កម្ពុជា​ នឹង​មាន​ភ្លៀង​ធ្លាក់​ដោយ​សារ​ឥទ្ធិពល​ទ្រនុង​សម្ពាធ​ខ្ពស់ចិន​ និង​ខ្យល់​មូសុង​ឦសាន​

កម្ពុជានឹងមានភ្លៀងធ្លាក់ក្នុងកម្រិតខ្សោយទៅមធ្យមនៅអំឡុងសប្ដាហ៍ទី១ នៃខែកុម្ភៈ ឆ្នាំ ២០២២ ដោយសារតែឥទ្ធិពលទ្រុងសម្ពាធខ្ពស់ (ចិន) និងខ្យល់មូសុងឦសានក្នុងកម្រិតមធ្យម។

សេចក្ដីជូនដំណឹងរបស់ក្រសួងធនធានទឹក និងឧតុនិយម បញ្ជាក់ថា ចាប់ពីថ្ងៃទី២-៣ ខែកុម្ភៈ ឥទ្ធិពលទ្រនុងសម្ពាធខ្ពស់ (ចិន) ស្ថិតក្នុងកម្រិតខ្សោយ ហើយចាប់ពីថ្ងៃទី៤-៦ ខែកុម្ភៈ នឹងមានការកើតឡើងនូវឥទ្ធិពលពីរស្របគ្នា ពីទ្រនុងសម្ពាធខ្ពស់ចិន និងខ្យល់មូសុងឦសានក្នុងកម្រិតមធ្យម។ ចាប់ពីថ្ងៃទី៧-៨ ខែកុម្ភៈ ឥទ្ធិពលពីសម្ពាធទាប (ឥណ្ឌូនេស៊ី) មានក្នុងកម្រិតខ្សោយ។

ក្រសួងធនធានឱ្យដឹងថា យោងតាមស្ថានភាពបែបនេះនឹងធ្វើឲ្យបណ្តាខេត្តនៅតំបន់វាលទំនាបកណ្តាល អាចមានភ្លៀងធ្លាក់ជាអន្លើរ ក្នុងកម្រិតពីខ្សោយទៅមធ្យម។ ដោយឡែកនៅថ្ងៃទី៥-៦ ខែកុម្ភៈ សីតុណ្ណភាពអប្បបរមា អាចពី ១៩-២២°C គួបផ្សំនិងខ្យល់ក្នុងល្បឿនមធ្យម។

ដោយឡែក បណ្តាខេត្តជាប់ជួរភ្នំដងរែក និងខ្ពង់រាបឦសាន អាចមានភ្លៀងធ្លាក់ជាអន្លើរ ក្នុងកម្រិតពីខ្សោយទៅមធ្យម។ ដោយឡែកនៅថ្ងៃទី៥-៦ ខែកុម្ភ: សីតុណ្ណភាពអប្បបរមា អាចពី១៨-២១°C គួបផ្សំនិងខ្យល់ក្នុងល្បឿនពីមធ្យមទៅខ្លាំង។ បន្ថែមពីនេះសម្រាប់បណ្ដាខេត្ដនៅតំបន់មាត់សមុទ្រ ស៊ីតុណ្ហភាព នឹងមានចន្លោះពី ២២ ដល់ ៣២អង្សាសេ ហើយក៏អាចមានភ្លៀងធ្លាក់ក្នុងកម្រិតពីខ្សោយទៅធម្យមដែរ៕