ពាណិជ្ជកម្ម​ទ្វេភាគី​កម្ពុជា-​ថៃ ​មាន​ទំហំ​ជិត​៨ពាន់​លានដុល្លារ​

ទិន្នន័យរបស់នាយកដ្ឋានចរចាពាណិជ្ជកម្មនៃក្រសួងពាណិជ្ជកម្មថៃ បានបង្ហាញថា ទឹកប្រាក់សរុបនៃការដោះដូរពាណិជ្ជកម្មទ្វេភាគីរវាងកម្ពុជា និងថៃ នៅឆ្នាំ ២០២១ មានតម្លៃ ៧,៩៧៣ ប៊ីលានដុល្លារអាមេរិក កើនឡើងប្រមាណ ១០% បើធៀបនឹងឆ្នាំ ២០២០ ដែលមានតម្លៃ ៧,២៣១ ប៊ីលានដុល្លារអាមេរិក។

យោងតាមរបាយការណ៍របស់ស្ថានទូតកម្ពុជា ប្រចាំប្រទេសថៃ នៅថ្ងៃទី ០៨ ខែកុម្ភៈ បានឲ្យដឹងថា ការនាំចេញពីកម្ពុជាទៅថៃ បានធ្លាក់ចុះ ២២% ពីទឹកប្រាក់ ១,១៥ពាន់លានដុល្លារអាមេរិក (ឆ្នាំ ២០២០) មកនៅ ៨៩៤លានដុល្លារអាមេរិក។ ផ្ទុយទៅវិញ ការនាំចូលពីថៃ បានកើនឡើង ១៦% ពីទឹកប្រាក់ ៦,១ប៊ីលានដុល្លារអាមេរិក (២០២០) ដល់ ៧,១ប៊ីលានដុល្លារអាមេរិក ដែលនាំឲ្យប្រទេសទាំងពីរ មានវិសមភាពទំហំពាណិជ្ជកម្មដល់ទៅជាង ៦ប៊ីលានដុល្លារអាមេរិក។

កម្ពុជា បានលក់ប្រភេទមុខទំនិញទៅកាន់ប្រទេសថៃ មានដូចជា ផលិតផលវាយនភណ្ឌ កសិផលត្បូងថ្មមានតម្លៃ វត្ថុធាតុដើម និងទំនិញពាក់កណ្តាលសម្រេច។ ចំណែក ទំនិញ ដែលកម្ពុជា ទិញពីថៃចូលមកវិញ មានថាមពល ត្រី សាច់ បន្លែ និងផលិតផលសម្រេចដូចជា រថយន្ត ជីសរីរាង្គ ស៊ីម៉ង់ដ៍ ម្ហូបអាហារ ភេសជ្ជៈ គ្រឿងសំអាង និងសម្ភារៈសំណង់។

រដ្ឋាភិបាលថៃ គ្រោងនឹងបង្កើនទំហំពាណិជ្ជកម្មឆ្លងកាត់ព្រំដែនពី៥% ទៅ៧% ថែមទៀតបន្ទាប់ពីសម្រេចបានទឹកប្រាក់ ១.៧ទ្រីលានបាតនៅឆ្នាំ២០២១ កើនឡើង៣០% បើធៀបនឹងឆ្នាំ២០២០។ នេះបើតាមការបញ្ជាក់របស់លោក Jurin Laksanawisit រដ្ឋមន្រ្តីក្រសួងពាណិជ្ជកម្មថៃ។ លោករដ្ឋមន្រ្តីរូបនេះ បន្តថា ដើម្បីសម្រួលដល់ការធ្វើពាណិជ្ជកម្មឆ្លងដែន រដ្ឋាភិបាលនឹងបន្តធ្វើការជាមួយទីប្រឹក្សាពាណិជ្ជកម្ម ភ្នាក់ងាររដ្ឋាភិបាល និងវិស័យឯកជនទាំងក្នុងស្រុក និងក្រៅប្រទេស ដើម្បីកំណត់ពីសក្តានុពល និងទីតាំងរបស់អតិថិនជនក្នុងទីផ្សារថ្មី។

លើសពីនេះ រដ្ឋាភិបាលថៃក៏គ្រោងនឹងបើកឡើងវិញ នូវច្រកទ្វារអន្តរជាតិទាំង១២ទីតាំង ជាមួយប្រទេសជិតខាង ក្រោយពីបានបិទដោយសារតែជំងឺកូវីដ-១៩ នាពេលកន្លងមក៕

អត្ថបទ៖ ទួន សុផល