និស្សិតមកពីខេត្តអាចស្នាក់នៅវត្តតាមវិធីណា?

ជារៀងរាល់ដើមឆ្នាំសិក្សា សិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប បានមកបន្តការសិក្សានៅសាកលវិទ្យាល័យ។ ថ្វីដ្បិតតែតាមបណ្ដាខេត្តមួយចំនួនមានសាកលវិទ្យាល័យ ប៉ុន្តែនិស្សិតភាគច្រើនបានសម្រេចមកសិក្សានៅរាជធានីភ្នំពេញ ដោយអ្នកខ្លះស្នាក់នៅផ្ទះបងប្អូន អ្នកខ្លះស្នាក់នៅបន្ទប់ ឬផ្ទះជួលជុំញាតិមិត្ត ចំណែកនិស្សិតបុរសដែលមិនមានញាតិមិត្តរស់នៅភ្នំពេញ ឬខ្វះខាតជីវភាពផងនោះ បានស្នាក់នៅវត្តអារាម។

លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា មានប្រសាសន៍ប្រាប់ “កម្ពុជាថ្មី” នៅថ្ងៃនេះថា សឹងតែគ្រប់វត្តទាំងអស់នៅរាជធានីភ្នំពេញ ពិសេសវត្តដែលស្ថិតនៅក្បែរសាកលវិទ្យាល័យ ឬទីតាំងសិក្សា មានទទួលសិស្សនិស្សិតពីបណ្ដាខេត្តចូលស្នាក់ដើម្បីបន្តសិក្សា។

ទាក់ទងការស្នើសុំស្នាក់នៅវត្ត អ្នកនាំពាក្យក្រសួងធម្មការ និងសាសនា មានប្រសាសន៍ថា តាមយន្តការ​​​​កន្លងមក គឺអាស្រ័យចំណុច២ ​ទី១ អាស្រ័យលើព្រះគ្រូចៅអធិការ ដោយវត្តខ្លះព្រះគ្រូចៅអធិការជាអ្នកគ្រប់គ្រងផ្ទាល់។ ទី២ វត្តខ្លះអាស្រ័យលើព្រះសង្ឃមេកុដ ព្រោះវត្តធំៗព្រះគ្រូចៅអធិការបានប្រគល់សិទ្ធិទៅដល់មេកុដនីមួយៗ។ ដូចនេះបើកុដនោះមានកន្លែងទំនេរអាចទទួលសិស្សនិស្សិតមកស្នាក់នៅរៀនសូត្របាន នោះមេកុដនឹងទូលថ្វាយ​ព្រះចៅអធិការ​​ឱ្យទទួលសិស្សនិស្សិតនោះ។​

លោក សេង សុមុនី មានប្រសាសន៍ថា វត្តអារាមមានតម្លៃខ្ពស់ណាស់ មិនអាចកាត់ថ្លៃបាន ដោយវត្តអារាមបានកសាងធនធានមនុស្សទាំងព្រះសង្ឃ និងសិស្សនិស្សិត ជាប្រយោជន៍ដ៏ធំធេងសម្រាប់សង្គមជាតិ។ ទន្ទឹមនឹងនោះ អ្នកបានស្នាក់នៅវត្តអារាមដើម្បីបន្តការសិក្សា មានទាំងចំណេះ ជំនាញ បទពិសោធ សីលធម៌ គុណធម៌ផង ដែលអាចរក្សាប្រពៃណី ​​​ទំនៀមទម្លាប់ ​វប្បធម៌ អក្សរសាស្ត្រ និងជាពលកម្មរបស់ជាតិដ៏មានតម្លៃ ដែលគណៈសង្ឃទាំង ២ គណៈបានជួយជ្រោមជ្រែងបណ្ដុះបណ្ដាលជាការរួមចំណែកជាមួយរាជរដ្ឋាភិបាល។

គួរបញ្ជាក់ថា នៅ​ឆ្នាំ ២០២០ រាជធានី​ភ្នំពេញ មាន​វត្ត​ចំនួន ​១៤៩ (​មហានិកាយ​ចំនួន​ ១៤២​វត្ត ធម្មយុត្តិកនិកាយ​ចំនួន ​៧​វត្ត​) ​ព្រះសង្ឃ​ចំនួន ​៨ ៦១០ ​អង្គ (​ភិក្ខុ​ចំនួន​ ៣ ៨២៩​ អង្គ សាមណេរ​ចំនួន ​៤ ៧៨១ ​អង្គ​) ​អាចារ្យ និង​គណៈកម្មការ​វត្ត​ចំនួន ​១ ៦៤៩ ​នាក់ យាយជីតាជី​ចំនួន ​១ ០៦០​ នាក់ និង​និស្សិត​ស្នាក់​នៅ​រៀនសូត្រ​មាន​ចំនួន​ ២ ៨២១ ​នាក់៕

អត្ថបទ៖ ច័ន្ទ វីរៈ