ព្រឹកនេះ គណៈប្រតិភូកងទ័ពថៃ ទៅទស្សនាបញ្ជាការដ្ឋានទ័ពពិសេស និងវិមានឈ្នះ ឈ្នះ

នៅថ្ងៃទី០៤ ខែកុម្ភៈ ឆ្នាំ២០២២នេះ គឺជាថ្ងៃទី២ នៃដំណើរទស្សនកិច្ចរបស់គណៈប្រតិភូមេបញ្ជាការកងទ័ពជើងគោកភូមិន្ទថៃ ហើយតាមកម្មវិធីដែលបានគ្រោងទុក នៅម៉ោងជាង៨ព្រឹកនេះ គណៈប្រតិភូកងទ័ព បានទស្សនាបញ្ជាការដ្ឋានទ័ពពិសេស កងទ័ពជើងគោក ដែលក្នុងឳកាសនោះ នឹងទទួលស្វាគមន៍ដោយលោកឧត្តមសេនីយ៍ឯក ចាប ភក្តី ។

បន្ទាប់ពីទស្សនាបញ្ជាការដ្ឋានទ័ពពិសេសកងទ័ពជើងគោក គណៈប្រតិភូមេបញ្ជាការកងទ័ពជើងគោកភូមិន្ទថៃ ដឹកនាំដោយនាយឧត្តមសេនីយ៍ NARONGPAN JITTKAEWTAE អគ្គមេបញ្ជាការកងទ័ពជើងគោកភូមិន្ទថៃ នឹងអញ្ជើញបន្តដំណើរទៅទស្សនាវិមានឈ្នះឈ្នះ ដែលជាទីតាំងបង្ហាញនូវប្រវត្តិសាស្រ្តនៃការបញ្ចប់សង្គ្រាមនៅកម្ពុជាតែម្តង។ ក្រោយពីជួបពិភាក្សាជាមួយឯកអគ្គរាជទូតថៃប្រចាំកម្ពុជានាវេលាម៉ោង១១ព្រឹក គណៈប្រតិភូកងទ័ពថៃ នឹងទទួលទានពិសារអាហារថ្ងៃត្រង់ និងមាតុភូមិនិវត្តន៍ទៅកាន់ប្រទេសថៃវិញ តាមជើងយន្តហោះពិសេសរបស់ខ្លួននៅវេលាម៉ោង១ និង៣០នាទីរសៀល។

សូមបញ្ជាក់ថា គណៈប្រតិភូមេបញ្ជាការកងទ័ពជើងគោកភូមិន្ទថៃ មកបំពេញទស្សនកិច្ចនៅកម្ពុជារយៈពេល២ថ្ងៃ ដោយចាប់ពីថ្ងៃទី០៣ ដល់ទី០៤ ខែកុម្ភៈ ឆ្នាំ២០២២ ដើម្បីពង្រឹងពង្រីកកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ។ នេះ គឺជាលើកទីមួយហើយដែលប្រតិភូកងទ័ពជើងគោកភូមិន្ទថៃ បានមកបំពេញទស្សនកិច្ចនៅកម្ពុជា បន្ទាប់ពីស្ថានភាពជំងឺកូវីដ១៩ បានធូរស្រាល៕

ដោយ ៖ កោះកែវ