លោក ជា សុផារ៉ា៖ ផ្លូវតភ្ជាប់ឧទ្យានជាតិ​ព្រះមុនីវង្សបូកគោ​មកផ្លូវជាតិលេខ៤ សម្រេចបានជាង ៦គីឡូម៉ែត្រហើយ

លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា រហូតមកដល់ពេលនេះ​ គម្រោងស្ថាបនាផ្លូវតភ្ជាប់ឧទ្យានជាតិ​ព្រះមុនីវង្សបូកគោ​ មកផ្លូវជាតិលេខ៤ ត្រង់ចំណុច PK១៥៨+២០០​ អនុវត្ត​បាន៤៥ថ្ងៃ​ និងសម្រេចបាន​៦,៥ គីឡូម៉ែត្រ​ហើយ។

លោករដ្ឋមន្រ្តី ជា សុផារ៉ា បានឲ្យដឹង កាលពីថ្ងៃទី ០៦ ខែ កុម្ភៈថា «មុខព្រួញអ្នកឧកញ៉ាសុខ គង់ ធើ្វពីខ្នងភ្នំចុះក្រោម។ ឧកញ៉ា ម៉ុង ឬទ្ធី​ អនុវត្តការដ្ឋានបើកផ្លូវពីផ្លូវជាតិលេខ៤ទៅតភ្ជាប់គ្នា ដែលមានប្រវែងសរុប ៦១​ គីឡូម៉ែត្រ»។

បើតាមលោករដ្ឋមន្រ្តី រៀបចំដែនដី បានគូសបញ្ជាក់ថា គម្រោងនេះជាការសម្រួលដល់ការធើ្វដំណើរ និងការគាំទ្រដល់ការវិនិយោគ។

លោកថ្លែងដូច្នេះថា « ឧទ្យានជាតិដ៏ពិសិដ្ឋ​នេះ​ រងការខូចខាត និងខាតបង់ពេលវេលារាប់រយឆ្នាំ​ដោយ​សារសង្គ្រាម។ បច្ចុប្បន្នយើងមានសន្តិភាពពេញផ្ទៃប្រទេស ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន»។

សូមបញ្ជាក់ថា ដោយអនុវត្តតាមប្រសាសន៍របស់សម្តេចជោនាយករដ្ឋមន្រ្តី កាលពីថ្ងៃទី ១៨ ខែធ្នូ ឆ្នាំ២០២១ លោក​ ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានសម្របសម្រួលជាមួយអ្នកឧកញ៉ា សុខ គង់ និងអ្នកឧកញ៉ា ម៉ុង ឬទ្ធី ធ្វើផ្លូវថ្មីមួយខ្សែប្រវែង ២៧ គីឡូម៉ែត្រ តភ្ជាប់ពីផ្លូវជាតិលេខ ៤ ត្រង់គីឡូម៉ែត្រលេខ ១៥៨+២០០ ឆ្ពោះទៅភ្នំបូកគោ ឆ្លងកាត់តាមដីសម្បទានសេដ្ឋកិច្ចចំការដូងប្រេង។ ក្នុងនោះ អ្នកឧកញ៉ា សុខ គង់ ទទួលរ៉ាប់រងការចំណាយស្ថាបនាផ្លូវ ហើយអ្នកឧកញ៉ា ម៉ុង ឬទ្ធី ជួយឈូសឆាយដើមដូងប្រេង ដើម្បីបើកផ្លូវ៕

អត្ថបទ៖ ទួន សុផល