កម្ពុជា កំពុងសិក្សាការដឹកជញ្ជូនតាមផ្លូវទឹក​ពីភ្នំពេញត្រង់ទៅសមុទ្រកែប

ក្រសួងសាធារណការ និងដឹកជញ្ជូន កំពុងសិក្សាអំពីផលប៉ះពាល់ជំហានដំបូងជាមួយក្រសួងធនធានទឹក ពីគម្រោងបង្កើតផ្លូវដឹកជញ្ជូនត្រង់តាមផ្លូវទឹកពីភ្នំពេញទៅកាន់សមុទ្រខេត្តកែប។

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានលើកឡើងដូច្នេះថា «យើងបានសិក្សា នឹងបានគោរពរាយការណ៍ទៅសម្តេសតេជោ ហ៊ុន សែន និងសម្តេច ស ខេង រួចហើយ ដោយសារយើងចង់មានការរីកចម្រើនតាមផ្លូវទឹក ហើយខេត្តមួយចំនួន ដូចជា ខេត្តតាកែវ នឹងទទួលបានផលល្អពីការដឹកជញ្ជូនតាមផ្លូវទឹក ពីទន្លេបាសាក់ ទៅសមុទ្រត្រង់តែម្តង»។

លោករដ្ឋមន្រ្តី ស៊ុន ចាន់ថុល ថ្លែងបែបនេះ នៅក្នុងពិធីបិទ​សន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ ប្រធានបទ «ការធ្វើឱ្យប្រសើរឡើងហេដ្ឋារចនាសម្ព័ន្ធដឹកជញ្ជូន ដែលធន់នឹងការប្រែប្រួលអាកាសធាតុ ការគ្រប់គ្រងការងារសាងសង់ និងថែទាំផ្លូវ-ស្ពាន ឱ្យមានគុណភាព ដោយផ្តោតលើការប្រើប្រាស់បច្ចេកវិទ្យាទំនើប​» កាលពីថ្ងៃទី ២៨ ខែមករា ឆ្នាំ ២០២២។

លោក ស៊ុន ចាន់ថុល បានអះអាងថា ក្រសួងនឹងសិក្សាលម្អិតអំពីផលប៉ះពាល់ និងខ្ទង់ចំណាយ ឲ្យបានឆាប់ ដើម្បីធ្វើយ៉ាងណាបង្កភាពងាយស្រួលដល់ការដឹកជញ្ជូនទំនិញតាមផ្លូវទឹកពីរាជធានីភ្នំពេញ ទៅកាន់សមុទ្រដោយត្រង់ ដោយមិនចាំបាច់ឆ្លងកាត់តាមនីតិវិធីដូចសព្វថ្ងៃ នៅក្អមសំណ។

បើតាមលោក ស៊ុន ចាន់ថុល កិច្ចការងារនេះ ក្រសួងសាធារណការ នឹងលម្អិតបន្ថែមទៀត ជូនរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ដើម្បីធ្វើការវាយតម្លៃលើគម្រោងនេះ។ លោករដ្ឋមន្រ្តីសង្កត់ធ្ងន់ថា គម្រោងនេះ ក្រសួងសាធារណការ បានសិក្សារជាមួយក្រសួងធនធានទឹក ដោយពិនិត្យលើផ្លូវច្បាប់ របស់គណៈកម្មាការទន្លេមេគង្គជំហានដំបូងរួចហើយ គឺពុំមានផលប៉ះពាល់នោះទេ ពោលគឺអាចធ្វើបាន៕

អត្ថបទ៖ ទូន សុផល