ព័ត៌មានជាតិ

ប្រធានាធិបតីអាមេរិក ផ្ញើលិខិតអញ្ជើញសម្តេចតេជោ ចូលរួមជំនួបប្រជុំអាស៊ាន-សហរដ្ឋអាមេរិក នៅទីក្រុងវ៉ាស៊ីនតោន

បានផុស

៣ years មុន

នៅ

ថ្ងៃអាទិត្យ ៦ កុម្ភៈ ២០២២

ដោយ

ប្រធានាធិបតីអាមេរិក លោក ចូ បៃឌិន បានផ្ញើលិខិតអញ្ជើញសម្តេចតេជោ ហ៊ុន សែន ដើម្បីចូលរួមជំនួបប្រជុំអាស៊ាន-សហរដ្ឋអាមេរិក នៅទីក្រុងវ៉ាស៊ីនតោននៅពេលខាងមុខនេះ។

ក្នុងនាមកម្ពុជាជាប្រធានអាស៊ានសម្រាប់ឆ្នាំ២០២២ សហរដ្ឋអាមេរិកសង្ឃឹមថាទំនាក់ទំនងអាស៊ាន-សហរដ្ឋអាមេរិក នឹងកាន់តែរីកចម្រើន និងបន្តឆ្ពោះទៅសម្រេចគោលដៅរួមនៅក្នុងតំបន់។

ក្នុងលិខិតបន្តថា សហរដ្ឋអាមេរិកគាំទ្រមជ្ឈភាពអាស៊ាន ហើយគាំទ្រឥតងាកចំពោះនិម្មាបនកម្មតំបន់ដែលមានអាស៊ានជាស្នូល និងដែលជាបេះដូងនៃតំបន់ឥណ្ឌូ-ប៉ាស៊ីហ្វិក។ សម្តេចតេជោនាយករដ្ឋមន្ត្រី បានជ្រាបរួចហើយតាមរយៈឥណ្ឌូនេស៊ី ដែលជាប្រទេសសម្របសម្រួលទំនាក់ទំនងអាស៊ាន-សហរដ្ឋអាមេរិក ក្នុងការពាំនាំការតាំងចិត្តរបស់លោកក្នុងការអញ្ជើញថ្នាក់ដឹកនាំអាស៊ានចូលរួមកិច្ចប្រជុំកំពូលពិសេសនៅរដ្ឋធានីវ៉ាស៊ីនតោន នៅប៉ុន្មានខែខាងមុខនេះទៀត។ តាមរយៈលិខិតនេះគឺចង់ទាក់ទងទៅសម្តេចតេជោនាយករដ្ឋមន្ត្រីដោយផ្ទាល់ផងដែរ ដើម្បីគូសបញ្ជាក់ថា លោករង់ចាំស្វាគមន៍សម្តេចអញ្ជើញមកកាន់រដ្ឋធានីវ៉ាស៊ីនតោន នៅឱកាសដ៏ឆាប់ខាងមុខ។

ជាការឆ្លើយតបប្រមុខរដ្ឋាភិបាល សម្តេចតេជោ ហ៊ុន សែន ក៏បានថ្លែងអំណរគុណដល់ប្រធានាធិបតី ដែលបានផ្ញើលិខិតបញ្ជាក់អំពីគោលបំណងអញ្ជើញសម្តេច និងថ្នាក់ដឹកនាំអាស៊ាន ចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលគ្រោងរៀបចំនៅក្នុងរយៈពេលប៉ុន្មានខែខាងមុខនេះ និងបំណងប្រាថ្នា ក្នុងការពង្រឹងទំនាក់ទំនង អាស៊ាន-សហរដ្ឋអាមេរិកបន្ថែមទៀត ក្នុងពេលកម្ពុជាធ្វើជាប្រធានអាស៊ាន។

ក្នុងនាមកម្ពុជាជាប្រធានអាស៊ាន ឆ្នាំ២០២២ សម្តេចក៏បញ្ជាក់សារជាថ្មីអំពីការប្តេជ្ញានិងការគាំទ្រ យ៉ាងពេញទំហឹងចំពោះសហរដ្ឋអាមេរិក ក្នុងការរៀបចំកិច្ចប្រជុំកំពូលពិសេសអាស៊ាន-សហរដ្ឋអាមេរិកនៅរដ្ឋធានីវ៉ាស៊ីនតោន។

ប្រមុខរដ្ឋាភិបាលកម្ពុជាមានជំនឿថា កិច្ចប្រជុំកំពូលនេះ នឹងផ្តល់នូវកាលានុវត្តភាពល្អមួយសម្រាប់ផ្លាស់ប្តូយោបល់គ្នា ថាតើត្រូវធ្វើយ៉ាងណា ដើម្បីអោយកិច្ចសហប្រតិបត្តិការអាស៊ាន-សហរដ្ឋអាមេរិក រីកចំរើនទៅមុខបន្ថែមទៀត។

សម្តេចតេជោក៏បញ្ជាក់ពីការទន្ទឹងរង់ចាំធ្វើការយ៉ាងជិតស្និទ្ធនិងជួបដោយផ្ទាល់ជាមួយឯកឧត្តមប្រធានាធិបតីនៅរដ្ឋធានី វ៉ាស៊ីនតោន៕