្នោតកំពង់ស្ពឺ នៅខ្វះកម្លាំងផលិត ដើម្បីបំពេញតម្រូវការនៅឡើយ។ លោកថា សមាគមត្រូវការកម្លាំងផលិតបន្ថែមចំនួន ១៥០គ្រួសារទៀត ខណៈសព្វថ្ងៃមានចំនួន ១៥៥គ្រួសារ បូកសរុបទាំងអស់ ៣០០គ្រួសារ ទើបអាចគ្រប់តម្រូវការ។

លោក វី វាសនា បានឲ្យដឹងថា ​មូលហេតុដែលសមាគមស្ករត្នោតកំពង់ស្ពឺខ្វះកម្លាំងផលិត ដោយសារយុវជនពេញកម្លាំងភាគច្រើនងាកទៅធ្វើការងារក្នុងវិស័យរោងចក្រ។ ចំណែកកសិករវ័យចំណាស់ខ្វះកម្លាំងក្នុងការឡើងត្នោត មួយចំនួនក៏បោះបង់មុខរបរនេះ។

បច្ចុប្បន្នសមាគមផ្តោតលើការផលិតស្ករត្នោតនៅតំបន់ចំនួនបី គឺស្រុកឧដុង្គ ស្រុកសំរោងទង ខេត្តកំពង់ស្ពឺ និងស្រុកអង្គស្នួល ខេត្តកណ្តាល។ ស្ករត្នោតកំពង់ស្ពឺនាំចេញតាមរយៈក្រុមហ៊ុនទៅប្រទេស កាណាដា អាឡឺម៉ង់ បារាំង ចិន កូរ៉េ និងភាគច្រើននាំចេញទៅសហគមន៍អឺរ៉ុប។ ចំណែកនៅក្នុងស្រុកមានការផ្គត់ផ្គង់ប្រភេទស្ករសាច់ច្រើនផងដែរ។

ដើមត្នោត ដែលបានផ្តល់ស្ករឲ្យសមាគមស្ករត្នោតកំពង់ស្ពឺ មានចំនួនជាង ៣ពាន់ដើម ស្ថិតក្នុងស្រុកពីរនៃខេត្តកំពង់ស្ពឺ គឺស្រុកឧដុង្គ ស្រុកសំរោងទង និងមួយស្រុកទៀត នៅអង្គស្នួល នៅខេត្តកណ្តាល។

ស្ករត្នោតកំពង់ស្ពឺ ត្រូវបានទទួលស្គាល់ជាផលិតផលសម្គាល់ភូមិសាស្ដ្រ (GI) កាលពីឆ្នាំ២០១០ និងចុះបញ្ជីម៉ាកសម្គាល់ភូមិសាស្រ្តការពារ (PGI) របស់សហភាពអឺរ៉ុប នៅថ្ងៃទី៣ ខែមេសា ឆ្នាំ២០១៩ ដោយបានទទួលស្គាល់ថា ជានិមិត្តរូបនៃប្រទេសកម្ពុជា៕

អត្ថបទ៖ ទួន សុផល