ខេត្តកំពង់ឆ្នាំង មានសិស្ស និងគ្រូ តិចតួចទេដែលអវត្តមាន ក្នុងឱកាសបុណ្យចូលឆ្នាំចិន

ប្រធានមន្ទីរអប់រំយុវជន និងកីឡាខេត្តកំពង់ឆ្នាំង បានឲ្យដឹងថា នៅក្នុងឱកាសបុណ្យចូលឆ្នាំចិននេះសម្រាប់ខេត្តកំពង់ឆ្នាំង មានសិស្ស និងលោកគ្រូ-អ្នកគ្រូ មករៀន និងបង្រៀនជាធម្មតាទេ ពោលគឺមានតិចតូចប៉ុណ្ណោះ បានអវត្តមានដោយចៃដន្យ។

លោក ស៊ឹម ប្រិយ ប្រធានមន្ទីរអប់រំយុវជន និងកីឡាខេត្តកំពង់ឆ្នាំង បានមានប្រសាសន៍នៅរសៀលថ្ងៃទី ១ ខែកម្ភៈនេះថា ជាធម្មតាខេត្តកំពង់ឆ្នាំង មិនមានបញ្ហាសិស្ស និងគ្រូអវត្តមាន ក្នុងពិធីបុណ្យចូលឆ្នាំចិនទេ គឺពួកគាត់មកបង្រៀន និងរៀនជាធម្មតា។

លោកប្រធានមន្ទីរ បានបន្តថា «យើងមិនមានវិធានការអ្វីទេ ក្នុងពិធីបុណ្យចូលឆ្នាំចិននេះ បើសិនជាគ្រូ ឬសិស្សសុំច្បាប់ វាជាសិទ្ធិរបស់គាត់។ ប៉ុន្តែជាទូទៅភាគច្រើន នៅខេត្តមិនមានការសុំច្បាប់ឈប់សម្រាកទេ។ អីចឹងដូចជាមិនមានបញ្ហាអ្វីទេ តែមានតិចតួចប៉ុណ្ណោះ ជួនកាលវាចៃដន្យដែលត្រូវឈប់ចំថ្ងៃហ្នឹង»។

យោងតាមរបាយការណ៍ របស់មន្ទីរអប់រំ យុវជននិងកីឡាខេត្តកំពង់ឆ្នាំង បានឲ្យដឹងថា នៅក្នុងខេត្តកំពង់ឆ្នាំង មានគ្រឹះ ស្ថានមធ្យមសិក្សាចំនួន ៧៩កន្លែង។ ក្នុងនោះ មានវិទ្យាល័យចំនួន ១៦កន្លែងនិងអនុវិទ្យាល័យចំនួន ៦៣កន្លែង៕

អត្ថបទ៖ សំអឿន